Այնուամենայնիվ, անպայման կարդալ Օրուելի «Անասնաֆերման»

Հեղափոխության առաջին օրերին, երբ Նիկոլ Փաշինյանը նոր էր ընտրվել, առաջին նախագահ Լևոն Տեր-Պետրոսյանը, անդրադառնալով երկրում տեղի ուենցող գործընթացներին, դրանք խորությամբ ընկալելու համար, խորհուրդ էր տվել կարդալ
անգլիացի հայտնի գրող Ջորջ Օրուելի «Անասնաֆերմա» վիպակը:

Կյանքը ցույց տվեց, որ իմաստուն ծերուկը ճիշտ էր, «Անասնաֆերմայի» բոլոր արատավոր երևույթներն արտացոլված են հեղափոխական Հայաստանի ներկա իրականության մեջ: Ընդ որում, նախահեղափոխական Հայաստանում այդ նույն երևույթները, օրինակ` պետության ղեկավարի գերթանկարժեք թռիչքը դեպի ԱՄՆ, վարչապետի դստեր սպասարկման համար պետության հաշվին թանկարժեք ավտոմեքենա գնելը, կառավարական առանձնատան շքեղ նորոգումը, բարձրաստիճան պաշտոնյաների աշխատավարձերի գաղտնի կրկնապատկումը նախկինում դիտվում էին պետական միջոցների վատնում, և ընդդիմադիր Նիկոլ Փաշինյանի կողմից բնորոշվում էին որպես պետական թալան, այսօր հիմնավորվում են որպես պետական անհրաժեշտություն:
Կառավարությունը 27 հազար դոլար արժողությամբ ամենագնաց է ձեռք բերել` վարչապետ Նիկոլ Փաշինյանի դստեր համար : ԶԼՄ-ներն ու սոցցանցերն արդեն երկու օր է, ինչ գրում են այս մասին: Տեղեկատվությունը հաստատել է վարչապետի մամուլի քարտուղար Վլադիմիր Կարապետյանը` նշելով, որ Մարիամ Փաշինյանի համար նոր մեքենայի ձեռքբերումը համապատասխանում է «Հատուկ պետական պաշտպանության ենթակա անձանց անվտանգության ապահովման մասին» օրենքին։ Նա նշել է, որ «Վարչապետի պաշտոնավարման ժամանակահատվածում պետական պահպանություն տրամադրվում է նաև նրա հետ համատեղ բնակվող, ինչպես նաև նրան ուղեկցող ընտանիքի անդամներին» և հատուկ պետական պաշտպանության ենթակա անձանց անվտանգության ապահովման նպատակով, օրենսդրությամբ սահմանված կարգով, անհրաժեշտության դեպքում կարող է ձեռք բերել տրանսպորտային միջոցներ:
Հրաշալի և աննման. իսկ ինչո՞վ է հիմնավորվում նոր մեքենայի ձեռքբերման անհրաժեշտությունը: Կառավարությունը ամբողջ տարվա ընթացքում բազմաթիվ անգամներ հայտարարել է, որ ծառայողական ավտոմեքենաների թիվը կրճատելու քաղաքականություն է վարում: Ընդամենը երեկ վարչապետի պաշտոնական կայքում ֆինանսների նախարարի հետ հանդիպման վերաբերյալ տեղեկատվություն է հրապարակվել, որտեղ նշված է, որ ֆինանսների նախարարության 17 ծառայողական ավտոմեքենայից 13- ը կրճատվել է: ՞Ինչն էր խանգարում, որ այս 13 ավտոմեքենաներից մեկը տրամադրվեր վարչապետի դստեր սպասարկման համար: Պարտադի՞ր էր նոր մեքենա գնել, այն էլ 27 հազար դոլարով:
Կատարվածին անդրադարձել է նաև վարչապետի դուստրը` հավատացնելով, որ ինքն ապրում է պարզ, սովորական մարդկային կյանքով, և տեղյակ չէ, թե մեքենան, որի մասին այսքան խոսվում է, երբ է ձեռք բերվել. երբեք չի հետաքրքրվել` նոր է, թե հին, չգիտի անգամ իրեն սպասարիկող մեքենայի մակնիշը:
Կա՞ն մարդիկ, որ հավատում են այս հեքիաթային պնդմանը: Եթե այո, այնուամենայնիվ, անպայման կարդացեք Օրուելի «Անասնաֆերման» և դա արեք հենց այսօր, որովհետև վաղը կարող է պարզվել, որ վարչապետի դստեր սպասարկման համար ինքնաթիռ է անհրաժեշտ: 

 Հայկ  Դավթյան