Դուք այնքան ապազգային եք, որ համաձա՞յն եք ադրբեջանցիներն ապրեն Արցախում.թեժ բանավեճ (video)

Տիկին Աննա Հակոբյանը հայուհիներին կոչ անելու, հայուհու անունից խոսելուց առաջ դեռ պետք է հայուհուն համարժեք կեցվածք ունենա: Եթե ուզում եք իմանալ՝ նա դեռ շատ հաց ու պանիր պետք է ուտի, որպեսզի կարողանա հայուհիներին կոչով դիմի, Անժելա Թովմասյանի՝ «Արմնյուզ» ՀԸ հեռարձակվող հեղինակային «Հայելու առաջ» հաղորդաշարի ժամանակ ասել է Երևանի ավագանու նախկին անդամ Սոնա Աղեկյանը՝ անդրադառնալով վարչապետ Նիկոլ Փաշինյանի ու իր տիկնոջ՝ Աննա Հակոբյանի կոչին՝ ամանորյա տոնն անցկացնել Հանրապետության հրապարակում՝ մոռանալով խոզի բուդը, բլինչիկն ու նման ուտեստները:

Հաղորդման մյուս հյուրի՝ հասարակական ու քաղաքական գործիչ Վոլոդյա Հովհաննիսյանի դիտարկմամբ էլ՝ Նիկոլ Փաշինյանն ու Աննա Հակոբյանն իրենց կոչով փորձում են ժողովրդին կտրել ազգային ավանդույթից. «Ազգային ավանդույթից կտրելուց բացի, Նիկոլ Փաշինյանը ստորություն է անում՝ ամանորյա ծախսերի համար նախատեսված գումարն անհայտ է, թե ուր է գնում, քանի որ նախկին քաղաքապետ Տարոն Մարգարյանի գնած տոնածառն է, Տարոնի խաղալիքներն են»:

Հասարակական ու քաղաքական գործիչ Ազատ Արշակյանն էլ կարծում է, որ պետք է վերջ տալ որկրամոլությանը. «Աննա Հակոբյանի ու Նիկոլ Փաշինյանի հրավերը Ամանորը նշել Հանրապետության հրապարակում ճիշտ է»:

Խոսելով երկրում տիրող սոցիալական վիճակի, քաղաքացիներին հատկացվող թոշակի ու աշխատավարձերի մասին՝ Վոլոդյա Հովհաննիսյանը շարունակում է պնդել, որ սպաների աշխատավարձերը չեն բարձրացել, մինչդեռ հանցավոր ճանապարհով բարձրացվել է նախարարների աշխատավարձերը: Ազատ Արշակյանն էլ անմիջապես հակադարձեց, ասելով, որ իր որդին ևս զինվորական է ու իր որդու աշխատավարձը բարձրացել է:

Սոնա Աղեկյանն էլ նշել է, որ ինքը բոլոր զինվորականների անունից ունի նամակ, որի համաձայն՝ զինվորականների աշխատավարձերից 5 հազար դրամ ամեն ամիս փոխանցվում է Աննա Հակոբյանի հիմնադրած ֆոնդին:

Անդրադառնալով դատաիրավական համակարգի նկատմամբ իրականացվող քայլերին ու ՍԴ դատավոր-անդամներին վաղաժամ թոշակի ուղարկելու օրենքին՝ Ազատ Արշակյանն ասել է, որ դեռ հեղափոխության օրերին պետք էր կասեցնել բոլոր դատավորների իրավունքներն ու նոր դատաիրավական համակարգ ձևավորել: Ըստ Արշակյանի՝ դա կլիներ հեղափոխության օրենքով և նման բան չանելը հեղափոխության կոպիտ բացթողումն էր:

Վոլոդյա Հովհաննիսյանն էլ նշում է, որ այս իշխանությունն Արցախը վաճառելու, իրենց կոռուպցիոն ու հակապետական գործունեության համար պետք է ունենա Սահմանադրական դատարանի կողմից թույլտվություն, որը բնականաբար այս ՍԴ-ի կողմից չի ստացել. «Սահմանադրական դատարանը դարձել է մեր պետականության հիմքը»: