Գործընթացը սկսված է, ամեն ինչ դեռ առջեւում է…
Իշխանական կուլիսներում ծածուկ չարախոսում են Սերժ Սարգսյանին առաջադրված մեղադրանքի մասին, անեկդոտներ են հյուսվում, փաստորեն, հեչ էլ թալանչի չէր նախկին ղեկավարը, ընդամենը 500 միլիարդ դրամի յուրացում է կատարել:
Սերժ Սարգսյանին առաջադրված մոտ կես միլիարդ դրամ գումարի հափշտակությունը կազմակերպելու մեղադրանքը Հանրապետականը «քաղաքական հետապնդման աղաղակող դրսևորում» է համարում, իշխանությունը՝ խայտառակություն: Իհարկե, այդ մասին բացահայտ չեն խոստովանում, բայց թե գործադիր, թե օրենսդիր մարմիններում բոլորի քննարկման թեման եղել է Սերժ Սարգսյանն ու նրա նկատմամբ իշխանության մեծահոգությունը:
Իմ Քայլի պատգամավորներն այսօր խուսափում էին հրապարակային կարծիքներ հայտնել, կրկնում էին միայն գրեթե նույն տեքստը՝ չի կարող խոսք լինել քաղաքական հետապնդման մասին, իսկ առաջադրված մեղմ մեղադրանքի առթիվ չարախնդողներին հորդորում էին սպասել, ամեն ինչ առջեւում է:
Հետաքրքրական էր նաեւ խորհրդարանական ընդդիմության դիրքորոշումը այս առնչությամբ: Գևորգ Պետրոսյանը չբացառեց, թե Սերժ Սարգսյանը քաղաքական հետապնդման է ենթարկվում՝ մասնավորապես իր քննադատական հայտարարությունների պատճառով։ Այդ մասին նա հայտարարեց լրագրողների հետ զրույցում.
«Էնտեղ հնչեցին մեր իրավական անվտանգության խնդիրներ։ Բնական է, դա չէր կարող իշխանության քիմքին հաճելի լինել, բայց ես նորից եմ ասում՝ ես, լինելով մասնագիտությամբ իրավաբան, չեմ կարող հիմա այդպիսի պատասխանատու պնդում անել, որ Սերժ Սարգսյանի նկատմամբ քրեական գործի հարուցումը պայմանավորված է բացառապես քաղաքական շարժառիթներով։ Դա չի բացառվում, բայց այդպիսի պնդում անելու համար դու պետք է իրազեկված լինես, ես այդպիսի տեղեկատվություն չունեմ», - հայտարարեց պատգամավորը։
«Լուսավոր Հայաստան» խմբակցության ղեկավար Էդմոն Մարուքյանը քաղաքական հետապնդման տարր Սերժ Սարգսյանի մեղադրանքում չի տեսնում։ Մարուքյանը ՀՀԿ-ին կոչ արեց խոսել բուն մեղադրանքից, ոչ թե սոցցանցերում բողոքել Սերժ Սարգսյանի կառավարման տարիներին գյուղնախարար աշխատած Սերգո Կարապետյանից, թե նա Սերժ Սարգսյանի դեմ ցուցմունք տվեց, ուրեմն դավաճան է։
«Մեղադրանքից խոսեք, ասեք՝ եղե՞լ է, թե՞ չի եղել, թե չէ քաղաքական հետապնդման տարրն էդտեղ ո՞րն է, ազատորեն խոսում են, ազատորեն զբաղվում են քաղաքականությամբ և կշարունակեն զբաղվել, որովհետև, ըստ էության, նաև խափանման միջոցն ընտրված է ստորագրություն չհեռանալու մասին միայն, այսինքն՝ կալանավորման մասին խոսք էլ չկա, մինչդեռ մի մեծ ցնցում էր, աղմուկ էր, որ հայ-հույ կալանավորում են, կալանավորում են, մեկ էլ հոպ, տեսան, որ չեն էլ կալանավորել։ Կարծում եմ, որ էտտեղ քաղաքական հետապնդման որևէ տարր չկա, և այդ գնահատականները քաղաքականացնելու, բնականաբար, միտումնավոր են, և պարզ է, որ պաշտպանական տակտիկան էտպիսին է լինելու», - ասաց Մարուքյանը։
Վերջինս աբսուրդ է որակում Սերժ Սարգսյանին առաջադրված մեղադրանքից հետո արտախորհրդարանական Հանրապետականի հայտարարության մեջ տեղ գտած ձևակերպումը, թե այսօրվա իշխանությունն ավտորիտար է։
Անի Սահակյան
Հետևեք մեզ Viber-ում
