Հետողորմեա. ինչ պլան ունի Փաշինյանը ԱԱԾ-ի եւ ոստիկանության համար

Խորհրդարանը մերժեց Լուսավոր Հայաստանի աղմկահարույց նախագիծը:
«Լուսավոր Հայաստան»-ն առաջարկել էր օրենսդրական փաթեթ, որով ԱԱԾ տնօրենի և ոստիկանապետի պաշտոնում կարող են նշանակվել անձինք, ովքեր նախկինում չեն աշխատել համակարգում և բավարարում են պատգամավորներին առաջադրվող պահանջներին։ «Իմ քայլը» խմբակցությունն ավելի վաղ դրական էր գնահատել այս փոփոխությունները, սակայն փաթեթը սեպտեմբերից սկսած երկրորդ ընթերցմամբ չէր ընդունվում։ Այսօր էլ հակառակ նախագծի հեղինակների հիշեցումների՝ մեծամասությունը չընդգրկեց օրակարգ եւ այն դուրս եկավ շրջանառությունից:

Մարուքյանը մինչ այդ հիշեցրեց, որ իշխող դաշինքի պատգամավորները սկզբից գովաբանում էին, անգամ ԱԺ նախագահ Արարատ Միրզոյանն էր հիացած նախագծով եւ այդ մասին չթաքցրեց իր ելույթում: Մարուքյանը նշեց, որ իրենք համաձայնել են այդ պաշտոններին պաշտպանության նախարարությունից անձանց նշանակման առաջարկությանը, բայց այդպես էլ անհրաժեշտ համատեղ քննարկումներ չկազմակերպվեցին: Իր հերթին, Պետաիրավական հարցերի հանձնաժողովի նախագահ, «Իմ քայլը» դաշինքի պատգամավոր Վլադիմիր Վարդանյանն ասաց, որ Ազգային անվտանգության ծառայությունը եւ Ոստիկանությունը իրականում լուրջ բարեփոխումների կարիք ունեն, բայց դրա համար ժամանակ եւ զգույշ մոտեցում է պետք։
«Մենք փորձում ենք գտնել լուծումներ, որոնք, նախ, կլինեն սահմանադրական, երկրորդ՝ չեն խափանի համակարգը»: Արտահերթ ելույթով հանդես եկավ նաեւ Արարատ Միրզոյանը: Իրենց դիրքորոշումը բացատրեց նրանով, որ օրինագծի ներկայացված տարբերակը հակասել է Սահմանադրությանը, ինչը, նրանց կարծիքով, անթույլատրելի է։
Նշենք նաեւ, որ այս օրենսդրական նախաձեռնությունը ոչ միանշանակ արձագանք է առաջացրել ինչպես «Բարգավաճ Հայաստան» կուսակցության պատգամավորների, այնպես էլ փորձագիտական հանրույթի շրջանում։

Սակայն իշխանականները մոտ մեկ ամիս առաջ այնպես էին պաշտպանում, ասես իրենք էին գրել-տվել Լուսավորի ձեռքը: Ըստ ամենայնի՝ ԱԱԾ տնօրենի եւ ոստիկանապետի ժամանակավոր պաշտոնակատարները հաջողությամբ են անցել քննությունը եւ կնշանակվեն այդ պաշտոնում, այդ պատճառով էլ իշխանությունը նահանջեց: Հիմա մնում է հասկանալ՝ կունենա այդքան բարոյականություն ետ վերադարձնելու նաեւ ոստիկանության պետի նախկին տեղակալ Հովհաննես Քոչարյանին, ում աշխատանքից ազատեցին այս նախագծի պատճառով: Այդ մասին անգամ պաշտոնապես հաստատվեց՝ վարչապետի խոսնակի մակարդակով: Քոչարյանն էլ դեմ էր արտահայտվել համակարգին վերաբերող նախագծին ու հայտնվել իշխանության թիրախում: Հիմա երբ դիրքորոշումները համընկնում են առնվազն անարդար կլինի նրան չվերադարձնելը:

Անի Սահակյան