Ձախողման մեխանիկա

«Տաշիր գրուպ» ընկերության նախագահ Սամվել Կարապետյանի եղբորորդու՝ Նարեկ Կարապետյանի և գործարար Վահե Պարազյանի միջև տեղի ունեցած միջադեպի գործով` Սամվել Կարապետյանին Քննչական կոմիտեն ծանուցում է ուղարկվել հարցաքննության հրավիրելու վերաբերյալ:
Քննչական կոմիտեից հայտնեցին, որ Սամվել Կարապետյանը, սակայն, հայտնել է, որ ինքը գտնվում է ՌԴ-ում եւ չի կարող ներկայանալ, բացի այդ, ցանկանում է օգտվել Սահմանադրության իր իրավունքից եւ հրաժարվել է ցուցմունք տալուց:

Հիշեցնենք, որ դեռեւս այս տարվա հուլիսին առանձնապես խոշոր չափերով շորթման մեղադրանք է առաջադրվել ռուսաստանաբնակ միլիարդատեր Սամվել Կարապետյանի եղբորորդուն՝ Նարեկ Կարապետյանին:Նրա նկատմամբ խափանման միջոց է ընտրվել ստորագրությամբ չհեռանալը: ՔԿ վարույթում քննվող քրեական գործով Սամվել Կարապետյանին հարցաքննելու ցուցում էր տվել դատախազությունը: Նարեկ Կարապետյանն էլ լրատվամիջոցների հետ զրույցում հերքել էր իր մասնակցությունը որևէ նման միջադեպի՝ ասելով, որ իրեն ուղղված մեղադրանքները բանսարկություն են:
Իշխանության մոտ խրոնիկ է դառնում կիսատ-պռատ, մեկ հոգու ցուցմունքի վրա քրեական գործի հարուցում, որը ոչ թե արդյունք, այլ սոսկ էֆեկտ  ունենում: 

Դեռեւս անցած տարի արտերկրում գտնվող Ռոբերտ Քոչարյանին էլ վկայի կարգավիճակում կանչեցին հարցաքննության, մեծ քննարկում ծավալվեց, ընդհուպ իշխանականները համացանցային դիսկուրսով այսպես ասած՝ քվեարկություն էին իրականացնում՝ կներկայանա", թե ոչ, ներկայանալուն պես կարգավիճակը փոխեցին ու ձերբակալեցին երկրորդ նախագահին:

Հարցաքննության կանչելու, կալանքի որոշում է կայացվել մի շարք նախկինների վերաբերյալ, որոնք այժմ էլ գտնվում են Ռուսաստանում ու ցանկություն չունեն վերադառնալ: Օրերս էլ Գեւորգ Կոստանյանի նկատմամբ հետախուզում հայտարարվեց, մինչդեռ ամիսներ առաջ նա ներկայացել, հարցաքննվել էր եւ կարող էին հենց այդ ժամանակ հարցը լրջացնել, լուծել: Բայց իրավական գործընթացները վերսկսվեցին, երբ նա այլեւս Հայաստանում չէ ու այդկերպ ավելի է լայն քննարկում ծավալվեց նրա շուրջ: Բոլոր դեպքերում էլ հանրությունը տեւական ու բուռն քննարկում է ունենում, բայց մեծ աղմուկին հաջորդում է դատարկությունը ու պարզ է դառնում, որ երկու դեպքում էլ՝ թե ձերբակալվածների, թե Հայաստան չվերադարձող  եւ իրավապահ մարմիններին ներկայանալ չցանկացողների քրեական գործերի, գործ ունենք ոչ իրավական, հիմնազուրկ գործերի հետ: Ասվածն անհերքելիորեն ապացուցվեց ինչպես Ռոբերտ Քոչարյանի դեպքում, այնպես էլ Կոստանյանի, ով իրեն առնչվող գործը իրավաբանորեն ջախջախեց: Մյուսների փաստաբանները նույնպես նմանատիպ հայտարարություններ են անում: Ստացվում է, որ իշխանությանը ոչ այնքան արդյունքն է հետաքրքիր, որքան էֆեկտը, որ հանրությունը, խոսի, քննարկի, թե այսինչին էլ են կանչել հարցաքննության, երկրորդի նկատմամբ հետախուզում հայտարարել եւ այսպես շարունակ:

Անի Սահակյան