Կաշառք հրաժարականի դիմաց
Այսօր Պետաիրավական հանձնաժողովը քննարկում է այն նախագիծ, որը այլ կերպ, քան քաղաքական կոռուպցիա, շանտաժ անվանել հնարավոր չէ։
Սահմանադրական դատարանի անդամները համառ դուրս եկան ու ո՛չ դատարանների շրջափակումից, ո՛չ ասֆալտներին ծեփվելուց հետո, հրաժարական չեն տալիս, ուստի իշխանությունը որոշել է նրանց վաղաժամ թոշակի ուղարկել, այսպես ասած՝ կաշառել, չի բացառվում՝ շանտաժով ուղարկել թոշակի։ ՍԴ անդամներին օրենքով առաջարկում են՝ կամավոր հրաժարական տվեք ու հարկատուների հաշվին մինչեւ ձեր լիազորությունների ավարտը, տարիներով տանը նստած՝ ձեր աշխատավարձը կստանաք։ ԲՀԿ-ական Գեւորգ Պետրոսյանը հարցրեց նախագծի զեկուցող արդարադատության նախարարից՝ սա դատավորների վիճակը վատթարացնո՞ղ, թե՞ բարելավող նախագիծ է։ Պատգամավորը հետաքրքրվեց՝ ի՞նչ չափանիշներով են ընտրվել հենց ՍԴ դատավորները, ինչո՞ւ, օրինակ, նույն կանոնը չեն ցանկանում կիրառել Վճռաբեկ, Վերաքննիչ դատարանների դատավորների նկատմամբ: «Հիմա, օրինակ, ես էլ կուզեի իմ չորս տարիների աշխատավարձը միանգամից տային ու ես գնայի ըմբոխշնեի ձմեռային Հայաստանի տարբեր գեղատեսիլ վայրերում: Դուք հարկատուների հետ զրուցե՞լ եք, նրանք պատրա՞ստ են աշխատանք չկատարող դատավորին կերակրել: Եվ չե՞ք կարծում, որ սրանով մենք աղճատում ենք կենսաթոշակի ինստիտուտը: Որ ասում ենք «Սահմանադրական դատարանի ճգնաժամ», խնդրում եմ ասեք, թե ի՞նչ ճգնաժամի մասին է խոսքը»,- շարունակեց Գևորգ Պետրոսյանը:
«Ճգնաժամ ասելով հասկանում ենք, որ մենք սահմանադրական փոփոխությունները քննարկելիս 2015 թվականին ասել ենք, որ ՍԴ-ի մոդելը սխալ է, ուստի անդամներին առաջադրող մարմինները պետք է լինեն երեքը՝ դատավորների ընդհանուր ժողովը, կառավարությունը և ՀՀ նախագահը: Սակայն այդ մոդելը կյանքի չի կոչվել, քանի որ ՍԴ անդամների ճնշող մեծամասնությունը արդեն իսկ պաշտոնավարում էին որպես ՍԴ դատավորներ: Մենք չենք աղճատում կենսաթոշակի ինստիտուտը, նրանք կամավոր կարող են անցնել կենսաթոշակի: Ինչ վերաբերում է հարկատուներին, ապա ինքս տարբեր ոլորտներում եմ աշխատել և շատ լավ գիտեմ հարկատուների վերաբերմունքն իրենց վճարած հարկերին: Որոշակի առումով մտահոգություններ առաջացնում է, սակայն հանրությանը տալ հաջորդ հարցը`իրենք որքան են պատրաստ հարկ վճարել և աշխատավարձ տալ այն պաշտոնատար անձանց, որոնք նկատմամբ վստահությունը ցածր է»,- եղավ նախարարի պատասխանը:
Գեւորգ Պետրոսյանի մոտ նախարարի պատասխանը նոր հարցեր առաջ բերեց՝ «Այդ ինչպե՞ս եք ստուգել. եթե այդպես է ժողովուրդը բոլոր դատավորներին չի վստահում, դրեք բոլորին հեռացրեք: Եթե մենք դժգոհության տեսանկյունից նայենք, ապա բոլոր պետական մարմիններից ժողովուրդը դժգոհում է: Հիմա, եթե ՍԴ դատավորներն անվստահություն են ներշնչում, դրախտի «ուղեգի՞ր» եք տալիս»:
Քննարկման ողջ ընթացքում մի շարք օբյեկտիվ հարցադրումներ հնչեցին ի մասնավորի, թե այդ որ որոշումն է, որի պատճառով ՍԴ անդամները չեն վայելում հանրության վստահությունը։ Հեղափոխությունից հետո այդ ինչ ոչ օբյեկտիվ որոշում է ընդունել ՍԴ-ն, որը անվստահություն է առաջացրել։ Սակայն իմքայլականները բոլոր հարցադրումներին զրո պատասխան ունեին։ Իրականում ակնհայտ է, որ խնդիրը ՍԴ նախագահն է, որի դեմ ամիսներ շարունակ գործի էր դրվել պետական ողջ մեքենան՝ ԱԱԾ, Քննչական, ԱԺ, սակայն ապարդյուն, որեւէ կոմպրոմատ հնարավոր չեղավ գտնել ՍԴ նախագահի դեմ, որը պատճառ կդառնար նրա հրաժարականի։ Հիմա որոշել են ողջ ֆրոնտով պայքարել եւ առաջարկում են փող հրաժարականի դիմաց։
Անի Սահակյան
Հետևեք մեզ Viber-ում
