Ի՞նչ եղավ Արշակունյացի հանգույցը, էն որ Հայկ Մարությանն ու Արթուր Մեսչյանը մակետը դրած սեղանին տարբեր կողմերից նկարվում էին.Թեհմինա Վարդանյան (video)

Երևանի ավագանու «Իմ քայլ»-ը խմբակցության անդամ Արմեն Գալջյանն ու «Լույս» խմբակցության անդամ Թեհմինա Վարդանյանը Անժելա Թովմասյանի՝ «Արմնյուզ» ՀԸ եթերում հեռարձակվող հեղինակային «Հայելու առաջ» հաղորդաշարի ժամանակ անդրադարձել են Երևանի 2020թ. բյուջեի նախագծի շուրջ բարձրացված աղմուկին:

Նախագիծը, երբ դրվել է հանրային քննարկման, Երևանի ավագանու ընդդիմադիր ուժերն այն միանգամից քննադատության են արժանացրել, մինչդեռ ավագանու «Իմ քայլը» խմբակցության անդամներն այլ կարծիք ունեն բյուջեի նախագծի հետ կապված: Արմեն Գալջյանի խոսքով՝ բյուջեին գնահատական տալու համար, պետք է համեմատություններ անցկացնել նախորդ տարիների բյուջեի հետ: Ըստ նրա՝ թվերը ցույց են տալիս, որ այս տարի Երևան քաղաքի բյուջեն աննախադեպ աճ է գրանցելու՝ 83 միլիարդից դառնալու է 107 միլիարդ դրամ:

Թեհմինա Վարդանյանը հարց է բարձրացնում՝ արդյոք 107 միլիարդը քաղաքային իշխանության ձեռքբերումն է: Ըստ Վարդանյանի՝ ոչ, և պետք է ազնիվ գտնվել ու հայտարարել՝ ինչպես է կուտակվել այդ գումարը: Սակայն Թեհմինա Վարդանյանը ևս կիսում է տեսակետը, որ բյուջեն աննախադեպ է, բայց այլ պատճառով է աննախադեպ, քանի որ բյուջեի դեֆիցիտը երբեք 9 միլիարդ 112 միլիոն չի եղել.«Նախորդ տարիների համեմատ թերծախսեր չեն եղել: Մենք ունենք 7 միլիարդից ավել մնացորդ, որն անվանում են տնտեսում»:

Թեհմինա Վարդանյանն այս հանգամանքը զավեշտալի է համարում, քանի որ նշում է, որ այդ տնտեսումը եղել է նրա հաշվին, որ, օրինակ՝ 200 մետր ասֆալտի փոխարեն արվել է 100 մետր ասֆալտ, ինչը նշանակում է, որ դա ամենևին էլ տնտեսում չէ:

Խոսելով հնգամյա ծրագրից՝ Թեհմինա Վարդանյանն ուշադրություն է հրավիրել այն հանգամանքին, որ այդ ծրագրում չկա գեթ մեկ վերելակի վերակառուցում, հանգույցի կառուցում. «Հիշու՞մ եք՝ քաղաքապետն ու գլխավոր ճարտարապետը սեղանին դրել էին Արշակունյաց պողոտայում սպասվելիք բացվող հանգույցի մակետը, մեկ այս կողմից էին նկարվում, մեկ այն կողմից: Հիմա հարց՝ ի՞նչ եղավ հանգույցի կառուցումը»: Թեհմինա Վարդանյանի դիտարկմամբ՝ նայելով հնգամյա ծրագրին՝ հույսը մնում է Աստված, որ այդ հարցերը կլուծի:

Արմեն Գալջյանն էլ հակադարձել է՝ նշելով, որ իրականում ծրագրում կան վերելակների կառուցման, վերակառուցման զարգացման կետեր, և պետք չէ սպասել, որ մեկ տարում փոխվելու է 3000 վերելակ:

Թեհմինա Վարդանյանը հիշեցրել է, որ երբ «Ելք» խմբակցության քաղաքապետի թեկնածուն Նիկոլ Փաշինյանն էր, նա նշում էր, որ Երևան քաղաքի նստարանների ձեռքբերման գործընթացում կարող է լինել կոռուպցիա. «Այդ նստարաններն արժեին 65-70 հազար դրամ, իսկ Տարոն Մարգարյանը դրանք ձեռք էր բերում մոտ 160 հազար դրամով: Այսօր, այդ նստարանները մենք ձեռք ենք բերում 164 հազար դրամով, ստացվում է, որ կա՛մ Տարոն Մարգարյանը կոռուպցիայի մեջ թաթախված չէր, կամ էլ Հայկ Մարությանն է այսօր կոռուպցիայով զբաղված»:

Արմեն Գալջյանն էլ արձագանքել է, որ նախկինում կային բավարար հիմքեր՝ Տարոն Մարգարյանին կոռուպցիայի մեջ մեղադրելու մեջ, մինչդեռ այսօր նման հիմքեր չկան: Ըստ նրա, եթե Հայկ Մարությանը Նիկոլ Փաշինյանի քաղաքական թիմակցին է, ուրեմն բացառված է, որ նա կոռուպցիայի մեջ ներգրավված լինի: