Ով կարող է բացատրել՝ ի՞նչ է առաջարկել Փաշինյանը՝ Ալիևին
Հայաստանի վարչապետ Նիկոլ Փաշինյանը ասուլիս է անցկացրել ռուս լրագրողների համար, որի ընթացքում անդրադարձել է Լեռնային Ղարաբաղի հակամարտության կարգավորման հարցին՝ ընդգծելով, որ կարգավորումը պետք է ընդունելի լինի երեք ժողովուրդների համար:
«Եթե Ադրբեջանի նախագահը հանդես գա նույնպիսի հայտարարությամբ, ապա դա կնշանակի, որ մենք հնարավորություն ունենք բանակցային գործընթացում գրանցել իրական բեկում»,- ասել է Փաշինյանը:
Նա նշել է, որ իրավիճակն այլ կլիներ, եթե բոլորի համար ընդունելի լուծումներ լինեին, բայց առայժմ այդպիսիք չկան: Փաշինյանը նաև ընդգծել է, որ իր կողմից առաջարկված բանաձևը տարբերվում է իր նախորդների հակամարտության կարգավորման տարբերակից, և խորհուրդ է տվել կարգավորման իր տեսլականը չկապել նախկին նախագահների՝ ղարաբաղցիներ Ռոբերտ Քոչարյանի և Սերժ Սարգսյանի նկատմամբ իր վերաբերմունքի հետ:
Ահա, կրկին Փաշինյանը վստահեցնում է, որ կարգավորման հարցում իր տարբերակը տարբերվում է նախորդներից: Նա այս մասին արդեն երկրորդ անգամ է հայտարարում, մի անգամ էլ նա նշել էր, թե ինքը սկսում է իր կետից, ոչ թե Սերժ Սարգսյանի:
Բայց ո՞րն է Փաշինյանի կողմից առաջարկված բանաձևը... Հարցը սրանում է: Դա ոչ ոք չգիտի:
Իրապես, խառնաշփոթ է Փաշինյանի պատկերացումներում: Մեկ նա հայտարարում է, թե բոլոր բանակցություններում օրինակ բարձրացնում է Վիեննայի և Սանկտ Պետերբուրգի պայմանավորվածությունների հարցը, այսինքն՝ սահմանային միջադեպերի վերահսկողության հարցը, որ սրվեց 2016թ. ապրիլյան պատերազմից հետո:
Ապա նա հայտարարում է, թե իր «կետը ունի»:
Իր կետում, Փաշինյանն ունի՞ Արցախի ինքնորոշման սկզբունքը...
Զոհրաբ Մնացականյանն անվերջ հայտարարում է, թե Հայաստանի համար առաջնահերթ է Արցախի անվտանգությունն ու կարգավիճակը: Բայց չեն բացվում փակագծեր՝ ինչպե՞ս, ինչ սկզբունքներով:
Կամ՝ ո՞վ ասաց, որ դրանք նորամուծություն են հայկական կողմի համար և նախկինում այդ հարցերը դրված չեն:
Հիմա Փաշինյանն ասում է՝ «իր առաջարկած բանաձևը»: Ընդամենը օրեր առաջ ՀՀ ԱԳՆ մամլո խոսնակն ասաց, որ կոնկրետ փաստաթուղթ չի քննարկվում: Հիմա՝ Փաշինյանն ասում է՝ «իր առաջարկած բանաձևը»:
Որևէ մեկն, առհասարակ, կարո՞ղ է բացատրել՝ ո՞րն է հայկական կողմի բանաձևը:
Հետևաբար, ո՞վ կարող է բացատրել՝ ի՞նչ է առաջարկել Փաշինյանը՝ Ալիևին, բացի այն հրապարակային հայտարարությունից, որ կարգավորումը պետք է ընդունելի լինի Արցախի, Հայաստանի և Ադրբեջանի ժողովուրդների համար:
Թամար Բագրատունի
Հետևեք մեզ Viber-ում
