Լիսկայից ինչով եք տարբերվում

Երկու ամիս առաջ Եղեգնաձորում դաժան ծեծի ենթարկված փոխգնդապետ Արա Մխիթարյանը դեռ դուրս չի եկել կոմայից եւ կյանքի ու մահվան արանքում կռիվ է տալիս, բայց իշխանություններին դա չխանգարեց ջրից չոր դուրս հանել Վայոց Ձորի արդեն նախկին մարզպետ Տրդատ Սարգսյանին, ով համաձայն տուժող կողմի ցուցմունքների առնվազն ներկա է եղել իր օգնականի կողմից բանակի սպայի նկատմամբ բարբարոս գործողություններին: Քննչական կոմիտեն մինչդեռ այսօր հաղորդեց, որ մարզպետը միջադեպին ներկա չի եղել, դրա մասին պարզել են իրավապահները կատարված աշխատանքների արդյունքում: Սուտ է: Այսպես է արձագանքել սպայի եղբայր Կարեն Մխիթարյանը տարածված հաղորդագրությանը: «Եթե 4 սպաների խոսքը օրենքով չի անցնի, ուրեմն հալալ լինի էդ քննչական կոմիտեին էլ, էս հայկական օրենքին էլ: Թող իրենք իրենց օրենքով շարժվեն, մենք՝ մեր օրենքով: Սպաները մարզպետի հետ կանգնած զրուցել են նույնիսկ, նա ներկա է եղել ու չի կանխել ծեծկռտուքը»,- News.am-ին փոխանցել է փոխգնդապետի եղբայրը` շեշտելով, որ դեպքին ականատես 4 սպաներն էլ ցուցմունք են տվել, որ մարզպետը դեպքի վայրում է եղել:

Արդեն 2 ամիս կոմայի մեջ գտնվող փոխգնդապետի եղբայրն ասաց, որ նախկին մարզպետ Տրդատ Սարգսյանը ոչ մի անգամ չի հետաքրքրվել իր եղբոր առողջական վիճակով: Դեպքից ուղիղ 2 ամիս անց եղբոր վիճակում փոփոխություն չկա, այն շարունակում է մնալ ծայրահեղ ծանր: Հիշեցնենք, որ ՊՆ փոխգնդապետ Արա Մխիթարյանի դաժան գործով մեղադրանք է առաջադրվել Վայոց Ձորի նախկին մարզպետի օգնական Հարություն Գրիգորյանը։ Ավելի ուշ, որպես մեղադրյալ ներգրավվեց նաեւ Գրիգորյանի եղբայրը՝ Զավեն Գրիգորյանը։ Երկուսն էլ կալանքի տակ են։ Քննչական կոմիտեն առգրավվել է նաեւ դեպքի վայրի տեսախցիկները՝ մարզպետ Տրդատ Սարգսյանի մասնակցությունը միջադեպին ստուգելու համար: Միջադեպից մեկ շաբաթ անց Տրդատ Սարգսյանը հրաժարական տվեց Վայոց ձորի մարզպետի պաշտոնից: Նախ հարց է առաջանում՝ եթե անմեղ էր, ապա ինչու հրաժարական տվեց, ի վերջո, իշխանությունը, ինչպես Նիկոլ Փաշինյանն է վստահեցնում, որեւէ անգամ չի միջամտել ու չի միջամտելու իրավապահների աշխատանքներին: Իսկ եթե ընդառաջ են գնացել հանրային պահանջին, ապա ինչու հրաժարական չեն պարտադրում նաեւ Կրթության գիտության նախարար Արայիկ Հարությունյանին, այլ ճիշտ հակառակը, Փաշինյանը հասցրել է տարբեր ամբիոններից իր պաշտպանության տակ վերցնել նախարարին եւ հանրությանը հորդորել մոռանալ այդ պահանջը: Տպավորություն է, որ հեղափոխականներն առանձնակի եռանդով եւ առանց քաշվելու են իրենց <<հանցագործների>>, աղմկահարույց միջադեպերի կիզակետերում հայտնվածների պաշտպանությամբ զբաղվում, քան նախկիններն էին ժամանակին անում: Բայց նույն իշխանությունից շատերը ժամանակին կոկորդ էին պատռում հանրահայտ Լիսկայի, Ռուբեն Հայրապետյանի մարդկանց բարբարոսությունների մասին, հատկապես, բանակի սպաների նկատմամբ անարգանքին: Հիմա դուք ինչով եք տարբերվում լիսկաներից ու մյուսներից, միայն նրանով, որ ցանկացած ոճիր կարողանում եք հեղափոխության էյֆորիայի տակ մաքրագործեք ու վախեցնեք հանրությանը նախկիններով, հավատացեք, անպատժելիության այս մթնոլորտի շարունակության դեպքում մարդիկ հասկանալու են, որ դուք ոչ միայն չեք տարբերվում, այլ որոշ դեպքերում նույնիսկ ավելի վատն եք, քանզի բացահայտ լծվում եք նմաններին արդարացնելու գործին:

Անի Սահակյան