Երևանի բյուջեի դեֆիցիտի ֆանտաստիկ աճը

Երևանի քաղաքապետարանի պաշտոնական քարոզչությունը թմբկահարում է Երևանի 2020 թ.-ի բյուջեի աննախադեպ աճը:

«Երևանի 2020-ի բյուջեն աննախադեպ աճ է գրանցում. 2019-ի համեմատ բյուջեի եկամտային մասը շուրջ 24 մլրդ դրամով ավելի կլինի։ Ընդ որում, այս տարի առաջին անգամ քաղաքի եկամուտները գերազանցում են 100 միլիարդի սահմանագիծը, իսկ սեփական եկամուտներն ավելանոմ են շուրջ 5 միլիարդով:
Որպեսզի ավելի հասկանալի լինի աճի դինամիկան՝ նշեմ, որ 2010-2019թթ. բյուջեի եկամտային մասն ավելացել է +34,415 միլիարդով, իսկ միայն 2019-2020 թվականներին՝ +23,920 միլիարդով»,- ֆբ էջում գրել է Երևանի քաղաքապետի մամուլի խոսնակ Հակոբ Կարապետյանը:
Լայնորեն գովազդելով մայրաքաղաքի բյուջեի աննախադեպ եկամուտները` խոսնակը անտեսել է բյուջեի մյուս երիկու կարևոր ցուցանիշները` ծախսերն ու դեֆիցիտը: Դրանց էլ իր հերթին անդրադարձել է Երեւանի ավագանու «Լույս» խմբակցության անդամ Դավիթ Խաժակյանը: Նա ֆեյսբուքյան իր էջում գրել է․ «Որպեսզի պատկերացնեք, թե ինչքան հետադիմական և անարդյունավետ բյուջե է նախագծել Երևանի քաղաքապետարանը 2020 թվականի համար ներկայացնում եմ երկու թիվ․
1․ Ներկայացված նախագիծը վերջին 5 տարիների կտրվածքով նախատեսում է ամենամեծ դեֆիցիտը (պակասուրդը), որը կազմել է շուրջ 9 միլիարդ դրամ։ Թե հատկապես ինչու է սա վատ առաջիկայում մանրամասն կներկայացնեմ։
2․ Աշխատավարձային ֆոնդը աննախադեպ ուռճացվել է՝ հասնելով սեփական եկամուտների շուրջ 40%-ին։ Սա նշանակում է, որ մենք մոտեցել ենք այն ցուցանիշին, երբ հավաքագրված գումարի գրեթե կեսը ծախսվում է ադմինիստրացիայի ծախսերի վրա, իսկ մյուս կեսը քաղաքի խնդիրների։ 40%-ը անընդունելի մեծ ցուցանիշ է։
Մնացածը հաջորդիվ»։
Համեմատությա համար նշենք, որ 2019 թվականին Երևանի բյուջեի դեֆիցիտը կազմել է 1 մլրդ 269 մլն դրամ, իսկ եկամուտները եղել են 83 մլրդ 77 մլն դրամ: Այսինքն` դեֆիցիտը կազմել է բյուջեի մուտքերի մոտ 15 տոկոսը: Իսկ Երևանի 2018 թվականի բյուջում դեֆիցիտը ընդամենը 48 մլրդ դրամ է կազմել, այն դեպքում, երբ եկամուտները պլանավորված են եղել 80 մլրդ 189 մլն դրամ: Այսինքն` դեֆիցիտը կազմել է մուտքերի ընդամենը 6 տոկոսը: Մինչդեռ 2020 թ. Երևանի բյուջեում դեֆիցիտը պլանավորված է 9 մլրդ 112 մլն դրամ, այսինքն` եկամուտների 20 տոկոսը:
Ինչպես տեսնում ենք` աննախադեպ է ոչ միայն եկամուտների, այլ նաև ծախսերի և դեֆիցիտի աճը: Նման խայտառակ ծավալի դեֆիցիտ Երևանը երբևէ չի ունեցել: Զուտ թվաբանական տվյալներով, 2019 թվականի համեմատ` դեֆիցիտը աճել է ավելի քան 7 անգամ: Դե իսկ բյուջեի 40 տոկոսը աշխատավարձերին և պարգևատրումներին ուղղելը նշանակում է ընդամենը մեկ բան` երևանցիներն աշխատում են, որ պահեն քաղաքային իշխանություններին:

 Հայկ  Դավթյան