Գևորգ Պետրոսյանի դեմքին, որ նայում ես, երևում է, որ նա իսկական տղամարդ է․բանավեճ Գուրգեն Եղիազարյանի ու Ազատ Արշակյանի միջև(video)
Քաղաքական գործիչներ Ազատ Արշակյանն ու Գուրգեն Եղիազարյանն Անժելա Թովմասյանի՝ «Արմնյուզ» ՀԸ եթերում հեռարձակվող «Հայելու առաջ» հեղինակային հաղորդման ժամանակ անդրադարձան վերջին օրերին Ազգային ժողովում տիրող լարված մթնոլորտին, մասնավորապես՝ «Իմ քայլը» ու «ԲՀԿ» խմբակցության պատգամավորների փոխադարձ մեղադրանքներին ու միմյանց հասցեին ուղղված քննադատություններին։
Ազատ Արշակյանի դիտարկմամբ՝ Գևորգ Պետրոսյանն ինչ-որ բան է թաքցնում, որ ամեն օր խոսում է միասեռականներից. «Միասեռականների խնդիր Հայաստանում չկա։ Մենք, ըստ ավանդությունների, չունենք միասեռականների հարց։ Մեր ժողովուրդը հանդուրժողականության օրինակ է այլ ազգերի համար։ Մենք պարզապես հանդուրժում ենք միասեռականներին, մենք նրանց հերոսներ կամ հակահերոսներ չենք դարձնում»։
Գուրգեն Եղիազարյանը, արձագանքելով վերոնշյալին, նշել է․«Վարչապետի աթոռը զբաղեցրած մարդը Ստամբուլյան կոնվենցիայի փաստաբանն է։ Ինքն ուզում է այս կոնվենցիան վավերացնել տերերի համար, քանի որ խոստացել է նրանց»: Ըստ նրա՝ վարչապետը բացառիկ ստախոս է, ինչն առավելապես արտահայտվեց Փարիզում՝ նրա ելույթում։
Անդրադառնալով Նիկոլ Փաշինյանի երեկվա կոշտ ելույթին, որն ուղղված էր որոշ կոռումպացվածներին ու թալանչիներին, Արշակյանն ասել է, որ Նիկոլ Փաշինյանի ելույթում արտահայտված բառապաշարը սաստող բառապաշար է և այն մարդիկ, որոնց մասին նա խոսում էր, ուրիշ լեզու չեն հասկանում:
Արձագանքելով Արշակյանի մեկնաբանությանը՝ Եղիազարյանը նշել է, թե եթե դա այդպես է, թող վարչապետը քրեական օրենսգրքում ավելացնի «ասֆալտին փռել» բառակապակցությունը։
Դիտարկմանը, թե երբ երբ Նիկոլ Փաշինյանը խոսում է հանցագործների մասին, ինչո՞ւ է թիրախավորում միայն վերջին քսան տարվա հանցագործներին և ավելի հետ չի գնում ու չի խոսում այն մարդկանցից, ովքեր նախկինում ինչ-ինչ գործերում ներգրավված են եղել, սակայն այսօր իր իշխանության մասն են կազմում, Արշակյանը պատասխանել է. «Այն մարդիկ, ովքեր ինչ-որ հանցանքների մեջ են կասկածվում, ապա պետք է պատասխանատվության ենթարկվեն»:
Խոսելով հայ-ռուսական հարաբերություններից՝ Ազատ Արշակյանը նշել է, որ ԵԱՏՄ-ի վերաբերյալ ընդդիմադիր գործիչ Նիկոլ Փաշինյանի հայտարարություններն իր համար շատ ավելի ընդունելի էին, քան վարչապետ Նիկոլ Փաշինյանինը։
Հետևեք մեզ Viber-ում
