Ձվեր նետելու գործ է բացվել
«Մեդիա պաշտպան» նախաձեռնությունը օրերս հայտարարություն էր տարածել, որ Հանրային հեռուստաընկերությունը միակողմանի է անդրադառնում Սահմանադրական դատարանի և նրա նախագահի շուրջ տեղի ունեցող զարգացումներին և կատարում է միակողմանի լուսաբանում: «Հանրային հեռուստաընկերության նոյեմբերի 2-ի լուրերի գլխավոր թողարկմանն անդրադարձ կար ՍԴ դատավոր Վահե Գրիգորյանի ֆեյսբուքյան հրապարակմանը, ըստ որի՝ նա առաջարկում է ՍԴ անդամներին դատավորներով փոխարինելու գործընթաց սկսել։ Ռեպորտաժն ամբողջությամբ կառուցված էր Վահե Գրիգորյանի հրապարակման վրա։ ՍԴ աշխատակազմից կամ որևէ այլ դատավորից լրագրողը չէր փորձել մեկնաբանություն ստանալ հրապարակման վերաբերյալ։ Ըստ այդմ՝ ռեպորտաժը միակողմանի էր ստացվել։
«Մեդիա պաշտպան» նախաձեռնությունը մեկ անգամ չէ, որ նկատում է ՍԴ-ի ու, մասնավորապես, ՍԴ նախագահ Հրայր Թովմասյանի դեմ Հանրային հեռուստաընկերության` իշխանություններին աջակցող քաղաքականությունը։ Ըստ էության, փորձ է արվում Հրայր Թովմասյանին վարկաբեկել, իսկ Վահե Գրիգորյանին ներկայացնել դրական լույսի ներքո»,- նշվում էր տարածված հայտարարության մեջ:
Այսպիսով` անկախ փորձագիտական խումբն արձանագրել է, որ հարկատուներիս միջոցներով աշխատող Հանրայինը միակողմանի քարոզ է տանում` հօգուտ օրվա քաղաքական իշխանությանը, այն դեպքում, երբ համակողմանի տեղեկատվություն ապահովելն ու ակնհայտ կողմնակալություն չցուցաբերելը Հանրայինի սուրբ պարտքն է։ Ի դեպ, ՍԴ նախագահին` իբրև բարձրագույն դատական մարմնի նախագահի, Հանրային հեռուստաընկերության կողմից եթեր չի տրամադրվել ամիսներ շարունակ, այն դեպքում, երբ ՍԴ-ի կոնկրետ նրա նախագահ Հրայր Թովմասյանի անձի և ընտանիքի շուրջ կտրուկ զարգացումներ են տեղի ունեցել:
Հանրայինի եթերում հասկանալի ու անհասկանալի տարբեր մասնագետներ ու գործիչներ խոսել են այս հարցերի մասին, մինչդեռ անձամբ ՍԴ նախագահի խոսքը` հարցազրույցի ձևաչափով, հանրությանը չի ներկայացվել: Կարծում ենք` ճիշտ ժամանակն է, որ Հայելի մամուլի վրա ձվերով հարձակում գործած հերոսները կրկին զինվեն ձվերով և խոսքի ազատության և օբյեկտիվ լրատվության պահանջով ձվազարկ կատարեն Հանրայինի պատերի և դռների ուղղությամբ: Հակառակ պարագայում ստիպված ենք արձանագրել, որ Նիկոլ Փաշինյանին սրբադասողների այս խմբի համար խոսքի ազատությունն ու իրավահավասարությունը սկսվում և ավարտվում է «Առաջնորդը միշտ ճիշտ է» գաղափարախոսությամբ:
Հայկ Դավթյան
Հետևեք մեզ Viber-ում
