Էդմոն Մարուքյանը կրոնափոխ է եղել, ինչ ակնկալիքով

Ընդդիմադիր, երբեմնի արեւմտամետ «Լուսավոր Հայաստան»-ի ղեկավար Էդմոն Մարուքյանը վերջերս հաճախ է աչքի ընկնում ռուսամետ հայտարարություններով ու գործողություններով: Երեկ նա հերթական անգամ է փայլել, և չի կարծում, որ Հայաստանի Հանրապետության Տավուշի մարզի գյուղերի և դիրքերի ուղղությամբ Ադրբեջանի կողմից մի քանի կրակոցի պայմաններում Հայաստանը պետք է դիմի Հավաքական անվտանգության պայմանագրի կազմակերպության անդամ երկրների օգնությանը: «Չեմ կարծում, որ Հայաստանի վրա մի քանի կրակոցի պայմաններում պետք է դիմենք ՀԱՊԿ-ին, այսինքն` պաշտոնապես դիմենք, որ գան մեզ պաշտպանեք: Դա կնշանակի, որ ՀՀ բանակն այնքան մարտունակ չէ, որ մեր վրա 5 հատ կրակել են, և մենք դիմել ենք, որ եկեք մեզ պաշտպանեք: Մենք այսօր այնքան հզոր ենք, որ հինգ կրակոցին ի պատասխան կարող ենք 500 հատ հետ կրակել, և այդպես էլ պետք է արվի, ու արվում է: ՀԱՊԿ-ը կարող է գործել այն դեպքում, երբ լայնամասշտաբ պատերազմ լինի, և մենք պաշտոնապես դիմենք»,- ասում է Մարուքյանը՝ ըստ ամենայնի արդարացնելով ՀԱՊԿ-ի անգործությունը, ինչի համար, ի դեպ, ոչ հեռավոր անցյալում կատաղի քննադատում էին:

Հավաքական անվտանգության մասին Պայմանագրի 4-րդ հոդվածի համաձայն` «եթե անդամ պետություններից որևէ մեկը ենթարկվի ագրեսիայի որևէ պետության կամ պետությունների խմբի կողմից, ապա անդամ պետությունների կողմից դա կհամարվի որպես ագրեսիա Պայմանագրի բոլոր մասնակից պետությունների դեմ: Մասնակից պետություններից որևէ մեկի դեմ ագրեսիայի ակտի ի հայտ գալու պարագայում, մնացած մասնակից պետությունները կցուցաբերեն անհրաժեշտ օժանդակություն` ներառյալ ռազմական օգնությունը, նաև կցուցաբերեն օժանդակություն իրենց տրամադրության տակ գտնվող միջոցներով` հավաքական պաշտպանության իրավունքի իրագործման կարգին համապատասխան` համաձայն ՄԱԿ-ի կանոնադրության 51-րդ հոդվածի»: Հիմա Մարուքյանը որոշել է պապից ավելի կաթոլիկ երեւալ, հեղափոխությունից առաջ Նիկոլ Փաշինյանն էլ էր Ռուսաստանի բմբուլները քամուն տալիս, ԵԱՏՄ-ից դուրս գալու անհրաժեշտության մասին խոսում, այն, ինչ կատարվեց հեղափոխությունից հետո, առավել քան հուզիչ էր: Նիկոլ Փաշինյանը միայն չշարունակեց Սերժ Սսարգսյանի որդեգրած կուրսը, այլեւ ամեն ինչ անում է ապացուցելու, որ մեր եւ Ռուսաստանի հարաբերությունները երբեւէ այսքան փայլուն չեն եղել: Եթե որպես իշխանություն որոշակիորեն հասկանալի է Փաշինյանի դիրքորոշումը, ապա հարցադրումների տեղիք է տալիս Մարուքյանի <<կտրուկ կրոնափոխությունը>>:

Ըստ ամենայնի Էդմոն Մարուքյանը իշխանություն գալու մեծ ախորժակ ունի եւ քաղաքական դաշտի վերադասավորումները նրան հուշում են նոր դիրքավորում կատարել: Սասնա ծռերը, նորահայտ ՔՈ-ն ակնհայտ արեւմտամետ դաշտում են խաղում, Նիկոլ Փաշինյանը հակառակ հավաստիացումներին այդպես էլ չի կարողանում նորմալ հարաբերվել Պուտինի հետ դա եւ սուբյեկտիվ՝ Քոչարյանի գործով պայմանավորված, եւ օբյեկտիվ պատճառներ ունի: Դաշտում առանցքային եւ ընդգծավ ռուսական քաղաքական կուրսի առաջ տանողների պակաս է զգացվում, բացը լրացնել է փորձում Էդմոն Մարուքյանը՝ միգուցե հաշվարկելով, որ Ռուսաստանը ապրիլյան հեղափոխությունից եւ իրեն քցելուց հետո այլեւս խաղադրույք չի կատարի ՀՀԿ-ի եւ ոչ էլ անգամ ԲՀԿ-ի վրա, եւ ուրեմն ճիշտ պահն է զբաղեցնել դատարկ տեղը:

Անի Սահակյան