Ի հեճուկս Նիկոլ Փաշինյանի և իր ոհմակի, Արցախը երբեք չի լինելու Ադրբեջանի կազմում․ Դավիթ Շահնազարյան
Նիկոլ Փաշինյանի և դրսից ներմուծված այս իշխանությունների բոլոր գործողություններն ուղղված են Արցախի դեմ ու Նիկոլ Փաշինյանն ամեն ինչ անում է, այլ թեմաներ է օրակարգ բերում, որպեսզի խուսափի այս թեմայի մասով քննարկումներից: Սակայն ինձ, բարեբախտաբար, հաջողվել է այն օրակարգ բերել: «Հայելու առաջ» հաղորդման ժամանակ հայտարարել է Դավիթ Շահնազարյանը, ում խոսքերով, հասարակությունն արդեն փոխվում է, աստիճանաբար հասկանում է, թե ինչ է կատարվում:
«Տեսնում եք, որ Փաշինյանն էլ չի ասում, որ ինքը ժողովրդի վարչապետն է: Նա հասարակական այն լայն հենարանն արդեն չունի, դրա համար իր հենարանը դարձնում է ուժային կառույցները, որպեսզի շարունակի սկսած ռեպրեսիաները: Եթե կա մեկ օղակ, որը չի ենթարկվում իրեն, դա արդեն խնդիր է իր համար: Նա բազմաթիվ քրեական հանցագործություններ է կատաարում»,-ասել է քաղաքական գործիչը:
Շահնազարյանի խոսքերով, մասնավորապես ՍԴ-ն Նիկոլ Փաշինյանին պետք է Ռոբերտ Քոչարյանին բանտում պահելու համար. «Նա հիմա կենաց մահու կռիվ է տալիս ՍԴ-ի համար՝ այդ ընթացքում անելով ամեն ինչ՝ հետապնդումներ և այլն: Նա իր ու իր թիմի համար գերխնդիր է սարքել Քոչարյանին բանտում պահելը: Նա նաև ամեն կերպ ՍԴ-ն վերցնելու գերխնդիր ունի: Նիկոլ Փաշինյանը Հրայր Թովմասյանի դեմ իր ջանքերը բազմապատկեց, երբ հայտարարեց, որ Արցախի հարցի որևէ կարգավորում պետք է անցնի ՍԴ-ով: Սա 50-րդ ապացույցն է, որ նրա գործողություններն ուղղված են Արցախի դեմ»:
«Բայց Նիկոլ Փաշինյանի բոլոր ջանքերն ապարդյուն են լինելու: Ի հեճուկս Նիկոլ Փաշինյանի և իր ոհմակի, Արցախը երբեք չի լինելու Ադրբեջանի կազմում: Շուտով, երբ նրանց բերողները կհամոզվեն, որ նա չի կարողանում առաջադրանքը կատարել, իրադրությունը կփոխվի»,-ամփոփել է նա՝ նշելով, որ դիմադրության կենտրոններ կան, որոնք մոտ ապագայում կհամակարգվեն, ինչի արդյունքում այլընտրանքային միավորներ կլինեն:
Հետևեք մեզ Viber-ում
