Ստամբուլյան կոնվենցիան կստորագրվի, Հայաստանն Ադրբեջան չի դառնա

Տխրահռչակ Ստամբուլյան կոնվենցիան կրկին հանրային օրակարգ է բերվում, որպեսզի մոտ ապագայում էլ ԱԺ օրակարգ մտցվի։ Այսօր ԵԽԽՎ-ից փորձագետներ էին ժամանել եւ ԱԺ-ում փակ քննարկում էր։ Նրանք ամենայն հավանականությամբ մեր պատգամավորներին համոզում էին, որ վավերացնեն կոնվենցիան։ Չգիտես ինչու քննարկումը փակ էր։

Հեղափոխական իշխանությունները, որոնք հանրության խոստում են տվել լինել բաց ու թափանցիկ, տարօրինակ է, որ նրանից թաքցնելու բան ունեն։ Մինչ քննարկումն ընթանում էր ԱԺ դարպասների մոտ բողոքի ակցիա էր անցկացնում Կամք ՀԿ-ն, որը ստորագրահավաք է անցկացնում ընդդեմ կոնվենցիայի։ Փակ հանդիպումից հետո որոշ մանրամասներ հայտնեց ԲՀԿ-ական պատգամավոր Գեւորգ Պետրոսյանը։ Պատգամավորն ասաց, որ եվրոպացի գործընկերները համոզիչ փաստարկներ չեն ներկայացրել, թե ինչու պետք է վավերացնել Ստամբուլյան կոնվենցիան: « Մենք գործընկերներով հիմնականում բարձրաձայնեցինք հետևյալ հարցը, թե ՀՀ օրենսդրության այդ ո՞ր նորմն է բացակայում ընտանեկան և ընդանրապես բռնությունները պատժելու հարցում, որ դրա բացակայությունը կարող է լրացվել բացառապես կոնվենցիայով: Որևէ պատասխան չհնչեց: Նաև հարցրել եմ, թե ունե՞ն վիճակագրություն, գոնե մեկ դեպք Հայաստանում, որ ենթադրյալ բռնության ենթարկված կինը դիմել է ոստիկանություն և քրեական գործի հարուցումը մերժվել է բռնության համար պատասխանատվության ենթարկելու նորմի բացակայության պատճառով՝դարձյալ պատասխան չհնչեց»,-մանրամասնեց պատգամավորը:

Գևորգ Պետրոսյանն ասաց, որ քննարկմանը հետաքրքրվել է թե կոնվենցիան ընդունած երկրներում բռնությունների թիվը որքանո՞վ է նվազել և որևէ պատասխան չի ստացել: «Ասել եմ, հիմա ըստ Ձեզ՝ կոնվենցիայում սեռ ասելով նկատի ունեք տարբե՞ր սեռեր, թե՞ նույն սեռի մարդկանց, որևէ ձայն չեղավ: Սա նշանակում է, որ երբ կոնվենցիան վավերացնենք երկու համասեռամոլ գնալու են իրենց սերը «սրբագործեն» ԶԱԳՍ-ում , իսկ եթե հանկարծ այդ մարմինը մերժի նրանց ամուսնության գրանցումը, վազելու են վարչական դատարան ԶԱԿՍ-ի անգործությունը վիճարկելու պահանջով»,-ասաց նա: «ԱԺ օրակարգում Ստամբուլյան կոնվենցիայի հարց չկա, պաշտոնապես շրջանառության մեջ դրված չէ»,- իր հերթին հայտարարեց Իմ Քայլից Վլադիմիր Վարդանյանը` նկատելով, որ մինչ խորհրդարան հասնելը, հարցը պետք է որոշակի գործընթաց անցնի: «Պետք է հստակ մի բան հասկանանք՝ Հայաստանը ԵԽ անդամ է, պետք է ընթանանք այդ ճանապարհով. խոսքը չի գնում որեւէ գործընթացի մասին, խոսքը գնում է պարզապես քննարկումների մասին: Ես զարմանում եմ, որ Ստամբուլյան կոնվենցիան այս աստիճանի արձագանք ստացավ, շատ այլ կոնվենցիաներ կան, որոնք վավերացվել են մեր երկրի կողմից, որոնք ավելի մեծ նշանակություն կարող են ունենալ»,- ասաց Վլադիմիր Վարդանյանը` հերքելով, որ այս հարցի շուրջ «գաղտնի դիվանագիտություն» է վարվում:

Նրա պնդմամբ՝ կոնվենցիայի նպատակն է պայքարել ընտանիքում կնոջ նկատմամբ բռնության դեմ և այն որևէ պետության չի պարտադրում և չի էլ պարտադրելու օրինականացնել մեկ սեռի ամուսնությունը կամ նրանց երեխա որդեգրելու հնարավորություն ընձեռել։

«Զուգընկեր բառի օգտագործումը նշանակում է այն դեպքերը, երբ մարդիկ առանց ամուսնությունը գրանցելու, այսինքն կինը և տղամարդն ապրում են իրար հետ։ Եթե զուգընկերը մեկնաբանենք որպես բացառապես նույն սեռի ներկայացուցիչ, ապա այո, բայց նման մոտեցում չկա»,-հավելեց Վլադիմիր Վարդանյանը։ Նրա խոսքից պարզ դարձավ, որ իշխանությունը որեւէ վատ բան, որեւէ վտանգ չի տեսնում այս կոնվենցիայում եւ ճիշտ հակառակը Վարդանյանն ասում է, որ «Մենք չպետք է դասվենք այն պետությունների շարքին, որոնք վերածվում են պրոբլեմատիկ երկրների՝ այս կամ այն կազմակերպության համար։ Նախապես ասեմ, որ որպես օրինակ Ադրբեջանը չի վավերացրել և չի էլ ստորագրել։ Չէի ուզի, որ որևէ հարցում Ադրբեջանի հետ նույն շարքում լինեինք»։

Անի Սահակյան