Սույն քրեական գործի փաստերը վկայում են, որ Անժելա Թովմասյանը և «Հայելի» ակումբը իրականացնում են օրինական մասնագիտական լրագրողական գործունեություն

ՀՀ ՓԱՍՏԱԲԱՆՆԵՐԻ ՊԱԼԱՏ
ԱՐՏՈՆԱԳԻՐ N 30
ԶԱՐՈՒՀԻ ՓՈՍՏԱՆՋՅԱՆ

ՀՀ գլխավոր դատախազ Արթուր Դավթյանին
Պատճեն` ՀՀ մարդու իրավունքների պաշտպան Արման Թաթոյանին

30 հոկտեմբերի 2019

Բողոք

Թիվ 15959619 քրեական գործով տուժող Անժելա Թովմասյանի՝
ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների քննչական բաժնի
քննիչ Գագիկ Հայրապետյանի միջնորդության քննարկումը հետաձգելու
(անգործության) դեմ՝
խուլիգանության և Անժելա Թովմասյանի նկատմամբ խտրական վերաբերմունք
դրսևորելու դեպքերի առթիվ քրեական հետապնդում իրականացնելու պահանջների
համատեքստում

Թիվ 15959619 քրեական գործով տուժող ճանաչված Անժելա Թովմասյանը ՀՀ ՔԿ
ԵՔՔՎ Կենտրոն և Նորք-Մարաշ վարչական շրջանների քննչական բաժնի քննիչ
Գագիկ Հայրապետյանի կողմից սույն թվականի հոկտեմբերի 10-ին իրականացված
հարցաքննության ընթացքում միջնորդություններ է ներկայացրել
խուլիգանության, ինչպես նաև իր նկատմամբ խտրական վերաբերմունք դրսևորելու
դեպքերի առթիվ քրեական հետապնդում իրականացնելու և իր կողմից ղեկավարվող
«Հայելի» ակումբին տուժող ճանաչելու վերաբերյալ:

Միջնորդությունները ներկայացնելու համար հիմք է հանդիսացել տեսանյութը,
որը հիմնավորում է Անժելա Թովմասյանի և «Հայելի» ակումբի նկատմամբ
դրսևորվող խտրական վերաբերմունքը և խուլիգանության դեպքերը:

ՀՀ Քրեական օրենսգրքի 143-րդ հոդվածը արգելում է քաղաքացիների
իրավահավասարությունը խախտելը` կախված անձի ազգությունից, ռասայից,
սեռից, լեզվից, դավանանքից, քաղաքական կամ այլ հայացքներից, սոցիալական
ծագումից, գույքային կամ այլ դրությունից, որը վնաս է պատճառել անձի
օրինական շահերին:

Սույն քրեական գործի փաստերը վկայում են, որ Անժելա Թովմասյանը և
«Հայելի» ակումբը Հայաստանի Հանրապետության տարածքում իրականացնում են
օրինական մասնագիտական լրագրողական գործունեություն՝ Հայաստանի
Հանրապետության օրենսդրությամբ սահմանված կարգով։ Վերջիններս տարածում են
այնպիսի կարծիքներ, որոնք տարբերվում են գործող իշխանության կարծիքից և
կրում են սուր քննադատական բնույթ իշխանության կողմից վարած
քաղաքականության տարբեր ոլորտների նկատմամբ: «Հայելի» ակումբի վրա
հարձակում գործած անձինք գործող իշխանության աջակիցներն են և վերջիներիս
հետ մտերիմ հարաբերություններ ունեն: Ի լրումն այս ամենի՝ Անժելա
Թովմասյանը ՀՀ Սահմանադրական դատարանի նախագահ պարոն Հրայր Թովմասյանի
քույրն է, ում նկատմամբ գործող իշխանությունը նույնպես ուղղորդված կերպով
իրականացնում է քրեական և քաղաքական հետապնդում:

Այսպիսով, վերոգրյալ փաստում է, որ նկարագրված իրադարձությունների
արդյունքում, թե՛ Անժելա Թովմասյանի, թե՛ Անժելա Թովմասյանի կողմից
ղեկավարվող «Հայելի» ակումբի նկատմամբ տեղի է ունեցել խտրական
վերաբերմունք՝ պայմանավորված վերջիններիս տարածած տեղեկատվության
բնույթով, ինչպես նաև վերջիններիս կողմից գործող իշխանության
քաղաքականության քննադատությամբ հանդես եկողների խոսքի և մտքերի
տարածմամբ։

Համաձայն ՀՀ քրեական օրենսգրքի 258-րդ հոդվածի՝ «խուլիգանությունը՝
դիտավորությամբ հասարակական կարգը կոպիտ կերպով խախտելն է, որն
արտահայտվել է հասարակության նկատմամբ բացահայտ անհարգալից
վերաբերմունքով»:

Հասարակական կարգ հասկացությունն իր մեջ ներառում է մարդկանց ամենօրյա
կենսագործունեությունը` աշխատանքի, կենցաղի, ուսման, հանգստի, զվարճանքի
և այլ ընթացքում նորմալ փոխհարաբերություններն ապահովող հասարակական
հարաբերությունների ամբողջությունը: Հասարակական կարգը, որպես
քրեաիրավական պաշտպանության օբյեկտ, ներառում է հասարակական անդորրը,
հասարակական բարոյականությունը, այդ թվում քաղաքացիների կողմից
հասարակական վայրերում օրինապահ և կայուն վարքագծի պահպանումը:
Հասարակական կարգն իրավաբանական և ֆիզիկական անձանց բարոյական
անձեռնմխելիությունն ապահովող հասարակական հարաբերությունների
ամբողջությունն է:

Տվյալ գործի փաստական հանգամանքները վկայում են, որ սույն թվականի
հոկտեմբերի 5-ին մի խումբ անձանց կողմից դիտավորությամբ, հասարակական
կարգը կոպիտ կերպով խախտելով, խտրական բնույթի հայտարարություններ
հնչեցնելով՝ հարձակում է տեղի ունեցել Անժելա Թովմասյանի կողմից
ղեկավարվող «Հայելի» ակումբի գրասենյակի վրա։ Մասնավորապես՝ այն
արտահայտվել է տեղեկատվություն տարածող «Հայելի» ակումբի գրասենյակին
պատկանող գույքը վնասելու միջոցով: Նշված անձանց կողմից դիտավորությամբ,
հասարակական կարգի կոպիտ խախտման հիմքում ընկած է նրանց անձնական
անբարյացկամ վերաբերմունքը «Հայելի» ակումբի ղեկավար Անժելա Թովմասյանի
անձի նկատմամբ:

Խմբի անդամների գործողությունները պարունակում են հասարակական կարգի
կոպիտ խախտման, հասարակության նկատմամբ բացահայտ անհարգալից
վերաբերմունքի այնպիսի դրսևորումներ, ինչպիսիք են հասարակության և
բարոյականության համընդհանուր ճանաչում ստացած նորմերին` խոսքի
ազատության և խտրականության արգելքի հիմնարար իրավունքներին և
սկզբունքներին նետված բացահայտ մարտահրավերները: Խմբի կողմից՝ որպես
պատժիչ առաքելություն կատարողների հնչեցրած ուղերձը, նրանց
սանձարձակությունը, անպարկեշտ վարքագիծը, ցինիզմը և հանդգնությունը,
մասնավորապես՝ ձվեր նետելը, ակումբի պատին և դռներին պաստառներ փակցնելը,
ինչպես նաև նրանց կողմից հնչեցված հայտարարությունը, համաձայն որի՝
վերջիններս պատրաստվել էին նույն գործողություններն իրականացնել ակումբի
ներսում, եթե դուռը բաց լիներ, և վերջապես նրանց առաջադրած պահանջը, որը
վերաբերում էր լրատավամիջոցը փակելուն, քանի որ ըստ նրանց պնդումների՝
Սահմանադրական դատարանի նախագահ Հրայր Թովմասյանի քույրը Անժելա
Թովմասյանը, իրավունք չունի որևէ գործունեություն իրականացնել
Հայաստանում, պարունակում է այնպիսի հանցակազմեր, որոնք մասնավորապես
նախատեսված են ՀՀ քրեական օրենսգրքի 143-րդ հոդվածի 1-ին մասով`
քաղաքացիների իրավահավասարության խախտելը և 258-րդ հոդվածի 3-րդ մասի
առաջին կետով`խուլիգանությունը, որը կատարվել է մի խումբ անձանց կամ
կազմակերպված խմբի կողմից։

Ուստի, հիմք ընդունելով վերոգրյալը, պահանջում եմ՝

1. Ցուցում տալ ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների
քննչական բաժնի իրավասու քննիչին դեպքի առթիվ ՀՀ քրեական օրենսգրքի
164-րդ հոդվածի 1-ին մասով նախատեսված հանցակազմով (լրագրողի
մասնագիտական օրինական գործունեությանը խոչընդոտելը) հարուցված քրեական
գործը լրացնել նաև ՀՀ քրեական օրենսգրքի 143-րդ հոդվածի 1-ին մասով
նախատեսված հանցակազմով, այն է՝ քաղաքացիների իրավահավասարությունը
խախտելը, ինչպես նաև ՀՀ քրեական օրենսգրքի 258-րդ հոդվածի 3-րդ մասի
առաջին կետով սահմանված հանցակազմով, որը նախատեսում է խուլիգանությունը,
որը կատարվել է մի խումբ անձանց կամ կազմակերպված խմբի կողմից։

2. Ցուցում տալ ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների
քննչական բաժնի իրավասու քննիչին սույն քրեական գործով որպես
մեղադրյալներ ներգրավված Դավիթ Հովհաննիսյանի, Սարգիս Մանուկյանի, Արտակ
Մարգարյանի և Հայկ Ստեփանյանի նկատմամբ առաջադրված մեղադրանքի ծավալները
լրացնել ՀՀ քրեական օրենսգրքի 143-րդ հոդվածի 1-ին մասով նախատեսված
հանցակազմով, այն է՝ քաղաքացիների իրավահավասարությունը խախտելը և ՀՀ
քրեական օրենսգրքի 258-րդ հոդվածի 3-րդ մասի առաջին կետով սահմանված
հանցակազմով, այն է՝ խուլիգանությունը, որը կատարվել է մի խումբ անձանց
կամ կազմակերպված խմբի կողմից։

3. Ցուցում տալ ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների
քննչական բաժնի իրավասու քննիչին տուժող ճանաչել իրավաբանական անձ
«Հայելի» ակումբը:

Կից ներկայացվում է ՀՀ ՔԿ ԵՔՔՎ Կենտրոն և Նորք-Մարաշ վարչական շրջանների
քննչական բաժնի քննիչ Գագիկ Հայրապետյանի գրության պատճենը։

Թիվ 15959619 քրեական գործով
տուժող Անժելա Թովմասյանի
ներկայացուցիչ, փաստաբան Զարուհի Փոստանջյան