Վենետիկի ասածը «ասնավանի չի»

Երեկ Վենետիկի հանձնաժողովի նախագահ Ջիանի Բուքիքիոն կոշտ հայտարարությամբ, ապա հարցազրույցով հանդես եկավ Սահմանադրական դատարանի շուրջ ստեղծված իրավիճակի վերաբերյալ: Բուքիքիոն իր հայտարարությամբ մտահոգիչ համարեց կառավարության, Ազգային ժողովի մյուս կողմից՝ ՍԴ-ի միջեւ ստեղծված վեճը, շեշտեց, որ իշխանական ճյուղերի միջեւ պիտի գործի փոխադարձ հարգանքի ինստիտուտը, այլապես պետք չէ ակնկալել ժողովրդավարական ինստիտուտների կայացում, տնտեսական հեղափոխություն: Իսկ հարցազրույցում հանձնաժողովի ղեկավարը բացահայտ խոսեց ՍԴ նախագահի նկատմամբ «հարվածների» մասին.«Ավելին, մենք գիտենք, որ կարճ ժամանակում Հայաստանում շատ հարվածների տակ է հայտնվել Սահմանադրական դատարանի նախագահը, և բազմաթիվ ընթացակարգեր են իրականացվում նրա դեմ: Ժամանակային համընկնումն ու դատավարական խիստ միջնորդությունները հանգեցնում են ճնշման նախագահի նկատմամբ, ում հանդեպ պետք է հարգանք դրսևորել՝ որպես պետության գլխավոր ինստիտուտներից մեկի ղեկավարի»: Ընդգծեց նաեւ, որ ընդունված պրակտիկա չէ, որ յուրաքանչյուր կառավարության փոփոխությունից հետո պետք է ձեռնամուխ լինել նաեւ ՍԴ կազմի փոփոխության. «Սահմանադրական դատարանի դատավորի մանդատը ոչ քաղաքական է: Սա նշանակում է՝ դատավորները նշանակվում են՝ պաշտպանելու Սահմանադրությունը և ոչ թե առաջ մղելու ընտրություններում հաղթած կառավարող մեծամասնության քաղաքական ծրագիրը: Դա է պատճառը, որ Սահմանադրական դատարանի նորացումը պետք է ապասինքրոնացնել քաղաքական շրջափուլերի հետ: Նախորդ մեծամասնության կողմից ընտրված դատավորները կարող են նույնիսկ ավելի պատրաստ լինել՝ քննադատաբար դիտարկելու գործող մեծամասնության առաջարկած միջոցների սահմանադրականությունը»,- իշխանություններին խելքուխրատեց եվրոպացի գործընկերը:

Բայց ինչպես ասում են սեւին սապոնն ինչ կանի, որ խեւին խրատն ինչ անի: Նիկոլ Փաշինյանի թիմակիցները ոգեւորված տարածեցին Բուքիքիոյի մեկնաբանությունները՝ դրանք ներկայացնելով սեփական մտահորիզոնի պրիզմայով: ԱԺ արտաքին հարաբերությունների հանձնաժողովի նախագահ Ռուբեն Ռուբինյանը հայտարարեց, որ ողջունում է այդ հայտարարությունը.« Ողջունում եմ Վենետիկի հանձնաժողովի նախագահի հայտարարությունը ՍԴ շուրջ ստեղծված իրավիճակի մասին։ Այս հայտարարությամբ և հատկապես դրա վերջին մասով հանձնաժողովի նախագահը փաստեց, որ Հայաստանում սահմանադրականության խնդիր կա, և այդ խնդիրը պետք է լուծել։
Սա հենց այն է, ինչ մենք շարունակ ասում ենք։ Այո, Հրայր Թովմասյանի՝ հայտնի հանգամանքներում ՍԴ նախագահ ընտրվելը և հայտնի հանգամանքներում պաշտոնավարելն առաջացրել է սահմանադրության նորմալ գործունեության խնդիր, և այս խնդիրը պիտի լուծվի»։ Համաձայնեք, որ առնվազն անմեղսունակության սինդրոմ ունեցող կառավարության ներկայացուցիչը կարձագանքեր այսկերպ այն գնահատականներից հետո, որը տվել է Բուքիքիոն: Մարդն ասում է՝ ՍԴ նախագահը հարվածների տակ է, հասկացնում է՝ քաղաքական հետապնդման միտում է տեսնում, որ պիտի հարգանք դրսեւորել Սահմանադրական այս մարմնի ղեկավարի նկատմամբ, մեկ էլ հանկարծ Նիկոլ Փաշինյանի պատգամավորը մոլորակ է հայտնագործում, թե ՍԴ նախագահ ընտրվելը և հայտնի հանգամանքներում պաշտոնավարելն առաջացրել է սահմանադրության նորմալ գործունեության խնդիր, և այս խնդիրը պիտի լուծվի:

Հետաքրքիր է՝ այդ ինչ խնդիր է առաջացրել, որի մասին գիտեն միայն հեղափոխական իշխանիկները: Կամ ինչու այդ խնդրի մասին Նիկոլ Փաշինյանն ու իր կողմնակիցները չէին բարձրաձայնում ավելի քան մեկ տարի ու ՍԴ-ի մասին հիշեցին հայտնի որոշումից հետո:

Հետեւաբար, հարգելի ու սիրելի իմքայլիստներ, եթե փախչում եք իրականությունից եւ գլուխը թաքցնում ավազների մեջ, դա չի նշանակում, որ մյուսները չեն նկատում իրականությունը: Մարդիկ ոչ միայն նկատում են, այլ ճշգրիտ ախտորոշում: Մինչ դուք փորձում եք մանեւրել ու կրուտիտով աբառոտկա ֆռալ, վենետիկցիները հաջորդ պատժիչ գործողություններն են մշակելու մեր պետության նկատմամբ: Արդարադատության նախարար Ռուստամ Բադասյանն էլ թեեւ ասաց, որ ի գիտություն են ընդունել հայտարարությունը եւ հետեւություններ կանեն, բայց շեշտեց, որ Վենետիկի հանձնաժողովն այն մարմինը չէ, որ «վերջնական լուծում առաջարկելու մանդատով է օժտված»:

Այլ կերպ ասած՝ իրենց ասածը մեզ համար «ասնավանի» չէ:

Անի Սահակյան