Շոյգույի անակնկալ այցը Գյումրի. Բաքվում նոր փաթեթ է ձևավորվում

Լրատվամիջոցները հայտնում են, որ այսօր Գյումրի կժամանի Ռուսաստանի Դաշնության պաշտպանության նախարար Սերգեյ Շոյգուն։ Նրան առավոտյան կդիմավորեն «Շիրակ» օդանավակայանում։ Թե ո՞րն է այցի նպատակը, ըստ aravot.am-ի՝ մարզի պաշտոնյաները հստակ չգիտեն: Կարելի է ենթադրել, որ Ռուսաստանի պաշտպանության նախարարն այցելում է Գյումրիում տեղակայված 102-րդ ռազմաբազայի հետ կապված որոշակի հարցերը քննարկելու։ Ըստ կայքի՝ ռուսական կողմն այսօր Սերգեյ Շոյգուի անվտանգությանն ուղղված միջոցառումներ է իրականացնում Գյումրիում։

Կայքը նշում է, թե չի բացառվում, որ քննարկվի նաև Գյումրու քաղաքապետ Սամվել Բալասանյանի՝ դեռ 2015թ. մարտ ամսին ՌԴ պաշտպանության նախարար, գեներալ Սերգեյ Շոյգուին ուղղված նամակ-ուղերձը, որով վերջինս առաջարկում էր Ռուսաստանի Դաշնության միջոցներով ասֆալտապատել Գյումրու այն փողոցները, որոնք անընդմեջ վնաս են կրում ռուսական 102-րդ ռազմաբազայի ծանր տեխնիկայից։

Հայտնի է նաև, որ Հայաստան է ժամանել ՌԴ ԶՈՒ պատվիրակությունը: Ըստ ՀՀ ՊՆ մամուլի ծառայության տարածած մամլո հաղորդագրության՝ հոկտեմբերի 28-ին Հայաստան է ժամանել ՌԴ զինված ուժերի ավիացիայի թռիչքների անվտանգության ծառայության պետի գլխավորած պատվիրակությունը՝ երկկողմ քննարկումներին մասնակցելու նպատակով:

Ուշագրավ է, որ Շոյգուն այսօր ժամանելու է Հայաստան, իսկ վաղը նա պետք է գտնվի Բաքվում: Հոկտեմբերի 30-ին Բաքվում տեղի կունենա ԱՊՀ անդամ պետությունների պաշտպանության նախարարների խորհրդի հերթական նիստը:

Ադրբեջանական լրատվամիջոցները հայտնում են, որ նշյալ հավաքին կմասնակցեն Ադրբեջանի պաշտպանության նախարար Զաքիր Հասանովը, Ռուսաստանի պաշտպանության նախարար Սերգեյ Շոյգուն, Բելառուսի պաշտպանության նախարար Անդրեյ Ռավկովը, Ղազախստանի պաշտպանության նախարար Նուռլան Երմեկբաևը, Ուզբեկստանի պաշտպանության նախարար Բահոդիր Կուրբանովը և Ղրղզստանի ԶՈՒ Գլխավոր շտաբի պետ Ռայիմբերդի Դույշենբիևը:

Նիստի շրջանակներում քննարկվելու են ռազմական համագործակցության վերաբերյալ հարցեր:

Երևանից Բաքու շտապող Շոյգուն ինչ նորություններ կունենա Ալիևի համար: Վերջին շրջանում Բաքվի կոշտ քննադատությունների պայմաններում Մոսկվան լռություն է պահպանել՝ ցույց տալով, որ Ալիևի «հարձակումները» Հայաստանի ուղղությամբ ընդունում է որպես ի գիտություն: Մոսկվան չի սաստում Ալիևին:

Իսկ եթե Մոսկվան համաձայնի նաև Ալիևի՝ պատերազմ հրահրելու քմահաճույքին...

Թամար Բագրատունի