Լայնամասշտաբ մարտեր՝ Հալեպում

Լայնամասշտաբ մարտեր են բռնկվել Սիրիայի Հալեպ քաղաքում և շրջակա ծայրամասերում` խախտելով փխրուն զինադադարը, որը պետք է ճանապարհ հարթեր խաղաղ բանակցությունների։ Ինչպես հաղորդում է The Guardian-ը` կառավարական ուժերի ռազմական ինքնաթիռների` երեքշաբթի արձակած ավիահարվածների հետևանքով 5 քաղաքացիական անձ է զոհվել: «Ականներն ամենուր են, գետնին մահացած մարդկանց դիակներ կան, և մարդիկ լվանում են արյան հետքերը փողոցներից», - ասել է Հալեպի` կառավարության կողմից վերահսկվող շրջանի բնակիչներից մեկը: Մարտերը վերսկսվել են Վաշինգտոնի և Մոսկվայի նախաձեռնությամբ իրականացվող ժնևյան բանակցություններիում հայտարարված դադարից օրեր անց: Ակտիվիստները նշել են, որ առնվազն 12 մարդ է զոհվել երեքշաբթի քաղաքի` ընդդիմադիրների վերահսկողության տակ գտնվող շրջաններում: Ընդդիմության կողմից կառավարական զորքերի վերահսկողության տակ գտնվող տարածքների ուղղությամբ հասցված հարվածների հետևանքով 16 մարդ է զոհվել, 80-ից ավելին վիրավորվել են: