Պատմության հետ առերեսվելու հրամայականը. Վիտալի Բալասանյանի բեկումնային քայլը
Արցախի հերոս, Արցախի անվտանգության խորհրդի նախկին նախագահ, գեներալ Վիտալի Բալասանյանը լրագրողների հետ զրույցում արցախյան ազատագրման պայքարի տարեգրությունից հետաքրքիր դրվագներ է պատմել:
«Պատերազմի տարիներին Արցախի ժողովրդի ֆիզիկական անվտանգությունը հարցականի տակ էր, լինել-չլինելու հարց էր, եւ բնական է, որ Արցախի ժողովուրդը սկսեց լռեցնել այն կրակակետերը, որոնք սպառնում էին իր անվտանգությանը: Այդ տարիներին, երբ հայկական կողմը հաջողություններ էր գրանցում, ադրբեջանցիները վազում էին ՄԱԿ, ընդունում էին բանաձեւեր, հետո երբ վերակազմակերպվում էին, նորից սկսում էր հարձակողական գործողությունները: Դրա վառ ապացույցը 2016-ի ապրիլյան դեպքերն էին, երբ հայկական կողմն սկսեց պաշտպանությունը եւ պատրաստ էր անցնել հակահարձակման, վազեցին Կրեմլ, խնդրեցին, որ պատերազմական գործողությունները դադարեցվեն»,- պատմել է նա:
Նրա խոսքով՝ մենք ժամանակին խնդիր էինք դրել ազատագրել Աղդամի կրակակետերը, որտեղից գրադով հարվածում էին Ստեփանակերտին: Լեւոն Տեր-Պետրոսյանը, ՀՀ քաղաքական ղեկավարությունը դեմ է գնացել այդ որոշմանը:
«Երբ մենք սկսել էինք հարձակողական օպերացիան, Լեւոն Տեր-Պետրոսյանի ներկայացուցիչը լուր ուղարկեց, որ հեռու մնանք այդ օպերացիայից: ԼՂՀ ռազմաքաղաքական իշխանության որոշումը մեկն էր՝ րոպե առաջ ազատագրել Աղդամի տարածքը, որի հրամանատարը ես էի: Մենք սկսեցինք այդ օպերացիան հուլիսի 3-ին, եւ գիշերը ժամը 3-ին նորից մեզ լուր տվեցին, որ դադարեցնենք այդ օպերացիան: Մենք չդադարեցրինք եւ ազատագրեցինք Աղդամը: Մեկ շաբաթ համարյա ամեն օր մեզ հորդորում էին, հրամաններ էին իջեցնում ՀՀ իշխանության կողմից, որ րոպե առաջ պետք է լքենք Աղդամի տարածքը: Ես կտրուկ դեմ եմ եղել եւ չեմ կատարել այդ հրամանը: Դրանից մեկ շաբաթ անց հայտնվում են ՀՀ ԱԺ նախագահ Բաբկեն Արարքցյանը, ՆԳ նախարար Վանո Սիրադեղյանը եւ ասում, որ ՀՀ իշխանությունը որոշում է կայացրել, որ լքեք Աղդամի տարածքը: Ես կոշտ պատասխան եմ տվել»,- պատմել է գեներալը:
Անդրադառնալով Ադրբեջանի տարածքային ամբողջականությունը պաշտպանելու վերաբերյալ հարևան երկրի առաջնորդի հայտարարությանը և Ալիևի այն պնդմանը, թե ազատագրված 7 շրջանները Ադրբեջանը համարում է օկուպացված տարածքներ, գեներալը հակադարձել է` եթե, թող մեզ դատի տա միջազգային ատյաններում:
Հայաստանի հեղափոխական ղեկավարության նեոլիբերալ ղեկավարության քաղաքականությունն Արցախի հարցում բերեց պատմության հետ առերեսման անհրաժեշտություն: Հաղթանակների կերտման, պատմական Արցախի ազատագրման գործընթացում առաջին նախագահի թիմի դերակատարման այն դրվագները, որոնք կարող էին մնալ վարագուրված` պատմության ետնաբեմում, այժմ կարող են դուրս գալ հրապարակ և անգամ ակտիվ քաղաքական օրակարգի մաս դառնալ: Պատմությունն ունի ձեռքբերումներ և բացթողումներ, նվաճումներ և պարտություններ: Հերթական բացթողումները շրջանցելու համար ճշմարտությունն իմանալը, դեպքերի ու դեմքերի ամբողջացումը կարևոր է, ոչ այնքան նոր հերոսներ կամ դավաճաններ ստեղծելու, այլ գոնե իրական հերոսներին չկորցնելու և գնահատելու համար: Վիտալի Բալասանյանն այս ուղղությամբ արել է առաջին բեկումնային քայլը:
Հայկ Դավթյան
Հ.Գ. Վիտալի Բալասանյանի արած այս աղմկահարույց հայտարարությունների առիթով Aravot.am-ը դիմել է ԳԽ եւ ԱԺ նախկին նախագահ Բաբկեն Արարքցյանին: «Վիտալի Բալասանյանի համար շատ մեծ պատիվ կլինի, որ ես անդրադառնամ իր հայտարարություններին»,- փոխանցել է Բաբկեն Արարքցյանը՝ չցանկանալով առավել մանրամասնել կամ առավել առարկայական պատասխաններ հնչեցնել:
Հետևեք մեզ Viber-ում
