Ժողովուրդ լռիր ու հնազանդվիր. կոկորդիլոսագետ մարզպետի նոր բացահայտումը

Ժողովրդական խոսքն ասում է՝ ուզում ես ճիշտն իմանալ, հարցրու գժից կամ ճժից՝ երեխուց: Թե հայրենի իշխանության դասում կոկորիդիլոսագետ մարզպետ Գարիկ Սարգսյանը այս երկուսից որ կատեգորիայի մեջ է մտնում, դատեք ինքներդ, բայց որ նրա հետ ցանկացած շփման ընթացքում նոր
բացահայտումներ են արվում, դրանում համոզվել ենք տարիուկեսվա ընթացքում: Ասենք նույն այս պաշտոնյայի շնորհիվ մենք խավարամիտներս իմացանք՝ կոկորդիլոսը թռչուն է, թե կենդանի: Կոկորդիլոսագետ մարզպետը մի ամբողջ դիսերտացիա պաշտպանեց այս թեմայի վերաբերյալ, եւ իր հանճարեղ բացահայտումների մասին պարբերաբար կիսվում էր հանրության հետ:
Հետո նույն գարիկ սարգսյան հետ աշխարհագրական եւ մաթեմատիկական նոր հորիզոններ բացահայտեցինք, հեկտարի մասին նոր պատկերացումներ: Սարգսյանը պաշտոնավարման առաջին օրվանից դարձել է անեկդոտների հերոս, նրա կադրային քաղաքականությունը, նրա գործունեությունը եւ դրանից մասին մարզպետի անմեղսունակ խոստովանությունը մամուլի էջերում հատորյակներ են ձեւավորել: Եւ ահա, մարզպետը երեկ կրկին ցնցել է իր անկեղծությամբ: Լրագրողների հետ զրույցում նա հայտարարել է, որ ոստիկանությունը ծառայում է իշխանությանը եւ միշտ է եղել այդպիսին:
Կար ժամանակ, երբ իր թիմը ընդդիմություն էր ու մեղադրում էր նախկին իշխանությանը, որ ոստիկանությունը ծառայում է նրան։ Հիմա երբ իշխանություն է, լրագրողի դիտարկմանը, թե նախկինում ասում էիք, որ ոստիկանությունը ծառայում է իշխանությանը, այսօր դուք նույնն եք անում,- ավելի վատ է խմբագրում խոսքը․«Ոստիկանությունը միշտ էլ օրվա իշխանության ծառայողն է, ժողովրդի ծառայողն է, եւ եթե ժողովուրդը իր մեծամասնության քվեն տվել է իշխանությանը, ապա ծառայելով իշխանությանը՝ ծառայում են ժողովրդին։ Մեծ լեգիտիմությունը ունեցող իշխանությունը ժողովուրդն է»։ Մեր պարզամիտ մարզպետը մի անգամից մի քանի խոստովանություն է արել, նախ որ ոստիկանությունն իսկապես ծառայում է իշխանությանը, ապա որ ժողովրդի կարծիքը հարցնող այսուհետ չկա, իրենք հենց ժողովուրդն են ու ինչ ուզեն, այն էլ անելու են, ժողովրդի ձայնը, կամքն այլեւս առոչինչ է, մեկ անգամ ձայն են տվել, չորս տարի պարտավոր են լռել ու հնազանդ ընդունել այն ամենն, ինչ անում է իշխանությունը: Թերեւս Նիկոլ Փաշինյանը չէր ստում՝ ասելով, որ իրենք ժողովրդից ոչինչ չեն թաքցնելու, ամեն հարցում բաց են լինելու, ահա, մարզպետն էլ հաստատեց, որ թաքցնելու բան չկա, ընդունեք իրականությունը, որքան էլ դա դաժան լինի:

Անի Սահակյան