Ինչ են խոսել Պուտինն ու Փաշինյանը գազի գնի հարցով
Վարչապետ Նիկոլ Փաշինյանը հայտարարել է, որ հոկտեմբերի 1-ին Երևանում կայացած ԵԱՏՄ համաժողովը Հայաստանի ԵԱՏՄ նախագահության կուլմինացիան է եղել:
Եթե փորձենք գործնականում ի մի բերել այցի արդյունքները մեր երկրի համար, ապա պետք է արձանագրենք օրակարգի ամենակարևոր հարցը` գազի գնի հարցը, վերջնական չի հստակեցվել: Գազի գնի հարցը, լինելով ստրատեգիական նշանակության հարց, ընկած է ԵԱՏՄ տնտեսական բանակցությունների հիմքում: Նիստում հայտարարվեց, որ 2025 թվականին անգամ երկրներում կիրառվելու է էներգակիրների միասնական սակագին, սակայն մինչ այդ գազի սակագնի հարցը կոնկրետ Հայաստանի համար լինելու է տնտեսության զարգացման կարևոր նախադրյալը:
Փոխվարչապետ Մհեր Գրիգորյանը հայտարարել է, որ գազի սակագնի հարցը դեռ քննարկման փուլում է և կհստակեցվի մինչև տարեվերջ: Քննարկումները կազմված են բազմաթիվ բաղադրիչնրեից, այդ թվում նաև Գազպրոմ Արմենիա կազմակերպության դիրքորոշումից: Իսկ դա առնվազն նշանակում է, որ կոնկրետ ռուսական կողմի հետ բանակցություններում առաջընթաց չկա: ՌԴ նախագահ Պուտինի այցից ակնկալվող ամենամեծ արդյունքը գազի գնի հստակեցումն էր լինելու, որը փաստացի չկա, հետևաբար ձևակերպումները, թե հայ-ռուսական հարաբերություններն այս փուլում նորանոր հաջողություններ են արձանագրում, ուղղակի ապրիորի են:
Սրան զուգահեռ` Նիկոլ Փաշինյանը ԱԺ-ում հայտարարել է, որ ՀՀ-ն ցանկանում է մեծացնել Իրանի հետ էներգետիկ համագործակցությունն այնպես, որ դա որևէ կերպ չխոչընդոտի այլ հարաբերությունների բնականոն զարգացմանը: <<Մենք գիտենք Իրանի շուրջ ստեղծված կոնյունկտուրան, մենք գիտենք մեր ցանկությունը՝ մեծացնել Իրանի հետ էներգետիկ համագործակցությունը, և դա անել այնպես, որ դա որևէ կերպ չխոչընդոտի մեր այլ հարաբերությունների բնականոն զարգացմանը: Եվ անել այնպես, որ դա չխոչընդոտի այլ ուղղություններով Իրանի հարաբերությունների զարգացմանը»,- ՀՀ Ազգային ժողովում նշել է նա:
Իրանի հետ էներգետիկ հարաբերությունների զարգացումը, սակայն, այս պահին չի կարող դիտվել լիարժեք այլընտրանք ռուսական գազին, որով ապահովվում է գազի վրա հիմնված ողջ տնտեսական շղթան: Նախ` իրանական գազի գնի հարցը Հայաստանի համար երբեք հստակեցված չի եղել. այսօր պարզ չէ` իրականում Իրանը պատրաստ է ավելի էժան գազ տալ Հայաստանին, թե ոչ: Բացի այդ` իրանական գազը, եթե անգամ որոշվի այն փոխարինել ռուսական գազով, մատակարարվելու է Գազպրոմի խողովակաշարով: Բանն այն է, որ գազատար համակարգը ևս ռուսական կողմի սեփականությունն է, իսկ դա արդեն մեծացնում է կախվածությկունը: Ամեն դեպքում, արժի արձանագրել, որ ԵԱՏՄ նիստը գազի գնի հարցում այս պահին որևէ առաջընթաց չի ապահովել: Հետաքրքիր է` տեսնես ինչ են խոսել Փաշինյանն ու Պուտինը գազի գնի հարցով օդանավակայանում տեղի ունեցած հանդիպման և Ռոհանիի ու մյուսների հետ սելֆիի ժամանակ:
Հայկ Դավթյան
Հետևեք մեզ Viber-ում
