Մոսկվայի անսպասելի արձագանքը Փաշինյանին` Պուտինի հեռանալուց հետո

Պաշտոնական Մոսկվան ռազմական գործողությունների վերսկսման վտանգ Արցախում չի տեսնում, հայտարարել է Ռուսաստանի արտգործնախարար Սերգեյ Լավրովը «Վալդայ» ամենամյա համաժողովում ելույթի ժամանակ:

«Այստեղ որևէ ակնհայտ վտանգ չեմ տեսնում, թեպետ նաև ոչ ակնհայտ, խոշոր ռազմական գործողություններ չեն վերսկսվի»,-ասել է Լավրովը:

Միևնույն ժամանակ Ռուսաստանի արտգործնախարարը հավելել է, որ ռուսական կողմը կանի հնարավոր ամեն ինչ, որպեսզի նման բան տեղի չունենա: Լավրովն ընդգծել է, որ վերջին շրջանում շփման գծում իրավիճակը բավականին հանգիստ է, միջադեպերը քիչ են և ոչ շատ խոշոր: «Իսկ ահա քաղաքական գործընթացը արգելակված է, և առայժմ չի ստացվում տեղից շարժել: Կողմերը հայտարարություններ են անում, բավականին լուրջ, այդ թվում՝ հնչել են հայտարարություններ, որ Ղարաբաղը Հայաստան է, ինչպես Տիրանայից Ալբանիայի վարչապետը հայտարարեց «Կոսովոն Ալբանիա է»:

Դա, իհարկե, չի օգնում ստեղծել մթնոլորտ՝ բանակցային գործընթացը վերսկսելու համար»,-ասել է Լավրովը:

Նրա խոսքով՝ Ռուսաստանը ամերիկացիների և ֆրանսիացիների հետ համատեղ աշխատում է, և սա այն քիչ դեպքերից է, երբ կա բացարձակ միասնական տեսլական, բազային փաստաթղթեր:

«Չենք ցանկանում իրագործել դրանք, ցանկանում ենք այդ բազային սկզբունքների հիման վրա, որոնք բազմիցս քննարկվել են, հանգուցալուծում գտնել: Բայց հանգուցալուծում, իհարկե, պետք է գտնել ուղիղ երկխոսության միջոցով: Շփումներ կան, բայց կարգավորման մասին երկխոսություններն առայժմ չեն վերսկսվել»,- ասել է Լավրովը:

Ստացվում է, որ Պուտինի երևանյան այցից հետո Մոսկվան ղարաբաղյան բանակցությունները փաստում է, որ արգելափակված են: Ավելին՝ Մոսկվան ակնարկում է, որ այդ արգելափակման մեղավորը Փաշինյանի ստեփանակերտյան ելույթն է:

Սա, անշուշտ, ուշագրավ նրբերանգ է, եթե հաշվի առնենք, որ երեկ կայացել է Փաշինյան-Պուտին հանդիպում, և իշխանությունները փորձում են ցույց տալ, որ հայ-ռուսական հարաբերությունները փայլուն մակարդակի վրա են գտնվում:

Թամար Բագրատունի