Շոկ եւ խառնաշփոթ Իմ Քայլում

ԲՀԿ նախագահ Գագիկ Ծառուկյանի հայտարարությունը, որ կուսակցությունը չի մասնակցի ՍԴ նախագահ Հրայր Թովմասյանի լիազորությունները դադարեցնելու հարցի վերաբերյալ քվեարկությանը, Իմ Քայլում կայծակնային շոկ առաջացրեց: Ծառուկյանը հիմնավորեց, որ ներկայացված նախագծի հիմքերը թույլ են, իրավական խարխուլ հեռանկար կա, ուստի իրենք չեն պատրաստվում միանալ նախաձեռնությանը:
Իշխանականները Ֆեյսբուքում հարձակումներ սկսեցին ԲՀԿ-ի դեմ, շռայլեցին իրենց մտքի գոհարները՝ մոտավորապես, ԲՀԿ-ից ինչ ընդդիմություն, իրենք սեւ են, քվազի են եւ այլն, եւ այն:

Պատգամավոր Արփի Դավոյանը իբր կսմիթեց.«Այն ամենը,ինչ պետք էր իմանալ ընդդիմության մասին կամ էս էլ իմացանք»։ Կարելի է պատկերացում կազմել իշխանության ՝ ընդդիմության մասին պատկերացումները, ընդդիմություն է այն, ով պարում է իշխանության նվագի տակ, ընդդիմություն է այն ուժը, որը ուռա բացականչություններով է արձագանքում իշխանության ամենախելահեղ նախաձեռնությանը, թեկուզ, որ այդ նախաձեռնությունը խելագարության կանխավարկածով է փորձում կյանքի կոչվել:

Այսպիսով՝ իշխանական Իմ Քայլում ԲՀԿ-ի որոշումը խառնաշփոթ էր առաջացրել, Նիկոլ Փաշինյանի թիմում համոզված էին, որ իրենց առաջնորդի եւ ԲՀԿ ղեկավարի հանդիպում-բանակցությունների արդյունքում Գագիկ Ծառուկյանը կապահովի այս հարցի շուրջ կոնսենսուս, ինչը խիստ կարեւոր էր իշխանության համար: Բայց ԲՀԿ-ում հասկացան, որ ապագայում այս հակաիրավական նախաձեռնությունը թանկ կնստի իրենց վրա, ճիշտ ժամանակին հետքայլ արեցին:

Իմ Քայլում մտահոգություններ ունեն՝ կկարողանան արդյոք ապահովել պահանջվող թվով ձայները, թե ոչ: Խմբակցությունում տարբեր շահեր, տարբեր դիրքորոշումներ ունեցող խմբեր կան եւ շատ հնարավոր է փակ քվեարկության արդյունքում բոլորովին այլ թվաբանություն ստացվի, հատկապես, որ ԼՀԿ-ի վրա էլ հույս դնել չի լինի, հույս կա, որ խմբակցությունը դեմքը փրկելու համար չի կատարի իշխանության կամքը եւ կլինեն նաեւ դեմ քվեարկողներ: Ամենայն հավանականությամբ վաղը նախագիծը կդրվի քննարկման: Հրահանգվել է բոլորին կազմ-պատրաստ ներկայանալ նիստերին, նախ ակտիվ մասնակցել քննարկմանը, իսկ որ ամենակարեւորն է՝ չբացակայել քվեարկությունից: Ինչպես հայտնի է հետ է կանչվել նաեւ ԵԽԽՎ հայաստանյան պատվիրակության իշխանական կազմը, որպեսզի բացականեր չլինեն:

Անի Սահակյան