Փաշինյանի «բոլոլան» կհասնի՞ Վազգեն Սարգսյանին
Իշխանությունը շարունակում է գնալ քրեական գործեր հարուցելու ճանապարհով։ Հատկապես ԱԱԾ տնօրենի պաշտոնից Արթուր Վանեցյանի հեռանալուց հետո կարծես երկրորդ «շնչառություն» է բացվել» իշխանության մոտ։
Քրգործեր են հարուցվում ոչ միայն նախկին պաշտոնյաների նկատմամբ, այլեւ դրանցում ընդգրկում հանգուցյալների անուններ՝ Գեւորգ Մհերյանի, Հայկ Հարությունյանի․․․ Տպավորություն է, որ հանրապետությունում անմեղ մարդ գոյություն չունի ու եթե այսպես շարունակվի, ապա մի օր մեզանից ցանկացածը կարող է հայտնվել մեղադրյալի աթոռին։ Իշխանությունների այս վարքագիծը խրախուսվում Նիկոլ Փաշինյանին կից գործող քաղհասարակության ներկայացուցիչների կողմից։ Մի քանի օր առաջ «Իրազեկ քաղաքացիների միավորում» ՀԿ նախագահ Դանիել Իոաննիսյանը, որը բոլորովին վերջերս կառավարության որոշմամբ մեծ դրամաշնորհ ստացավ Արցախում դիտորդություն իրականացնելու նպատակով հետաքրքրական գրառում էր արել․«Փնտրվում է նախկին ոստիկանապետ, ով հանցագործություն չի գործել, նախկին պաշտպանության նախարար, ով հանցագործություն չի գործել: Գտնողին խոստանում ենք դրամական պարգև ու մեղադրանք: Ցուցակը ենթակա է լրացման»:
Իոաննիսյանի հեգնական ակնարկը, անշուշտ, հասկանալի է, մարդն ասում է, որ չկա այդպիսի բարձրաստիճան պաշտոնյա։ Բայց այս գրառումը ավելի հետաքրքրական է այն համատեքստում, թե արդյոք Իոաննիսյանի ակնարկը նաեւ սպարապետ Վազգեն Սարգսյանին էր ուղղված։ Նախ հստակեցնենք, որ եթե իշխանությունը որոշակի վերապահումներ ունենար Իոաննիսյանի այս գրառման հարցում, ապա չկասկածեք, որ այն անմիջապես կհեռացվեր նրա էջից, եթե մնում է, նշանակում է, որ համաձայն են եթե կուզեք թեկուզ այս «սեւ հումորի» հետ։ Եւ ուրեմն հետաքրքիր կլնի այս հարցում լսել Նիկոլ Փաշինյանի մեկ այլ մոլի աջակից Արամ Սարգսյանի կարծիքը, ինքն էլ է համաձայն իշխանական այն գծի հետ,որ նախկինների արդարը, ազնիվը, մաքուրն ու հայրենասերը չի լինում, որ բոլորը մեղսավոր են եւ հատկապես նախկին պաշտպանության նախարարեներն ու ոստիկանապետները։
Օրինակ Արամ Սարգսյանն այնպիսի հարցում է անգամ աջակցություն հայտնում իշխանություններին, որ նույնիսկ իշխանության պատասխանատուները համաձայն չեն։Խոսքը Ամուլսարի շահագործման հարցի մասին է։ Արամ Սարգսյանի կարծիքով՝ վիճահարույց Ամուլսարի հարցում վարչապետ Նիկոլ Փաշինյանը պետք է կամային որոշում կայացնի եւ շարունակի հանքի շահագործումը։ Սարգսյանը ասում է, որ Հայաստանում հանքարդյունաբերությունը պետք է վերածել լեռնամետալուրգիայի։
Այդուհանդերձ, առանց Իոաննիսյանի գրառման էլ Արամ Սարգսյանին պետք է վաղուց հայտնի լիներ Փաշինյանի՝ իր եղբոր նկատմամբ ունեցած վերաբերմունքը։ Դեռեւս Վազգեն Սարգսյանի 60-ամյակից, երբ այդպես էլ անհայտ մնաց, թե ինչու Փաշինյանը շնորհավորական ուղերձ չհղեց։
Անի Սահակյան
Հետևեք մեզ Viber-ում
