Շտաբի պետին հրավիրենք, տեսնենք՝ ինչ է կատարվում բանակում.Բագրատյան

ՀԱԿ խմբակցության պատգամավոր, նախկին վարչապետ Հրանտ Բագրատյանն ԱԺ լիագումար նիստում առաջարկում է խորհրդարան հրավիրել Պաշտպանության նախարար Սեյրան Օհանյանին ու Զինված ուժերի գլխավոր շտաբի պետ Մովսես Հակոբյանին՝ քառօրյա պատերազմի ժամանակ հայկական կողմի թույլ տված սխալների մասին խոսելու համար: Հրանտ Բագրատյանը նկատում է՝ քսան օր առաջ ավարտված չորսօրյա պատերազմը ստիպում է, որ անդրադառնանք օրակարգում ընդգրկված ավելի լուրջ հարցերի. «Մենք բողոքում ենք, թե հին զենքեր են եղել ու դատապարտում ենք, սակայն այդ զենքերից չէ, որ զոհ ենք տվել: Զոհ ենք տվել, քանի որ երեկոյան ժամը ութից հետո զինվորը չի տեսնում, չկա համապատասխան սարքավորումներ: Բանակի ղեկավարման որակի հետ կապված լուրջ խնդիրներ ունենք: Շտաբի պետին պետք է հրավիրենք, տեսնենք՝ ինչ է կատարվում բանակում: Օլիգարխներն այսօր ջիփերով են ման գալիս: Հրատապ կարգով այս հարցը պետք է մտցնել ու քննարկել, թե նույնիսկ եղած գումարներն ինչ արդյունավետությամբ են օգտագործվում»: Նա նաև հարցրեց՝ արդյո՞ք պաշտպանությանը տրված գումարներն արդյունավետ են ծախսվում: ԱԺ փոխնախագահ Էդուարդ Շարմազանովն էլ պատասխանեց, թե չի կարծում, որ նման հարցերը պետք է հրապարակային քննարկել: «Ես կարծում եմ, որ նման նուրբ հարցերն այսպես չեն քննարկվում: Մենք ձեր առաջարկությամբ, տիկին Զոհրաբյանի առաջարկությամբ, այստեղ կազմակերպել ենք փակ քննարկումներ, ներկա է եղել Պաշտպանության նախարարի առաջին տեղակալը, նրան քառասունվեց հարց է հղվել, խիստ հարցեր ու չկա մի հարց, որ իրենք պատրաստ չեն քննարկել: Նպատակահարմարության մասին պետք է խոսենք: Չեմ կարծում, որ նման քննարկումը կօժանադակի, որ օր առաջ ավելի լավ լուծենք մեր խնդիրները»,- նշեց Շարմազանովը: