Ալիևի դիվերսիան վերադառնում է

Արցախի պաշտպանության նախարարությունը հաղորդում է ադրբեջանական կողմի դիվերսիոն ներթափանցման փորձի ձախողման մասին: «Սեպտեմբերի 22-ին՝ ժամը 16:15-ի սահմաններում, արցախա-ադրբեջանական հակամարտ զորքերի շփման գծի հարավ-արևելյան հատվածում տեղակայված մարտական դիրքերից մեկի ուղղությամբ հակառակորդը ձեռնարկել է դիվերսիոն ներթափանցման փորձ», - ասված է ՊԲ մամուլի ծառայության տարածած հաղորդագրությունում: - «ՊԲ դիրքապահ անձնակազմի գրագետ գործողությունների արդյունքում՝ հակառակորդը, չեզոք գոտում թողնելով մեկ դիակ, հետ է շպրտվել իր ելման դիրքերը: ՊԲ-ն որևէ կորուստ չի ունեցել»: ՊԲ մամուլի ծառայությունը նշել է, որ դիվերսիոն ներթափանցման փորձի որոշ դրվագներ արձանագրվել են ՊԲ տեսանկարահանող սարքերի կողմից:

«Որևէ արտառոց բան տեղի չի ունեցել: [Տեղի է ունեցել] այն, ինչ միշտ տեղի է ունենում, որովհետև մենք նույն հակառակորդը ունենք նույն տեսլականով, նույն ցանկություններով, նույն ծրագրերով, նույն նպատակներով», - նշեց Լեռնային Ղարաբաղի նախագահի խոսնակ Դավիթ Բաբայանը:

Նա չի բացառում, որ ադրբեջանական կողմը փորձում է սրել իրավիճակը սահմանին Հայաստանի և Ադրբեջանի արտգործնախարարների հանդիպմանն ընդառաջ։
Զոհրաբ Մնացականյանը և Էլմար Մամեդյարովը հանդիպելու են Նյու Յորքում, որտեղ նրանք երկուսն են մասնակցում են ՄԱԿ-ի գլխավոր ասամբլեային։

Հայտնի է, որ սովորաբար Ադրբեջանը նման հանդիպումների նախօրեին դիմում է այդպիսի քայլերի: Սա արդեն ավանդական քաղաքականություն է:

Ղարաբաղի պաշտպանության բանակի հաղորդագրությունից որոշ ժամանակ անց Ադրբեջանը հաստատեց զինծառայողի մահը։ Ադրբեջանի պաշտպանության նախարարությունը հաստատել է զինծառայող Ռամին Աբդուրախմանովի մահը: Ըստ ադրբեջանական կողմի՝ զինվորը մոլորվել է և սպանվել հայկական ուժերի կողմից չեզոք գոտում:

Մինչդեռ հայկական կողմը ավելի վաղ հաղորդել էր ադրբեջանական կողմի դիվերսիոն ներթափանցման փորձի մասին, որը, ըստ Ղարաբաղի պաշտպանության նախարարության, ձախողվել էր:

Դիվերսիայի փորձի մասին տեղեկությունը Ադրբեջանի պաշտպանության նախարարությունը հերքում է, սակայն Ղարաբաղի Պաշտպանության բանակի մամուլի ծառայությունը հայտնել է, որ դիվերսիոն ներթափանցման փորձի որոշ դրվագներ արձանագրվել են ՊԲ տեսանկարահանող սարքերի կողմից:
Ադրբեջանական կողմը նաև հայտնում է, որ զինվորի մարմինը չեզոք գոտուց դուրս բերելու համար դիմել է Միջազգային Կարմիր խաչի կոմիտեին:

Նշենք, որ ՊԲ–ն որևէ կորուստ չի ունեցել։ Ի դեպ, 2019թ. հունվարի 1-ից մինչ օրս բաց աղբյուրներից հայտնի է դարձել Ադրբեջանի զինված ուժերի և այլ ուժային կառույցների 31 կորստի մասին։

Թերևս, առաջին անգամ Փաշինյանի հետ բանակցություններից առաջ ադրբեջանական կողմը դիվերսիոն գործողությունների դիմում: Նշանակում է՝ Բաքվի համար առկա է բանակցությունները տապալելու «հիմնավոր» պատճառ:

Այսինքն, ամեն ինչ Ադրբեջանի համար կրկին մտնում է նախկին ռեժիմ՝ դիվերսիաների, հարձակումների ու անկանխատեսելիության փուլ:

Թամար Բագրատունի