Լավրովի հետ տարածքային զիջումների հարց չի քննարկվել. ՀՀ ԱԳ նախարար
Ադրբեջանը ստիպված է լինելու վերադառնալ բանակցությունների, քանի որ բանակցություններն այլընտրանք չունեն: Այս մասին ապրիլի 24-ին Ծիծեռնակաբերդ հուշահամալիրում լրագրողների հետ զրույցում ասել է ՀՀ արտգործնախարար Էդվարդ Նալբանդյանը: Նրա խոսքով Ադրբեջանը բանակցություններում պարտություն է կրել, դրա համար էլ փորձել է գտնել խնդրի լուծման ռազմական ուղիներ, բայց ռազմական ուղին էլ է ձախողվել: Ռուսաստանի արտգործնախարար Սերգեյ Լավրովի հետ հանդիպման ընթացքում, ըստ Նալբանդյանի, չի քննարկվել տարածքային զիջումների հարցը: «Կան առաջարկներ եռանախագահների կողմից, որոնք արվել էին Ռուսաստանի, Միացյալ Նահանգների եւ Ֆրանսիայի նախագահների մակարդակով հինգ հայտնի հայտարարությունների մեջ, որոնց հիման վրա Հայաստանը բազմիցս է հայտարարել, որ կարող է շարունակել բանակցությունները, կարող է գնալ կարգավորմանը, իսկ Ադրբեջանը անտեսում է դրանք: Սա է իրականությունը, եւ սա է պատճառը, որ միջազգային հանրությունը պետք է փորձի հնարավորինս անել, որպեսզի Ադրբեջանին բերի կառուցողական դաշտ»,-ասել է նախարարը: Նրա խոսքով, կարգավորումը լինելու է այն հիմքի վրա, ինչի մասին բազմիցս հայտարարել է Հանրապետության նախագահը, նաեւ արտգործնախարարը։ «Նոր բաներ պետք չէ հնարել։ Արված առաջարկները եթե ձեռնտու լինեին Ադրբեջանին, ապա նա ինքն իրեն չէր մտցնի փակուղու մեջ եւ չէր գնա նոր ռազմական գործողությունների։ Ադրբեջանը ձախողվեց բանակցություններում, այդ պատճառով փորձեց ռազմական ճանապարհով ինչ-որ լուծումներ գտնել, ռազմական ճանապարհով էլ ձախողվեց: Բաքուն ստիպված է լինելու վերադառնալ բանակցությունների սեղան, որովհետեւ այլընտրանք չկա, այլ ճանապարհ չկա, բանակցությունները պետք է շարունակվեն»,-ընդգծել է Նալբանդյանը:
Հետևեք մեզ Viber-ում
