Ինչու Պուտինը լռեց, իսկ Թրամփն ու Մակրոնը հիշեցին Արցախի մասին

Անկախության տոնի առթիվ Հայաստանի իշխանությունները շնորհավորական ուղերձներ ստացան:

Վարչապետ Նիկոլ Փաշինյանին Անկախության տոնի առթիվ շնորհավորական ուղերձ է հղել Ամերիկայի Միացյալ Նահանգների նախագահ Դոնալդ Թրամփը: Ուղերձում մասնավորապես նշված էր. «Միացյալ Նահանգները ողջունում է մեր երկրների սերտ համագործակցությունը և ժողովրդավարական ու տնտեսական բարեփոխումներին միտված Ձեր կառավարության հանձնառությունը։ Մենք զորավիգ ենք իրավունքի գերակայությունը հարգող կոռուպցիայից զերծ ժողովրդավարական երկրում ապրելու հայ ժողովրդի ցանկությանը, որն արտահայտվեց անցած տարի Հայաստանով մեկ տեղի ունեցած խաղաղ գործողությունների ընթացքում։ Մենք ողջունում ենք Մինսկի խմբի գործընթացի շրջանակում Լեռնային Ղարաբաղի հակամարտությանը խաղաղ ու տևական լուծում գտնելու հարցում Ձեր անձնական ներգրավվածությունը»։

ԱՄՆ-ը՝ ԵԱՀԿ Մինսկի խումբը համանախագահող պետություն է, և բոլորովին էլ պատահական չէ, որ ԱՄՆ նախագահն իր ուղերձում հիշատակում է Լեռնային Ղարաբաղի մասին, ավելին՝ շեշտում է Փաշինյանի գործոնը: Թրամփն այսպիսով, ընդգծում է, որ ԼՂ խնդիրը համարում է օրակարգային հարց՝ ամերիկյան վարչակազմի համար:
Անկախության տոնի առթիվ վարչապետ Նիկոլ Փաշինյանին շնորհավորական ուղերձ է հղել Ռուսաստանի նախագահ Վլադիմիր Պուտինը: Դրանում, մասնավորապես ասված է. «Գոհունակությամբ եմ ընդգծում ռուս-հայկական հարաբերությունների բարեկամական, դաշնակցային բնույթը: Վստահ եմ, որ համատեղ ջանքերով մենք կկարողանանք է՛լ ավելի ամրապնդել երկկողմ կառուցողական համագործակցությունը քաղաքական, առևտրատնտեսական, հումանիտար և այլ ոլորտներում, ինչպես նաև ընդլայնել գործընկերային փոխգործակցությունը Եվրասիական ինտեգրացիոն գործընթացների շրջանակում: Դա, անկասկած, համապատասխանում է մեր եղբայրական ժողովուրդների շահերին, համահունչ է կովկասյան տարածաշրջանում կայունության և անվտանգության ապահովմանը»:

Խոսելով կովկասյան տարածաշրջանի կայունության և անվտանգության մասին` Պուտինը սովորաբար չի հիշատակում Լեռնային Ղարաբաղի թեման: Իսկ ահա Ֆրանսիայի նախագահը՝ այն հիշատակել է:

Նախագահ Արմեն Սարգսյանին Հայաստանի Անկախության տոնի առթիվ շնորհավորական ուղերձ է հղել ԵԱՀԿ Մինսկի խմբում մյուս համանախագահող պետության՝ Ֆրանսիայի նախագահ Էմանյուել Մակրոնը։ Նա նշել է. «Այն պահին, երբ Ձեր երկիրը բռնել է աննախադեպ փոփոխությունների ուղին, ուզում եմ Ձեզ վստահեցնել Ֆրանսիայի աջակցությունը կառավարության կողմից ձեռնարկված ծավալուն բարեփոխումների իրականացմանը, մասնավորապես մեր պատրաստակամությունը՝ Եվրոպական միության և Եվրոպայի Խորհրդի հետ համագործակցաբար, պաշտպանելու իրավական պետության ամրապնդմանն ուղղված նախաձեռնությունները: Պատրաստակամ եմ Ձեզ հետ աշխատելու մեր երկու երկրների միջև գերազանց քաղաքական հարաբերությունները խորացնելու և մեր համագործակցությունն ամրապնդելու ուղղությամբ: Շարունակելու եմ իմ աջակցությունը բերել մեր համատեղ ծրագրերին համալսարանական, կրթական, մշակութային և գիտական ոլորտներում»: Ապա` նա հավելել է. «Կցանկանայի Ձեզ կրկին հայտնել Ֆրանսիայի հանձնառությունը և վճռականությունը, որպես Մինսկի խմբի համանախագահ՝ նպաստելու Լեռնային Ղարաբաղի հակամարտության արդար և տևական կարգավորմանը՝ ի շահ տարածաշրջանի կայունության և ժողովուրդների բարօրության»:

Ինչու՞ Պուտինը չի նշում Արցախի մասին, իսկ Թրամփն ու Մակրոնը՝ հիշատակում են Լեռնային Ղարաբաղի հակամարտության մասին...

Խաղաղ բանակցություններով որևէ արդյունքի հասնելու հարցում, թերևս, ԱՄՆ-ն ու Ֆրանսիան ունեն որոշակի հույսեր, մինչև Մոսկվան լավ գիտե, որ հարցը ունի առավելապես «ուժային» լուծում: Ընդ որում՝ կամ՝ ռազմաճակատում, կամ՝ ճնշման եղանակով:

Թամար Բագրատունի