Նիկոլ Փաշինյանը «մսաղացը» պահել է բոլոր նախկինների համար

Կադրային քաղաքականությունը բոլոր ղեկավարների համար եղել է եւ աքիլեսյան գարշապարը եւ փրկօղակը: Ղեկավարները քննադատվել են ոչ պրոֆեսիոնալ, իրենց գործից չհասկացող կադրեր ընտրելիս, մյուս կողմից՝ վատ արդյունքների դեպքում իրենք են կադրերին դարձրել փրկօղակ՝ կատարվածի ողջ պատասխանատվությունը դնելով կադրերի վրա: Կադրային քաղաքականության հարցում անհասկանալի չափորոշիչներով է առաջնորդվում Նիկոլ Փաշինյանը, ոչ միայն այն պատճառով, որ հեկտարների մասին տարական պատկերացում չունեցող պաշտոնյային կարող է հանդուրժել բարձր պաշտոնում միայն այն պատճառով, որ իր հետ քայլել է հեղափոխության օրերին ու նաեւ հեղափոխության սիմվոլներից է, եւ ընդհանրապես նման անտեղյակների վստահել պատասխանատու ոլորտներ միայն այս <<շնորհի>> համար, այլեւ որ մոլի հեղափոխականների կողքին իսկզբան տեղ տվեց նախկին <<ռեժիմի>> կարկառուն ներկայացուցիչներին, որոնք փոփոխությունն իր ձեռքում էր, բայց Նիկոլ Փաշինյանը չնախընտրեց նրանց հեռացնել համակարգից: Նույն գլխավոր դատախազ Արթուր Դավթյանը, Վալերի Օսիպյանը, Արթուր Վանեցյանը, Ֆելիքս Ցոլակյանը եւ այլք: Անշուշտ, ավելի քան պարզ է դառնում, թե ինչու է Նիկոլ Փաշինյանը նրանց պաշտոններ տվել: Առաջին պատճառը թերեւս այն է, որ անսպասելի հեղափոխությունից հետո նա կադրերի խնդիր ուներ, եւ ասենք օրենքը թույլ չէր տալիս իր հետ քայլածներին նշանակել ուժային պաշտոններում, կամ չուներ համապատասխամ կադրեր այլ նախարարությունների համար, դրա համար էլ տեղ տվեց նախկիններին: Հաջորդ պատճառն այն էր, որ հեղափոխությունից հետո Նիկոլ Փաշինյանը նախկին համակարգը քայքայելու գործը ըստ երեւույթին ցանկանում էր իրականացնել հենց նախկինների ձեռքով, որոնք ավելի լավ էին տիրապետում համակարգին , քան Նիկոլ Փաշինյանն ու իր ցանկացած նորաթուխ պաշտոնյա:
Եւ երբ ամեն ինչ ընկավ իր հունի մեջ, գնացքը մեխանիկորեն սկսեց ընթանալ ռելսերի վրա, Նիկոլ Փաշինյանը որոշեց, որ ժամանակն է ազատվել նախկիններից, որոնց նկատմամբ կասկածները ըստ էության նրան հանգիստ չեն թողել հենց առաջին օրվանից: Իհարկե, նա երբեւէ ցույց չի տվել այդ պաշտոնյաների նկատմամբ իր վերաբերմունքը, ճիշտ հակառակը հարկ եղած ժամանակ նրանց գովաբանությամբ է զբաղվել, երկու ամիս առաջ էլ գեներալի կոչումներ շնորհեց Վանեցյանին ու Օսիպյանին, բայց երբ պահը հասունացավ , նա նրանց հեռացնելու որոշման հարցում չհապաղեց: Այնպես որ, սա պետք է դաս լինի բոլոր նրանց համար, որոնք հարմարավետ տեղավորվել են նոր իշխանության տաքուկ անկյուններում ու կարծում են, որ լեզու են գտել նորերի հետ: Ձեր ժամանակը նույնպես չի ուշանալու, եթե դուք ձեր պաշտոնում եք, ապա նորերը դեռ ձեզ օգտագործելու հնարավորությունը սպառված չեն տեսնում, երբ կտեսնեն, դուք մեկ րոպե ավել չեք մնալու ձեր դիրքերում:

Անի Սահակյան