Հայաստանում ու Արցախում վտանգ են զգացել
Հայաստանի ԱԳՆ-ն երեկ հայտարարություն է տարածել` Ադրբեջանի արտաքին գործերի նախարարության հայտարարությանն ի պատասխան: «Առաջին անգամ չէ, որ Բաքուն ապարդյուն փորձեր է կատարում՝ խեղաթյուրելու ակնհայտ իրականությունը։ Մեր միջազգային գործընկերները ևս շփումների ընթացքում փաստում են, որ, անկասկած, հենց Ադրբեջանն է իրականացրել լայնածավալ հարձակում Լեռնային Ղարաբաղի հետ շփման գծի ողջ երկայնքով, որի հետևանքով հարյուրավոր մարդիկ են զոհվել և վիրավորվել, կատարվել են ռազմական հանցագործություններ։ Հայաստանը խստորեն դատապարտում է 1994թ. մայիսին Ադրբեջանի, Լեռնային Ղարաբաղի և Հայաստանի միջև զինադադարի մասին անժամկետ եռակողմ համաձայնագիրը կասկածի տակ դնելու Ադրբեջանի ապարդյուն փորձերը, ինչը վտանգավոր քայլ է և սպառնում է առավել ապակայունացնել իրավիճակը տարածաշրջանում։ Ապրիլի սկզբին Ադրբեջանի կողմից ագրեսիվ ռազմական գործողությունների սանձազերծումը ոչ թե հանգեցնում է զինադադարի համաձայնագրի գործողության դադարեցմանը, այլ բերում է համաձայնագիրը խախտող կողմի պատասխանատվությանը», նշվում է հայտարարությունում։ Այնուհետև, ԱԳՆ-ն փաստում է` Բաքվին սթափեցնելու համար այլևս բավարար չեն կոչերն ու հորդորները, հարկավոր են հստակ քայլեր՝ Ադրբեջանին կարգի հրավիրելու և կառուցողական դաշտ բերելու նպատակով։ Երեկ ակտիվ էր նաև Ստեփանակերտը: ԼՂՀ ԱԳ նախարարը ներկայացրել է Արցախի պաշտոնական դիրքորոշումը Մադրիդյան սկզբունքների նկատմամբ: Արցախյան կողմից բազմիցս պաշտոնապես հնչեցվել է, որ հակամարտության կարգավորման բանակցությունների ընթացքում առաջ քաշված ցանկացած փաստաթուղթ այդ թվում և Մադրիդյան սկզբունքներն առանց պաշտոնական Ստեփանակերտի ուղղակի մասնակցության, կիրառման առումով կենսունակ լինել չեն կարող, ԼՂՀ Ազգային ժողովի լիագումար նիստում կառավարության հետ հարցուպատասխանի ժամանակ ասել է ԼՂՀ արտգործնախարար Կարեն Միրզոյանը՝ պատասխանելով Մադրիդյան սկզբունքների նկատմամբ Արցախի պաշտոնական դիրքորոշման վերաբերյալ պատգամավորական հարցին: Կարեն Միրզոյանը գալով հարցին՝ ռուսական «Իզվեստիա» թերթի հրապարակմամբ շրջանառվող այն տեղեկատվության վերաբերյալ, որ գոյություն ունի հակամարտության կարգավորման «Պուտինի» կամ «Լավրովի» փաստաթուղթ, նշել է. «Մեր քաղաքականությունն իրականացնելիս մենք չենք առաջնորդվում մամուլի հրապարակումներով: Կոչ կանեի, որպեսզի բոլորն էլ որպես հիմք ընդունեին միայն պաշտոնական հայտարարությունները»,- ընդգծել է ԼՂՀ արտգործնախարարը: Հաշվի առնելով Հայաստանից ու Արցախից հայտարարությունների ուղղվածությունը, տպավորություն է ստեղծվում, որ հայկական կողմը մեծ անհանգստություն ունի: Դա իհարկե, նախևառաջ կապված է Լավրովի այցի հետ, որն այսօր Երևանում բանակցություններ է վարում: Բանն այն է, որ հրադադար կոչվածով Մոսկվան ընդամենը դադար է վերցրել Ալիևի համար, ու անցել գործի... Հիմա Ռուսաստանը ներկայացնելու է իր «գաղափարները», ու դատելով Հայաստանի և Արցախի տարբեր իշխանավորների հայտարարություններից, տողատակերում զգացվում է, որ հայկական կողմը ինչ-որ վտանգ է զգացել: Իսկ դա նշանակում է, որ միջնորդներն այս փուլում սպասելու են Սերժ Սարգսյանի պատասխանին` «այո՞», թե՞ «ոչ»... Միաժամանակ, միջազգային հանրությունը շարունակվում է բավական ինտենսիվ հայտարարություններ անել ԼՂ խնդրի շուրջ: Լեռնային Ղարաբաղի հակամարտությունը չի կարող ռազմական լուծում ունենալ, հինգշաբթի օրը հայտարարել է ՆԱՏՕ-ի գլխավոր քարտուղարի տեղակալ Ալեքսանդր Վերշբոուն: «Լեռնային Ղարաբաղի հակամարտությունը շտապ կարիք ունի դեէսկալացիայի և դիվանագիտական առաջընթացի` ԵԱՀԿ Մինսկի խմբի հովանու ներքո»,- Twitter-ի իր էջում հայտնել է Վերշբոուն Բրյուսելում Հայաստանի պաշտպանության նախարարի առաջին տեղակալ Դավիթ Թորոսյանի հետ հանդիպումից հետո: Կբախվե՞ն արդյոք Արևմուտքի և Ռուսաստանի շահերը ղարաբաղյան խնդրում` ցույց կտա ժամանակը: Թերևս, այս փուլում, Արևմուտքին և Ռուսաստանին ձեռնտու է ոչ մի դեպքում նոր ռազմական գործողությունների վերսկսումը թույլ չտալ: Իսկ թե ինչ կհետևի դրան, իսկապես, դժվար է կանխատեսել... Մետաքսյա Շալունց
Հետևեք մեզ Viber-ում
