Ռոբերտ Քոչարյանի` կալանքի տակ գտնվելն ու նրա նկատմամբ քրեական հետապնդումն անօրինական է. Ալումյան (video)
«Սահմանադրական դատարանի իրավական դիրքորոշումը պարտադիր է բոլորի համար, առաջին հերթին` դատարանների: Որոշման մեջ առկա են իրավական դիրքորոշումներ, որոնցից ուղղակիորեն հետևում է, որ առ այս պահը պարոն Քոչարյանը կալանքի տակ գտնվել է ապօրինաբար և առ այս պահը նրա նկատմամբ քրեական հետապնդումն իրականացվել է ապօրինաբար: Գիտեք Սահմանադրության այն դրույթը, ըստ որի պաշտոնաթող նախագահը պատասխանատվություն չի կարող գործողությունների համար, որոնք կատարել է իր պաշտոնավարման ժամանակ և բխել են որպես նախագահ նրա կարգավիճակից: Այդ սահմանադրական դրույթը որևէ մեկի մոտ կասկած չի առաջացրել: Այլ բան է, որ ներպետական դատարաններում եղել են տարբեր կարծիքներ այն մասին, թե պարոն Քոչարյանին վերագրվող գործողությունները բխել են նրա կարգավիճակի՞ց, թե ոչ»,-լրագրողների հետ հանդիպմանը հայտարարեց ՀՀ երկրորդ նախագահ Ռոբերտ Քոչարյանի պաշտպաններից Հայկ Ալումյանը՝ խոսելով Քոչարյանի գործով ՍԴ որոշման մասին:
Անցած տարի օգոտոստին Վերչաքննիչի դատավոր Ազարյանը եկավ եզրահանգման, որ այո՝ բխել են և ազատ արձակեց Քոչարյանին: Դրանից հետո Վճռաբեկը բեկանեց որոշումը, սակայն վերջնական եզրահանգման չեկավ՝ խնդիրը թողնելով Վերաքննիչ քրեական դատարանին: Իսկ անցած տարի դեկտեմբերի 7-ին Վերաքննիչի դատավոր Հովիկ Մխիթարյանը եկավ եզրակացության, որ մեղսագրվող գործողությունները Քոչարյանի կարգավիճակից չեն բխել»:
Փաստաբանը նշեց, որ Սահմանադրական դատարանն այս մասով ասում է, որ չկա մարմին և ընթացակարգ, որից ներկա կարգավորումների պայմաններում կարելի կլինի հետևության գալ, թե պաշտոնաթող նախագահին որևիցե քրեական գործով վերագրվող գործողությունները բխում են նրա կարգավիճակից, թե ոչ. «Եթե չկա նման մարմին, չի կարող օրինական լինել որևէ դատարանի որոշում, որտեղ ասված է, որ Քոչարյանի կարգավիճակից չի բխել այն, ինչը նրան վերագրվում է: Չկա պետական մարմին, որը կարող է ասել, որ մեղասգրվող գործողությունների մասով Քոչարյանն անձեռնմխելի չէ: Սա ՍԴ-ի որոշումի գլխավոր մեսիջներից մեկն է, որը պարտադիր է բոլոր դատարանների համար»:
Հետևեք մեզ Viber-ում
