Որտեղ էր Էդվարդ Նալբանդյանը ապրիլյան պատերազմի օրերին. պարզաբանում

ՌԴ ԱԳ նախարար Սերգեյ Լավրովի հետ համատեղ ասուլիսի ժամանակ Հայաստանի ԱԳ նախարար Էդվարդ Նալբանդյանը՝ անդրադառնալով հարցին, թե որտեղ էր ապրիլյան քառօրյա պատերազմի ընթացքում եւ հետո,հայտարարեց. «Եթե այդ քննադատները կարծում են, որ այն բոլոր քայլերը որ անում է հայկական դիվանագիտությունը եւ հայ դիվանագետները, մենք պետք է հրապարակենք, ապա հեռու են դիվանագիտության էությունից կամ մեր աշխատանքի բնույթի ընկալումից: Այստեղ խոսքը գաղտնիի կամ ոչ գաղտնիի մասին չէ, այլ ավելի արդյունավետ աշխատանքի:Եթե այդ նույն քննադատները նայեն ԱԳՆ-ի կայքէջը, ապա գոնե այն մասով, որ հրապարակված է, կտեսնեն, որ իրադարձություններից առաջ, ընթացքում եւ հետո ինչ է արվել: Մարտի 30-ին ես Ժնեւում էի եւ ելույթ ունեցա Սիրիայի փախստականներին նվիրված ԱԳ նախարարների հանդիպմանը: Մարտի 31-ից ապրիլի 2-ը միացա Վաշինգթոնում ՀՀ նախագահի գլխավորած պատվիրակությանը, ամսի 3-ին արդեն Երեւանում ընդունում էի մի շարք պատվիրակությունների, ներառյալ Կնեսեթի պատվիրակությանը: Ամսի 4-ին Փարիզում Ֆրանկոֆոնիայի գլխավոր քարտուղարի հետ էի հանդիպում եւ համապատասխան փաստաթղթեր ստորագրում: Ամսի 5-7-ը Բեռլինում էի ՀՀ նախագահի հետ պաշտոնական այցելության ընթացքում, ամսի 8-ին արդեն Մոսկվայում հանդիպում էի Լավրովի եւ Բորդյուժայի հետ, ԱՊՀ երկրների ԱԳ նախարարների հանդիպմանն էի մասնակցում, ամսի 9-ին Երեւանում ընդունում էի եռանախագահողներին, դրանից հետո ՄԱԿ-ի գլխավոր քարտուղարի տեղակալին, դրանից հետո այցելություն Պեկին եւ այլն»: « Այդ ընթացքում ես շուրջ 4 տասնյակ հեռախոսազրույցներ եմ  ունեցել, որոնք նվիրված են եղել հենց այդ իրադարձություններին: Ինչպես ասացի, առաջին վայրկյաններից, հենց այս ագրեսիան սանձազերծվեց, առաջին կապը հաստատվել էր ԱԳ նախարար Լավրովի հետ եւ շարունակվել էին տարբեր երկրների իմ գործընկերների հետ: Սա միայն ԱԳ նախարարի մասով, բայց մեծ ծավալի աշխատանք էին կատարում ԱԳՆ մյուս բոլոր կառույցներ, նաեւ դեսպանությունները:Մենք կառուցողական քննադատությանը լրջորեն ենք մոտենում, փորձում ենք շտկել նաեւ բացթողումները, բայց բերված քննադատությունը շինծու է եւ սին»,-հավելեց նա: