ՀՀ ՊՆ ծառայողը Mercedes-ով դուրս է եկել հանդիպակաց երթևեկելի գոտի, բախվել Niva-ին. կա 4 վիրավոր

Ճանապարհային ոստիկանության 2-րդ սպայական գումարտակի 4-րդ վաշտի հետաքննիչի կողմից նյութեր են նախապատրաստվում երեկ՝ օգոստոսի 24-ին, Գեղարքունիքի մարզում տեղի ունեցած ավտովթարի փաստով: Ինչպես հայտնում է ֆոտոլրագրող Գագիկ Շամշյանը, ժամը 20:00-ի սահմաններում Ճամբարակ-Դրախտիկ ավտոճանապարհի 10-րդ կմ հատվածում բախվել են Թթու Ջուր գյուղի բնակիչ, 28-ամյա Կարեն Վ.-ի վարած ВАЗ 2121 մակնիշի 33 XX 909 համարանիշի և Ճամբարակի բնակիչ, 27-ամյա Տարոն Ա.-ի վարած Mercedes մակնիշի 36 FC 016 համարանիշի ավտոմեքենաները: Վթարի հետևանքով 2 վարորդներն ու նրանց ուղևորներ, 25-ամյա Ա. Մ.-ն, 25-ամյա Հ. Վ.-ն մարմնական վնասվածքներով տեղափոխվել են Ճամբարակ բժշկական կենտրոն: Դեպքի վայր են ժամանել ճանապարհային ոստիկանության 2-րդ սպայական գումարտակի 4-րդ վաշտի 1-ին դասակի ծառայողները՝ վաշտի հրամանատար Էդգար Սուսլիյանի գլխավորությամբ: Ժամանել է նաև ոստիկանության ճամբարակի բաժնի օպերատիվ խումբը: Օպերատիվորեն ժամանել են նաև ապահովագրական ընկերությունների ներկայացուցիչները: Ըստ նախնական տեղեկությունների՝ վթարի մեղավորը եղել է Mercedes-ի վարորդը, ով դուրս է եկել հանդիպակաց երթևեկելի գոտի և բախվել Niva-ին: Գ. Շամշյանի տեղեկություններով՝ վարորդներից Կարեն Վ.-ն աշխատում է Ճամբարակի «ՃՃՇՁ» -ում, իսկ Տարոն Ա.-ն ՝ ՀՀ ՊՆ N զորամասում: