Որևէ պետական պաշտոնյա ոչ առաջին, ոչ երկրորդ, ոչ երրորդ նախագահի օրոք այսպիսի լկտի ձևով չի շփվել լրագրողի հետ. Հարություն Հարությունյան

Երեւանի մամուլի ակումբի, Մեդիա նախաձեռնությունների կենտրոնի և այլ կազմակերպությունների նախաձեռնությամբ ԱԺ է ուղարկվել մի նախագիծ, որով, ըստ մեկնաբանությունների, 2021-ից մասնավոր հեռուստաընկերությունները պետական մուլտիպլեքսում չպետք է տեղ ունենան, պետք է գործի 5 հեռարձակող ալիք, որոնք բոլորը պետք է հանրային լինեն։ «Հրապարակ»-ի հետ զրույցում «5-րդ ալիք» հեռուստաընկերության գործադիր տնօրեն Հարություն Հարությունյանը կարծիք է հայտնել, թե բրեժնևյան ժամանակների ոգով ուզում են փակել մասնավոր հեռուստաընկերության ճանապարհը:

Կարծիքների վերաբերյալ, թե նախագծը կազմվել է հենց «5-րդ ալիք»-ի դեմ, Politik.am-ը լսել է Հարությունյանի մեկնաբանությունը: Վերջինս պնդում է՝ այդ նախագիծը դեմ է մասնավոր հեռուստաընկերություններին, և, ընդհանրապես, ազատ խոսքին, սակայն, չի կարծում, թե ուղղված է հենց «5-րդ ալիք»-ին:

«Միգուցե «5-րդ ալիքը» պատճառ է, բայց չեմ կարծում, որ հենց «5-րդ ալիք»-ի դեմ է: Միայն «5-րդ ալիքը» չէ, որ իրենց քիմքին հաճելի չէ, թեև միայն «5-րդ ալիքն» է այսօր խոսում ամեն ինչի մասին և տաբուներ չունի: Չեմ բացառում, որ եթե նախագիծն ընդունվի, 5 հաճախականություններից 2-ը կվերցնի Հանրայինը, իսկ մյուս 3-ը վարձակալության կտա այլ հեռուստաընկերությունների: Սա կարող է լինել տարբերակներից մեկը: Հանրայինը 5 ալիք ինչպե՞ս է աշխատեցնելու, եթե այսօր 1-ը չեն կարողանում նորմալ աշխատեցնել: Դա իմ կարծիքը չէ, հանրության կարծիքն ու արձագանքներն են: Սա, կարծում եմ, ավելի լուրջ և գլոբալ խնդիր է, քան միայն «5-րդ ալիքը»: Վերջապես, եթե իրենց պետք լինի, որ «5-րդ ալիքը» չլինի, այլ միջոցով կկասեցնեն աշխատանքը կամ 2021 թվականին լիցենզիա չեն տա»,-նշում է նա:

Խոսելով «5-րդ ալիք»-ի հանդեպ պետական որոշ պաշտոնյաների վերաբերմունքի մասին՝ Հարությունյանը հիշեցնում է ԱԺ նախագահ Արարատ Միրզոյանի օգնականի գրառումը, որ հարցազրույց չէր տվել հեռուստաընկերությանը միայն նրա համար, որ «5-րդ ալիքն» է:

«Սա պետական պաշտոնյայի խոստովանությունն է, թե ինչպիսին է Հայաստանում ազատ խոսքի վիճակը: Որևէ պետական պաշտոնյա ոչ առաջին նախագահի օրոք, ոչ երկրորդ նախագահի օրոք, ոչ երրորդ նախագահի օրոք այսպիսի լկտի ձևով չի շփվել լրագրողի հետ: Այսպիսի լկտի ձևով բացահայտ չեն ասել՝ «մենք այսքան կանք, որ թքած ունենք ցանկացած լրատվամիջոցի վրա, ում կուզենք՝ կտանք հարցազրույց, ու չուզենք՝ չենք տա»: Չեն ուզում, թող չխոսեն, իրենց փոխարեն այդ տեղը կտրամադրվի նրանց, ովքեր կխոսեն: Ցավալին այն է, որ այն հասարակական կազմակերպությունները, որոնք իրենց ազատ են հռչակել, մի անգամ հայտարարություն չեն անում, թե խելքներդ գլուխներդ հավաքեք, սա երկիր է»,-ասում է Հարություն Հարությունյանը:

«5-րդ ալիք» հեռուստաընկերության գործադիր տնօրենի խոսքով՝ լրագրողական համայնքի և ՀԿ-ների լռությունը շատ դեպքերում անհասկանալի է. ժամանակին ամեն փոքր խնդրի դեպքում երկար տեքստեր էին գրում, ստորագրում, այժմ լռում են անգամ մեծ խնդրի դեպքում. «Լրագրողական համայնքը արժանի է նրան, ինչին հանդիպել է: Քանի դեռ լրագրողական համայնքը համախմբված չի լինի, այս վիճակը կշարունակվի: Այժմ որոշ լրատվամիջոցներ իրենց համար տաքուկ-տաքուկ տեղավորվել են, իրենց համար հաճելի է, բայց այդպես չի լինելու: Մինչև իրենց «կոշտուկը չտրորեն», չեն հասկանա, որ այն ժամանակ պետք է համախմբված լինել: Մեղավորը լրագրողական համայնքն է: Բայց խնդիրը կա բոլոր բնագավառներում. ամենուր սևերի-սպիտակների բաժանումն է»: