Սորոսը վարչապետի նոր թեկնածուներ ունի

Նիկոլ Փաշինյանի եւ, այսպես կոչված, հեղափոխական սորոսականների ամիսներ ձգվող պայքարը կարծես թե հասել է գագաթնակետին։ Չնայած իշխանության գալուց հետո կա կարծրատիպ, որ Փաշինյանը դրան հասել է հենց Սորոսի աջակցության շնորհիվ, սակայն ներիշխանական հարաբերությունները ինչ-որ պահից ցույց տվեցին, որ սորոսականների եւ Փաշինյանի ու իր թիմի ջրերը մի առվով չեն հոսում։

Խնդիրը ոչ միայն ներանձնային է, այլեւ արտաքին քաղաքական․Փաշինյանը չի կարող հավատարիմ սիրով կապված մնալ հայտնի Սորոս պապիկին։ Արդյունքում իրենց իշխանական համակարգից հեռացվեցին ակնառու սորոսականներ Դավիթ Սանասարյանն ու Արսեն Խառատյանը, իսկ շատերի ակնկալիքներն էլ չարդարացավ եւ տեղ չգտան պետական ապարատում։ Սորոսի միակ ձեռքբերումն ըստ ամենայնի խորհրդարանական ֆրակցիան է, որտեղ սորոսականները մի ստվար զանգված են կազմում ու պարբերաբար առանձնանում իրենց տեսակետներով։ Բայց ընդհանուր առմամբ ներիշխանական հարաբերությունները այս երկու թեւերի մեջ ընթանում էր բալանսավորված մինչեւ Ամուլսարը։ Իհարկե, շատ հարցերում եւս սպասումները ցանկալի արդյունքներ չեն տվել, զորօրինակ հայ-իրականական հարաբերությունների, Սահմանադրական դատարանի, Ստամբուլյան կոնվենցիայի վավերացման եւ ընդհանրապես սեփական կադրերի չիրացված մնալու հետ կապված, սակայն Ամուլսարի շահագործման հարցը ըստ էության պայթեցրեց իրավիճակը։

Այս հարցը ճեղքեց Նիկոլ Փաշինյանի բռնապետական ջանքերի արդյունքում կուռ երեւացող ներիշխանական թիմը, զգալի հատված՝ հիմնականում սորոսականներ իրենք են ներսից ընդդիմանում իշխանությունների՝ «Ամուսլարը հանք է դառնալու» ցանկություններին։ Լենա Նազարյան, Մարիա Կարապետյան, Արսեն Խառատյան, Վարազդատ Կարապետյան, Դավիթ Պետրոսյան․ ցանկը շարունակելի է եւ բավականին ծավալուն։ Արսեն Խառատյանը նույնիսկ հրապարակային առաջարկով կոչ ուղղեց բոլոր իշխանական «ընդդիմադիրներին», առանձնանալ եւ ստեղծել «Կանաչների միություն»։ Առաջարկն ընդունողներ դեռ չկան, սակայն իրենց դիրքորոշումներից հետ կանգնողներ էլ չկան ու ակնհայտ է, որ իշխանական դաշտում անջրպետ է առաջացել։

Մեր տեղեկություններով՝ այս թեւը չի պատրաստվում նահանջել եւ եթե պետք լինի, ապա նաեւ կառանձնանա խմբակցությունից։ Բացի այդ Սորոսն ակտիվացրել է նաեւ իր ազդեցության տակ գործող Արման Բաբաջանյանին, որը տեղեկատվական տիրույթում պետք է սպասարկի իր շահերը։ Բայց սա դեռ ամենը չէ։ Նշված կենտրոնը լրջորեն քննարկում է Հայաստանում նոր իշխանություն ձեւավորելու ծրագիր՝ հասկանալով, որ Փաշինյանը հեղինակազրկվում է լույսի արագությամբ, ու եթե ոչ իրենք, ապա նախկինները կարող են օգտվել ստեղծված իրավիճակից։ Նոր վարչապետացուների շարքում այս պահին դիտարկվում է երեք անուն՝ Արսեն Խառատյան, Դավիթ Սանասարյան եւ Արման Բաբաջանյան

Անի Սահակյան