53-ամյա վարորդի դին հայտնաբերվել է ավտոմեքենայից դուրս

Այսօր՝ օգոստոսի 4-ին, մահվան ելքով ավտովթար է տեղի ունեցել Շիրակի մարզում։ Ժամը 00։30-ի սահմաններում Փարաքար գյուղի բնակիչ՝ 53-ամյա Արամ Թովմասյանը իր վարած Opel Astra մակնիշի 07 RR 997 համարանիշի ավտոմեքենայով Գյումրի-Բավրա ավտոճանապարհի 17 կմ հատվածում դուսրս է եկել ճանապարհի երթևեկելի գոտուց և մի քանի մետր գլորվելով՝ հայտնվել ձորում։

Ինչպես հայտնում է ֆոտոլրագրող Գագիկ Շամշյանը, վթարի հետևանքով վարորդ Ա. Թովմասյանը տեղում մահացել է։ Նրա դին ավտոմեքենայից դուրս հայտնաբերել են Շիրակի մարզի փրկարարներն ու ոստիկանության Ախուրյանի բաժնի ծառայողները։ Դեպքի վայր են ժամանել ճանապարհային ոստիկանության 2-րդ սպայական գումարտակի 2-րդ վաշտի 2-րդ դասակի ծառայողները՝ վաշտի հրամանատար Վաչե Մալաքյանի, դասակի հրամանատար Ռաֆայել Ասրյանի գլխավորությամբ։

Տեղում քննչական աշխատանքները ղեկավարել է Հայաստանի քննչական կոմիտեի Շիրակի մարզային քննչական վարչության քննիչ Գրիգորյանը, ում կողմից փաստի առթիվ նյութեր են նախապատրաստվում։ Քննիչի հանձնարարականով ավտոմեքենան տեղափոխվել է ոստիկանության Ախուրյանի բաժնի պահպանվող հատուկ տարածք։