Սահմանում նոր լարվածության պատճառները

Արցախի պաշտպանության նախարար, Պաշտպանության բանակի հրամանատար, գեներալ-մայոր Կարեն Աբրահամյանը նախօրեին այցելել է հյուսիսային հատվածում տեղակայված զորամասերից մեկն ու տվյալ զորամասի պահպանության տեղամասեր:
Արցախի պաշտպանության նախարարության մամուլի ծառայության հաղորդագրության համաձայն՝ Աբրահամյանը տեղում ծանոթացել է օպերատիվ-մարտավարական իրադրությանն ու բարդ աշխարհագրական պայմաններում մարտական հերթապահություն տանող զինծառայողների սոցիալ-կենցաղային պայմաններին: ՊԲ հրամանատարն անձնակազմին տվել է մի շարք ցուցումներ ու հանձնարարականներ:

Հիշեցնենք, որ օրեր հակառակորդի կրակոցից զինծառայող զոհվեց: Հուլիսի 27-ին և 28-ին Ադրբեջանի զինված ուժերը ՀՀ պետական սահմանի հյուսիս-արևելյան հատվածում դիպուկահարների ներգրավմամբ իրականացրել են սադրիչ գործողություններ, որոնց հետևանքով սպանվել է ՀՀ Զինված ուժերի զինծառայող Արման Բուլղադարյանը և վիրավորվել էին ևս երկու զինծառայողներ: Այս առիթով հայտարարություն տարածեց Հայաստանի ԱԳՆ մամուլի խոսնակ Աննա Նաղդալյանը:

Հայտարարությունում նաև ասվում էր. «Ադրբեջանի կողմից հրադադարի միտումնավոր և սադրիչ խախտումները հակասում են հրադադարի պահպանման և ամրապնդման վերաբերյալ ստանձնած պարտավորություններին, որոնք վերջին շրջանում արձանագրվել են նաև երկու երկրների ղեկավարների մակարդակով այս տարվա մարտի 29-ին տեղի ունեցած Վիեննայի գագաթաժողովի ընթացքում:

Դրանք անտեսում են նաև արտաքին գործերի նախարարների հունիսի 20-ին Վաշինգտոնում տեղի ունեցած հանդիպման արդյունքում ԵԱՀԿ Մինսկի խմբի համանախագահների ընդունած հայտարարությունը, որտեղ կողմերին կոչ էր արվում խստորեն պահպանել հրադադարը հարգելու հանձնառությունը և ձեռնպահ մնալ շփման գծում և պետական սահմանում դիպուկահարների օգտագործմամբ սադրիչ գործողություններից: Խստորեն դատապարտում ենք մարդկային զոհերի հանգեցնող այս սադրանքները, որոնք ուղեկցվում են Ադրբեջանի կողմից հրադադարի պահպանմանը և ամրապնդմանն ուղղված վստահության և անվտանգության միջոցառումների իրականացման մերժմամբ: Այս գործողությունները ստեղծում են լարվածության աճի վտանգ, որի ողջ պատասխանատվությունն ընկնում է ադրբեջանական կողմի վրա»:
Իր հերթին Ադրբեջանի ԱԳՆ-ն հայ-ադրբեջանական սահմանին լարվածության ողջ պատասխանատվությունը գցեց Հայաստանի վրա, միաժամանակ նշելով, որ քանի դեռ «ադրբեջանական հողերն ազատագրված չեն», նման միջադեպերի հավանականությունը բարձր է: Այս մասին ասել է Ադրբեջանի ԱԳՆ մամլո խոսնակ Լեյլա Աբդուլլաևան, մասնավորապես հավելելով, թե այդ հարցում այլ մեղավորներ փնտրելը ոչ այլ ինչ է, քան ինքնախաբեություն:

Այսպիսով, Բաքուն անցնում է՝ հայկական կողմի նյարդերը ստուգելու մարտավարության գործադրմանը: Կամաց-կամաց հայ-ադրբեջանական սահմանը կդառնա նյարդերի համար մղվող պայքարի ճակատ՝ պատերազմական գործողությունների բռնկման մշտական վտանգով:

Ադրբեջանը նման քայլերով ցույց է տալու, որ Փաշինյանի հետ պայմանավորվածություններն իր համար որևէ արժեք չունեն:

Թամար Բագրատունի