Պայթյուն՝ Քաբուլում. կան զոհեր

Քաբուլում ականապատ ավտոմեքենայի պայթյունի հետևանքով առնվազն 6 մարդ է զոհվել, 198 մարդ տուժել է: Այս մասին հայտնում է տեղական TOLO News հեռուստաալիքը: Պայթյունը տեղի է ունեցել Պուլ-է-Մահմուդ Հան շրջանում, որտեղ գտնվում են Աֆղանստանի պաշտպանության և ֆինանսների նախարարությունների շենքերը, ինչպես նաև ազգային անվտանգության վարչությունը: Նախնական տվյալներով՝ պայթուցիկով ավտոմեքենայի պայթյունից հետո տեղի է ունեցել փոխհրաձգություն: Շրջանն ամբողջովին շղթայված է: Աֆղանստանի ՆԳՆ պաշտոնական ներկայացուցիչը հայտարարել է, որ պայթուցիկ սարքը գործի է դրել մահապարտ-ահաբեկիչը: Հաղորդվում է, որ հարձակման պատասխանատվությունը ստանձնել է «Թալիբան» արմատական շարժումը: