Սառը ցնցուղ Նիկոլ Փաշինյանից

Արցախում ներքաղաքական  խմորումները շարունակվում են:
Սպասվող խժդժությունների մասին հայտարարեց անձամբ
ՊԲ նախկին հրամանատար Սամվել Բաբայանն, ով մի քանի ամիս է ստորագրահավաք է իրականացնում: Քանի որ  Արցախի Հանրապետության Սահամանդրության համաձայն՝ Սամվել Բաբայանը իրավունք չունի առաջադրվել նախագահի թեկնածու։ Բաբայանը ձեռնարկել է ստորագրհավաք, որով ցանկանում է փոխել սահմանադրության այն դրույթը, որն արգելում է իրեն առաջադրվել։
Բաբայանը պատրաստվում է փողոցային պայքար սկսել, հասնել արտահերթ նախագահական ընտրությունների, թույլ չտալ գործող իշխանությունը պատրաստվի ընտրություններին:
Երկար ժամանակ քննարկվում էր, թե Հայաստանի իշխանություններն ինչպես են վերաբերում Սամվել Բաբայանի ձեռնարկած պրոցեսին։ Ակնհայտ էր, որ Բաբայանը լարում է Արցախի ներքաղաքական իրավիճակը և պատարստվում ամեն կերպ իր համար ապահովել նախագահական աթոռը։ Այս մասին նա խոստովանեց նաեւ մեր եթերում, նա չհերքեց, որ նման պայքար է նախապատրաստում, ապա ասաց, որ եթե Արցախի ամբողջ ժողովուրդն էլ կանգնի, Արայիկ Հարությունյանը նախագահ չի դառնա:

Խոսքը նախկին վարչապետի մասին է, ով նախագահ դառնալու հայտ է ներկայացրել:

Չնայած Նիկոլ Փաշինյանին՝ Հարությունյանի ցուցաբերած աջակցության, այուհանդերձ փոխվստահության դեֆիցիտ կա եւ տեղեկություններ էին շրջանառվում, որ Հայաստանի իշխանությունը Սամվել Բաբայանին պահուստային գործոն է պահում:
Եւ այդ գործոնը խաղարկվելու էր ոչ ստանդարտ տարբերակով,նկատի ունենալով գործող իշխանության նկատմամբ վերաբերմունքը եւ հրապարակային տեղ-տեղ առճակատումները: Այս ամենն առաջացրել էր տեղի ԱԱԾ-ի մտահոգությունները: Պատահական չէ, որ անցած շաբաթ Արցախի ԱԱԾ-ն կոշտ հայտարարությամբ հանդես եկավ, որով կոչ էր արել ընտրական պրոցեսի մասնակցիներին՝ չխաթարել սահմանադրական կարգը։ Ակնհայտ էր, որ թիրախում Սամվել Բաբայանն էր։ Եւ ահա, այս իրավիճակում հետաքրքիր շրջադարձ տեղի ունեցավ
Հուլիսի 14-ին, Արցախի հանրապետության Ազգային ժողովում լրագրողների հետ ճեպազրույցի ժամանակ ՀՀ ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանն ասել է, որ Սամվել Բաբայանի նախաձեռնած ստորագրահավաքն իրավական տեսանկյունից խնդրահարույց դրույթ է ներկայացնում: Այս մասին հայտնում է artsakhpress.am-ը:
Սա կարելի է դիտարկել Հայաստանի արձագանքը Բաբայանի ձեռնարկած գործընթացին, որը սառը ցնցուղ է Սամվել Բաբայանի համար: Հայաստանի իշխանությունը կամ չվստահեց Սամվել Բաբայանին, կամ էլ, ի վերջո, հասկացավ, որ անկախ ներանձնային հարաբերությունների, Արցախի անվտանգության հետ խաղալն անթույլատրելի է: Իսկ զանգվածային միջոցառումներն, անկասկած, կարող են ճակատագրական դուռ բացել արտաքին հակառակորդի առջեւ:

Անի Սահակյան