Բա որ Տարոնը վատ էր աշխատում, կարգին Հայկոն ինչքա՜ն վատ է աշխատում

Երևանի քաղաքապետ Հայկ Մարությանը, civilnet.am կայքին տված հարցազրույցում անդրադառնալով աղբահանությունն իրականացնող «Սանիթեք» ընկերության աշխատանքի որակին, հայտարարել է, որ ինքը՝ իբրև քաղաքապետ, չի կարող իրականացնել այնպիսի քայլեր, որոնց հետևանքով Հայաստանը խնդիրներ ունենա միջազգային դատարանում:
Այն, որ խնդիրները վաղուց կային, ընդ որում շատ ավելի վաղուց, քան նախկին իշխանություններն ու նախկին քաղաքապետն են եղել, ճշմարտություն է: Բայց երևանցիները քաղաքապետ են ընտրել, որ այդ խնդիրներն օպտիմալ լուծում ստանան՝ անկախ նրանից, թե ժամանակին այդ խնդիրներն ում մեղքով են առաջացել և ինչու են տարիներով կուտակվել: Թաթուլ Հակոբյանի դիտարկումը, թե մարդիկ ասում են ՝Տարոնը գուցե և ուտում էր, բայց նաև գործ էր անում, իսկ Դուք գործ չեք անում, Հայկ Մարությանին նյարդայնացրեց: «Եթե գործ էր անում, ինչու է տրանսպորտն այս վիճակում, ինչու էր աղբահանությունն այս վիճակում, ինչու են մնացած բոլոր հարցերն այս վիճակում»,- հակադարձեց Մարությանը:
Տարոն Մարգարյանը գուցե իդեալական չէր աշխատում. Երևանն այն ժամանակ էլ ուներ բազմաթիվ խնդիրներ, բայց մի քանի շատ ակնհայտ փաստերից դատելով՝ վստահաբար կարելի է ասել, որ Տարոնի ժամանակ Երևանն ավելի լավ վիճակում էր, քան այսօր:
1. Տարոնի ժամանակ աղբահանության այսքան խայտառակ վիճակ չի եղել, նույն «Սանիթեք» ընկերությունն այն ժամանակ ավելի լավ էր կատարում իր պատկանությունները: Համենայն դեպս, Երևանում չկար շենք, որտեղից աղբն ամեն առավոտ չէր տարվում: Հայկ Մարությանը պնդում է, որ «Սանիթեք»-ն առաջին երկու տարին նորմալ է աշխատել, վիճակը սկել էր վատանալ արդեն 2017-ի վերջից: Երևանցիները կարող են փաստել, որ վիճակը սկսել է խայտառակ վատանալ 2018-ի ամռանը, երբ Տարոն Մարգարյանն արդեն հրաժարական էր տվել: Կարգին Հայկոն արդեն ութ ամիս է, ինչ քաղաքապետ է, բայց չի կարողանում հասնել Տարոնի ժամանակվա աղբահանության մակարդակին: Սա փաստ է:
2. Տրանսպորտի վիճակը վատ էր նաև Տարոնի ժամանակ, բայց հիմա շատ ավելի վատ է՝ ֆիզիկապես ու բարոյապես մաշված «Գազել»-ները գոնե որոշակի գրաֆիկ ապահովում էին, օրինակ՝ 20 րոպեն մեկ հաճախականությամբ աշխատում էին: Հիմա կան գծեր, որտեղ 40-րոպեն մեկ է տվյալ համարի երթուղայինը գալիս, ու վատթարացման միտումը գնալով շարունակվում է: Շատ գովելի է, որ քաղաքապետարանը մի քանի նոր ավտոբուս է ներմուծել և փորձում է տրանսպորտային նոր մշակույթ մտցնել՝ սափրված և փողկապավոր վարորդների միջոցով: Բայց այս պահին տրանսպորտի վիճակը շարունակում է մնալ վատ, շատ ավելի վատ, քան Տարոնի ժամանակ էր: Սա ևս փաստ է:
3. Կանաչապատ տարածքների ոռոգումն ու խնամքը Տարոնի ժամանակ կատարվում էր անհամեմատ ավելի լավ, քան այսօր: Այս մասին են փաստում Երևանի կանաչ տարածքները: Սա նույնպես փաստ է:
Մնացած հարցերի մասին կարելի է անգամ չխոսել, որովհետև եթե Տարոնը վատ էր աշխատում, ապա կարգին Հայկոն շատ ավելի վատ է աշխատում: Այսքանը տեսնելու համար կարելի է անգամ գունավոր ակնոցով շրջել Երևանում:

Հայկ Դավթյան