Մրցակից թեկնածուն ավելորդ լարվածութուն է ստեղծում. Արամ Դանիելյանի նախընտրական շտաբի պետ

Արամ Դանիելյանի նախընտրական շտաբի պետ Կարեն Մարգարյանը Hayeli.am-ի հետ զրույցում, խոսելով Հրազդանում այսօր ընթացող ՏԻՄ ընտրությունների ընթացքի մասին, տեղեկացրեց, որ Հրազդան քաղաքում ժամը 10:00-11:00-ն ընկած ժամանակահատվածում ընտրությանը մասնակցել է ընտրական իրավունք ունեցող քաղաքացիներից շուրջ 6000 հոգի: Վերջինիս համոզմամբ՝ ընտրություններն ընթանում  են առանց որևէ միջադեպերի, ընտրախախտումների  դեպքեր չեն արձանագրվել: Կարեն Մարգարյանը, խոսելով այն ահազանգի մասին, թե Արամ Դանիելյանի շտաբը ընտրակաշառք է բաժանում, նշեց. «Դա ապատեղեկատվություն է, որը տարածեցին մրցակից թեկնածուին սպասարկող լրատվամիջոցները, որոնք զբաղված էին միակողմանի լուսաբանմամբ: Այդ հայտարարությունը ապացուցող որևէ արձանագրված փաստ չկա: Նշեմ որ այս պահին էլ Հրազդանում մրացակից թեկնածուի կողմնակիցները փորձում են ավելորդ լարվածություն ստեղծել՝ Հրազդանին հայտնի և անհայտ մարդկանց միջոցով: Նրանք ամեն կերպ փորձում են ապակայունացնել ընտրական բնականոն գործընթացը և ահաբեկել և վախեցնել իրենց չընտրողներին: Մեզ օրինական ընտրություն է պետք և բոլոր տեղամասերում պահպանելու ենք ժողովրդավարության տառին համապատասխանող ընտրություններ»,-խոսքը եզրափակեց Արամ Դանիելյանի նախընտրական շտաբի պետը: