«Վերջապես գտա «Զվարթնոց» օդանավակայանի գծային բաժնում՝ ծեծված-ջարդված, բազմաթիվ վնասվածքներով… Այս պահին արդեն Ֆրանսիայում է»

Երեկ՝ ուշ երեկոյան, լուր տարածվեց, որ ՀՀ ԱՆ «Երևան Կենտրոն» քրեակատարողական հիմնարկի կալանավորված անձ, Ֆրանսիայի իրավապահների կողմից հետախուզվող, այսպես ասած, «օրենքով գող» Մերաբ Քալաշովին պատրաստվում են արտահանձնել։

Այս մասին Tert.am-ի հետ զրույցում ասել էր Մերաբ Քալաշովի պաշտպան Արմեն Մելքոնյանը. «Իմ պաշտպանյալին, առանց հիմքի, ապօրինի, պատվերով բերել են ոստիկանության գծային բաժին և ուզում են տեղափոխել Ֆրանսիա:

Պաշտպանը նաև ասել էր, որ իրեն տևական ժամանակ Ոստիկանության օդանավակայանի գծային բաժնում թույլ չեն տվել տեսակցել իր պաշտպանյալին, ապա նշել հետևյալը. «Ես պատրաստ եմ ենթարկվել զննման, և թույլ չեն տալիս ինձ տեսակցել, ովքեր առաջացրել են այս հարցը, պատասխան են տալու: Իմ պաշտպանյալն Արդարադատության նախարարության քրեակատարողական ծառայության աշխատակիցների կողմից ծեծի է ենթարկվել, երեք ժամ բժիշկ չեն կանչել՝ մինչև իմ կողմից հարցը բազմաթիվ անգամ չբարձրաձայնելը: Նա ոտքի մատի կոտրվածք ունի և իրեն ծեծի ենթարկողներին ճանաչում է»։

Այսօր 168.am-ը Մերաբ Քալաշովի պաշտպան Արմեն Մելքոնյանից փորձեց ճշտել, թե արդյո՞ք, ի վերջո, իր պաշտպանյալին արտահանձնեցին այլ երկիր, ինչին նա դրական պատասխան տվեց՝ նշելով, որ Մերաբ Քալաշովն այս պահին արդեն գտնվում է Ֆրանսիայում։

«Մեր վերաքննիչ բողոքը՝ կալանքի ժամկետի հետ կապված, և վճռաբեկ բողոքը՝ արտահանձնման հետ կապված, դեռևս քննության չեն առնվել, և դրա վերաբերյալ վերջնական որոշում մենք դեռ չունենք, չենք ստացել, և իմ խորին համոզմամբ, և դա նաև օրենքի պահանջն է, 495 հոդվածը, որ քանի դեռ անձի նկատմամբ չկա վերջնական որոշում, նա չի կարող հանձնվել։ Եթե ես ամսի 3-ին եմ ստացել վերաքննիչի բողոքը, և որպես պաշտպան՝ վճռաբեկ բողոք բերելու իրավունք ունեմ, և ունեմ 5-օրյա ժամկետ, այսինքն՝ ամսի 8-ին ես կարող եմ, չէ՞, բողոքարկել… Եթե ես չեմ բողոքարկել, իրենք որտեղի՞ց գիտեն, որ այդ վերջնական որոշումը կայացրել են»,- ասաց Մերաբ Քալաշովի պաշտպանը։

Նա նշեց նաև, որ Արդարադատության նախարարությունից իրենց որևիցե պատասխան չեն տվել բացարձակապես։

«Ասեմ ավելին, ես երեկ ժամը 5-ից իմ պաշտպանյալին էի որոնում քրեակատարողական տարբեր հիմնարկներում, որին փախցրել-տարել էին, ու մենք տեղեկություն չունեինք նրանից։ Վերջապես գտա «Զվարթնոց» օդանավակայանի գծային բաժնում՝ ծեծված-ջարդված, բազմաթիվ վնասվածքներով։ Ահազանգել եմ ոստիկանություն, բայց այդպես էլ որևիցե մեկը չեկավ, չֆիքսեց։ Ոտքը կոտրած, մատը կոտրած, գլխին՝ վնասվածքներ, մեջքին, ոտքերին։ Լավ է, ֆրանսիական կողմը ֆիքսեց դրանք»,- նշեց Արմեն Մելքոնյանը՝ հավելելով, որ փոխանակ նորմալ բժիշկ հրավիրեն, ռենտգեն անեն, նյութեր նախապատրաստեն, մնացին «ձայն բարբառոյ յանապատի»։

Մեր հարցին ի պատասխան՝ Մերաբ Քալաշովի պաշտպանն ասաց, որ ի վերջո տեսել է իր պաշտպանյալին, սակայն չի կարող ասել, թե ինչո՞ւ էին նրան ծեծել։

Ոստիկանության լրատվական ծառայությունից փորձեցինք ճշտել, թե արդյո՞ք ահազանգ է եղել նշված դեպքով։ Խոստացան պատասխանել։ Հավանաբար պայմանավորված ոչ աշխատանքային օրվա տրամաբանությամբ՝ պատասխան չստացանք, սակայն, ամեն դեպքում, մենք պատրաստ ենք հրապարակել ոստիկանության պարզաբանումը խնդրի առնչությամբ։

«Բողոքելու եմ և կարծում եմ, որ պատասխան պիտի տան բոլոր ապօրինությունների համար։ Միանշանակ գնալու եմ մինչև վերջ»,- եզրափակեց պաշտպանը։

Քրեակատարողական ծառայության հանրային կապերի բաժնի պետ Նոնա Նավիկյանը, սակայն, 168.am-ի հետ զրույցում ասաց, որ ծեծի վերաբերյալ ինֆորմացիան իրականությանը չի համապատասխանում։

Ինչ վերաբերում է իրենց գործողություններին, նա ասաց, որ Վերաքննիչ դատարանի կողմից է որոշում կայացվել, որ Մերաբ Քալաշովին արտահանձնեն Ֆրանսիայի Հանրապետության իրավապահ մարմիններին:

Ի դեպ, մեր այն հարցին, թե ինչո՞ւ Մերաբ Քալաշովի պաշտպանին տեղյակ չեն պահել, որ իր պաշտպանյալին քրեակատարողական հիմնարկից դուրս են բերում, ՔԿԾ հանրային կապերի բաժնի պետը պատասխանեց, որ տեղյակ են պահել, ասաց, որ պաշտպանին վարույթն իրականացնող մարմինն է տեղյակ պահում։

Մինչդեռ Մերաբ Քալաշովի պաշտպանը կտրականապես հերքեց դա՝ ասելով, որ տեղյակ չի եղել։

«Գնացել եմ «Երևան-Կենտրոն» ՔԿՀ, այնտեղ ասել են՝ այստեղ չի, տարել են, վարչությունից ճշտեք։ Գնացել եմ Քրեակատարողական ծառայություն։ 40 րոպե սպասելուց հետո հերթապահ բաժնից ասացին՝ երկուշաբթի եկեք։ Այնտեղից ձեռնունայն գնացել եմ «Դատապարտյալների հիվանդանոց» քրեակատարողական հիմնարկ՝ մտածելով՝ միգուցե առողջական խնդիրներ ունի, այնտեղ են տեղափոխել։ Այնտեղ էլ չէր։ Հետո նոր զանգ ստացա, որ Օդանավակայանի գծային բաժնում է իմ պաշտպանյալը»,- վրդովվեց Արմեն Մելքոնյանը։

Հիշեցնենք, որ 2018թ. նոյեմբերի 15-ին Գլխավոր դատախազ Արթուր Դավթյանը որոշում է կայացրել «օրենքով գող» Մերաբ Քալաշովի նկատմամբ քրեական հետապնդում իրականացնելու նպատակով Ֆրանսիայի Հանրապետության իրավասու մարմիններին հանձնումը թույլատրել: Այս մասին տեղեկացրել էին Գլխավոր դատախազության հանրային կապերի բաժնից, իսկ ավելի վաղ ոստիկանությունը հայտնել էր, որ նոյեմբերի 6-ին Ոստիկանության քրեական հետախուզության գլխավոր վարչության աշխատակիցները Նուբարաշենից բերման են ենթարկել նախկինում դատապարտված, Հայաստանի քաղաքացիություն չունեցող, Ֆրանսիայի իրավապահների կողմից 2015-ից հետախուզվող, 1975թ. ծնված «օրենքով գող» Մերաբ Քալաշովին։