Միայն կաղին ունենան` ուտեն, պառկեն...
Նախօրեին ողջ օրվա ընթացքում սոցիալական մեդիայում և համացանցում թեժ կրքեր էր բորբոքել պատմական հուշարձանի դեմ ոտնձգության հերթական դրսևորումը:
Օշականում Նահապետ Եդեսացի կաթողիկոսի կողմից 1691-1706 թթ. կառուցված պատմական կամուրջի տակ անհասկանալի ծագման լողավազան է տեղադրվել և հատուկ պահպանության գոտում գտնվող պատմական միջավայրը վերածվել ժամանցի վայրի: Լողավազանը, ինչպես երևում է լուսանկարից, հիմնարար կառույց չէ, այն ժամանակավոր կոնստրուկցիա է, որը տեղադրվել է ուղիղ կամրջի կամարաձև թռիչքի տակ և ամբողջությամբ խաթարել պատմական հուշարձանի տեսքը:
«Պատմամշակութային արգելոց-թանգարանների և պատմական միջավայրի պահպանության ծառայություն» ՊՈԱԿ-ը պաշտոնական հայտարարություն տարածեց, որ դիմել է Արագածոտնի մարզպետին՝ համապատասխան միջոցներ ձեռնարկել ՀՀ Արագածոտնի մարզի պատմության և մշակույթի անշարժ հուշարձանների պետական ցուցակի Օշական գյուղում հաշվառված պետական սեփականություն համարվող հանրապետական նշանակության Կամուրջ հուշարձանի պահպանական գոտու տարածքում տեղադրված լողավազանն անհապաղ ապամոնտաժելու համար: Նշվում է նաև, որ լողավազանը տեղադրվել է առանց լիազոր մարմնի թույլտվության և ամբողջովին խաթարում է հուշարձանի արտաքին տեսքը:
Տարածքում գործում է «Օշականի հին ջրաղաց» հանգստավայրը, և ինչպես հայտնում են լրատվամիջոցները, լողավազանը հենց այդ հանգստավայրինն է: Արագածոտնի մարզպետարանից հայտնել են, որ տեղադրվել է ժամանակավոր փչովի լողավազան և գյուղապետին հանձնարարվել է ժամանակավոր լողավազանը վերացնել մինչև հուլիսի 15-ը: Փաստը մնում է փաստ, որ շուստրիների և զոռբաների առումով հին ու նոր Հայաստանում բարքերը չեն փոխվել, իրավիճակը` նույնպես: Շուստրի զոռբաները, թե հին, թե նոր Հայաստանում առաջնորդվում էին հայտնի առակից հայտնի տրամաբանությամբ` միայն կաղին ունենան, ուտեն, պառկեն, գիրանան: Շատ հետաքրքիր է` այդ շուստրիները ինչպե՞ս են կարողացել գալ հսկայական լողավազանն անարգել տեղադրել պատմական հուշարձանի տարածքում, ինչն առանց հատուկ տեխնիկայի կիրառման ուղղակի հնարավոր չէր: Հուշարձանների պահպանության պատասխանատուները ո՞ւր էին նայում, որ տեղադրման աշխատանքների փուլում ոչինչ չեն նկատել ու չեն կանխել: Դե թող որևէ շարքային քաղաքացի փորձի դուրս գալ բակ ու առանց թույլտվության 50 սմ տրամագծով փոս փորել: Փորձեք և կտեսնեք, թե քանի տեղից և քանի վերահսկիչ կգա ու կկանգնի ձեր գլխավերևում, կկանգնի ու կասի` Դուք սա անելու իրավունք չունեք:
Հուշարձանների գործակալության աշխատանքի վերահսկողությունը մշակույթի նախարարության միավորումից հետո փոխանցվել է կրթության, գիտության, մշակույթի և սպորտի նախարարությանը: Սուպերնախարար Արայիկ Հարությունյանը հուշարձանների ոլորտում առաջին քննությունը տապալեց: Այս դեպքը հստակ ցույց տվեց, որ նոր նախարարությունն ի զորու չէ տիրապետել իրավիճակին, եթե նման դեպքեր էլի կրկնվեն:
Հայկ Դավթյան
Հետևեք մեզ Viber-ում
