Սա ոչ հին , ոչ էլ նոր Հայաստան է. սա կեղտոտված Հայաստանի ցուցանիշ է
Այսօր դատախազության օրվա առթիվ Փաշինյանի ելույթը ցինիզմի դասական դրսևորումներից էր։
Նա իր ելույթում գնահատելով Արթուր Դավթյանի գործնեությունը՝ նշեց.
«... վերջին մեկ տարվա ընթացքում ես կարծում եմ, որ Հայաստանի Հանրապետության դատախազությունը հստակ ի ցույց դրեց, որ Հայաստանի Հանրապետության դատախազությունն իսկապես նոր Հայաստանի դատախազություն է և պատրաստ է իրականացնել այն առաքելությունը, պատրաստ է կատարել այն գործառույթը, որ Հայաստանի Հանրապետության իշխանության բարձրագույն կրողը՝ Հայաստանի Հանրապետության ժողովուրդը, դնում է նրա առաջ...»:
Հիշեցնենք, որ ընդամենը անցած տարվա ապրիլին այն ժամանակվա իշխանության պահանջով` նույն Արթուր Դավթյանը պատրաստվում էր Փաշինյանի կալանավորման միջնորդությամբ առաջարկով հանդես գալ ԱԺ–ին։
Քաղաքական իրավիճակի փոփոխման արդյունքում արդեն այսօրվա իշխանության պահանջով Արթուր Դավթյանը կալանավորման որոշում է կայացնում, ոչ թե Նիկոլ Փաշինյանի, այլ Ռոբերտ Քոչարյանի նկատմամբ։
Այսինքն` կարելի է եզրակացնել, որ գլխավոր դատախազի պաշտոնում աշխատող Արթուր Դավթյանը իր որոշումները կայացնում է ոչ թե օրինականության չափանիշներից ելնելով, այլ քաղաքական օրվա ուղենիշի թելադրանքով։
Այստեղից կարելի է եզրակացնել, որ եթե երկրի ղեկավարը դառնար, օրինակ՝ Իլհամ Ալիևը և պահանջեր կալանավորել և Քոչարյանին, և Փաշինյանին, ապա Արթուր Դավթյանը անվերապահ կկատարեր այդ պահանջը։
Սա նշանակում է, որ ի դեմս Արթուր Դավթյանի մենք գործ ունենք վտանգավոր մի մարդու հետ, ով չունի որևէ սկզբունք իր իսկ ոլորտում։
Մի՞թե սա էր Փաշինյանի կողմից խոստացված «նոր Հայաստանի» կառուցումը։ Ցանկացածի համար էլ ակնհայտ է, որ այս ամենը ոչ մի կապ չունի իրական Նոր Հայաստանի հետ։
Պարզ է նաև, որ այս երևույթը նույնիսկ «հին Հայաստան» չի կարելի համարել։ Նույնիսկ հին Հայաստանում ոչ մեկի մտով չէր անցնի, օրինակ, Գագիկ Ջհանգիրյանի ձեռքերով մեղադրանք ներկայացվեց Լևոն Տեր–Պետրոսյանին։ Այսօրվա գործընթացները կարելի է բնորոշել որպես ոչ թե հին կամ նոր, այլ «կեղտոտված Հայաստան»–ի խաղի նոր կանոններ։ Որտեղ քաղաքական «ենիչերը» բարձր գնահատականի է արժանանում, ինչը բնորոշ էր, օրինակ, Օսմանյան կայսրության քաղաքական բարքերին։
Հասկանալի է, որ իր այս քայլով Փաշինյանը Դավթյանին, ոչ թե լավություն արեց, այլ ճիշտ հակառակը, քանի որ հաջորդ իշխանությունը անկախ նրանից, թե ով կլինի ստիպված պատժելու է Դավթյանին ենիչերությոն անելու համար, քանզի Օսմանյան կայսրության բարքերով Հայաստանը չի կարող ապագա ունենալ։
Սա է իրականությունը։
Արտակ Հակոբյան
Հետևեք մեզ Viber-ում
