Նիկոլ Փաշինյանն ուզում է հաշվառել ԶԼՄ-ներին. օրենսդրական խակ նախաձեռնություն

Արդարադատության նախարարությունը e-draft տեղեկատվական հարթակում հանրային քննարկման է ներկայացրել օրենսդրական փոփոխությունների նախագիծ, որով առաջարկվում է հաշվառման համակարգ ներդնել ԶԼՄ-ների համար։ Ուշագրավ է, որ որոշման նախագիծը չի քննարկվել մասնագիտական հանրույթի հետ, հաշվի չի առնվել մեդիա-փորձագետների առաջարկները` ոլորտի կարգավորման վերաբերյալ: 

 Ինֆորմացիայի ազատության կենտրոնի տնօրեն Շուշան Դոյդոյանը ՖԲ էջում, անդրադառնալով խնդրին, գրել էր, որ ԶԼՄ-ների համար հաշվառման համակարգը կիրառվել է 90-ականներին: << Այն, ինչ հաջողությամբ կիրառել է Արդարադատության նախարարությունը 90-ականներին, չի նշանակում, որ 20 տարի հետո արդիական կլինի>>,- նշել էր փորձագետը և նկատել, որ Զանգվածային լրատվության մասին ՀՀ օրենքում որեւէ նոր կարգավորում առաջարկելուց կառավարությունը պարտավոր է այն նախ քննարկել մասնագետների հետ, հետո դնել հանրային քննարկման :
Նախագիծը հրապարակվել է հունիսի 28-ին, հանրային քննարկումը շարունակվելու է մինչև հուլիսի 13-ը:
Այսպիսով` արդարադատության նախարարությունն առաջարկում է ԶԼՄ-ներիր մասով «Իրավաբանական անձանց պետական գրանցման, իրավաբանական անձանց առանձնացված ստորաբաժանումների,
հիմնարկների եվ անհատ ձեռնարկատերերի պետական հաշվառման մասին» ՀՀ օրենքում կատարել հետևյալ փոփոխությունը` լրացում կատարելով օրենքի 25.2-րդ հոդվածում.
<<Հաշվառված զանգվածային լրատվության միջոցի վերաբերյալ պետական միասնական գրանցամատյանում գրառվում են հետևյալ տեղեկությունները.
1) լրատվության միջոցի անվանումը և տեսակը.
2) լրատվության միջոցի պետական հաշվառման համարը.
3) պետական հաշվառման տարին, ամիսը, ամսաթիվը.
4) լրատվական գործունեություն իրականացնող իրավաբանական անձի լրիվ անվանումը, իրավաբանական անձի պետական գրանցման (կամ իրավաբանական անձի անունից գործող նրա առանձնացված ստորաբաժանման, հիմնարկի հաշվառման) համարը, իսկ եթե լրատվական գործունեություն իրականացնողը ֆիզիկական անձ է, ապա նրա անունը, ազգանունը, հաշվառման կամ բնակության վայրի հասցեն, որպես անհատ ձեռնարկատեր հաշվառված լինելու դեպքում՝ անունը, ազգանունը, պետական հաշվառման համարը:
2. Այլ մարմնի կողմից գրանցված կամ հաշվառված զանգվածային լրատվության միջոցներին տրվում է պետական հաշվառման համար և նախկին հաշվառման տվյալները ինքնաշխատ կերպով փոխանցվում են պետական միասնական գրանցամատյան:»:
Սահմանվում է, ո ր Զանգվածային լրատվության միջոցի հաշվառումն իրականացվում է լրատվության միջոցի պարտադիր օրինակը ներկայացնելու մասին լրատվական գործունեություն իրականացնող իրավաբանական անձի գրությունն ստանալուց հետո մեկօրյա ժամկետում:
Զանգվածային լրատվության միջոցը համարվում է հաշվառված պետական միասնական գրանցամատյանում սույն օրենքի 25.2-րդ հոդվածով սահմանված տեղեկությունների գրառման պահից:
Զանգվածային լրատվության միջոցի հաշվառումը հավաստվում է համապատասխան էլեկտրոնային փաստաթղթով, որն անմիջապես ուղարկվում է լրատվական գործունեություն իրականացնող անձի պաշտոնական էլեկտրոնային փոստի հասցեին:

Լրատվության միջոցի պետական հաշվառում չի կատարվում, եթե՝
ներկայացված լրատվության միջոցի պարտադիր օրինակը չի պարունակում օրենքով պահանջվող թողարկման տվյալները, օրենքով սահմանված կարգով զրկվել է ձեռնարկատիրական գործունեությամբ զբաղվելու իրավունքից և դատվածությունը սահմանված կարգով հանված կամ մարված չէ:
Նախագիծն, ամենայն հավանականությամբ դեռ կդառնա հանրային լայն քննարկման թեմա և մենք առիթ կունենանք անդրադառնալու դրան:

Հայկ Դավթյան