Հասել ենք, իջեք, պարոն Վանեցյան

Նիկոլ Փաշինյանի իշխանության պաշտոնյաները բարի փերիներ են հիշեցնում, որ կողմը թեքվում ես, մի հրաշալի նախաձեռնության մասին են ավետում։ Նիկոլ Փաշինյանը դեռ ամիսներ առաջ խոստանում էր Հայաստանը ողողել ներդրումներով, այդ պատրվակով նա շանտաժի ճանապարհով հասավ արտահերթ խորհրդարանական ընտրությունների։ Մինչ օրս թե ուր են այդ ներդրումները, միայն Նիկոլ Փաշինյանը կիմանա, մեկ էլ իր սիրասուն տիկին Աննա Հակոբյանը, որի ղեկավարած հիմնադրամներում, ահավասիկ, ներդրումներ կատարվում են, այն էլ շենշող։

Երեւանի քաղաքապետ Հայկ Մարությանն էր մինչեւ ընտրվելը խոստանում ՀՀ հպարտ քաղաքացիներին ազատել մահաբեր վերելակներից ու ոչ արժանապատիվ երթուղային տրանսպորտից, բերել նորերը, խոստանում էր բարեկարգել փողոցներն ու բակերը։ Ոնց որ թե հասել ենք, իջեք հեղափոխական երթուղայիններից ու ոչ դժոխային վերելակներից։ Իջեք ու քայլեք մետրոյի հաջորդ կայարան, այո-այո, չեք սխալվում Աջափնյակի կայարան, որի մասին թմբկահարում էին կարգին քաղաքապետն ու Երեւանի գլխավոր ճարտարապետը։

Մեր իշխանավորների պահվածքը հայտնի անեկդոտն է հիշեցնում, երբ 70-անց տղամարդը իրենից ավելի երիտասարդների մոտ գլուխ է գովում իր սեռական ակտիվության մասին եւ զարմացած տղամարդկանցից ամենասրամիտը ընկերներին խորհուրդ է տալիս․«Է, դու էլ ասա․․․»։ Հիմա «ասելու» հերթը ԱԱԾ տնօրեն Արթուր Վանեցյանինն է։ Այսօր նա մի լավ գլուխ է գովացել, որ ուզում է Ազգային ստադիոն կառուցել, բայց դեռեւս չգիտի, թե ֆինանսական ինչ միջոցներով։ Բայց դա չի խանգարել, որպեսզի մեր հարգարժան Վանեցյանը երկար-բարակ խոսի իր երազանքների ու պատկերացումների մասին։ Օրինակ, որ ազգային ստադիոնը Երեւանին մոտ համայնքներից մեկում է լինելու, կառուցվելու է անհատ ներդրողների կողմից: Քանի որ պետությունը Վանեցյանի ասելով չի կարող մասնակցություն ունենալ ազգային ստադիոն կառուցելու հարցում:

«Ազգային ստադիոնի կառուցման վերաբերյալ աշխատանքները մշտական քննարկման փուլում են: Ես կարեւորում եմ ազգային ստադիոնի կառուցումը, բայց դա հսկայական միջոցների ներդրումներ է, եւ պետությունը որեւէ մասնակցություն չի կարող ունենալ ազգային ստադիոնի կառուցման հարցում: Ազգային ստադիոնը պետք է կառուցվի մասնավոր ներդրողների կողմից: Այսօր քննարկումներ ունենք մի քանի մասնավոր ներդրողների հետ, հույս ունեմ առաջիկայում կունենանք դրական տեղաշարժ այս հարցում:
Սկզբնական շրջանում քննարկում էինք Երեւանում կառուցելու մասին, բայց հետագա քննարկումների արդյունքում որոշվել է ստադիոնը կառուցել Երեւանի մոտակա համայնքներից մեկում: Ազգային ստադիոնը Երեւանում չկառուցելու պատճառն այն է, որ քաղաքը խիտ կառուցապատված է: Եթե մարզում կարողանանք կառուցել ազգային ստադիոնն իր հարակից կառույցներով, այդ քայլով մենք նաեւ կաջակցենք մարզերի զարգացվածությանը: Իրականությանը չի համապատասխանում այն տեղեկությունը, որ համայքներից մեկում քաղաքապետարանը չի համաձայնել հող տրամադրել ազգային սստադիոն կառուցելու համար, կեղծ լուրեր են: Բոլոր համայնքները մշտապես մեզ հետ աշխատում եւ համագործակցում են: Չեմ կարծում, որ Հայաստանում կգտնվի մեկ համայնքի ղեկավար, որին առաջարկվի իր համայնքում անվճար կառուցել ստադիոն եւ նա չհամաձայնի»:

Ինչպես ասում են՝ հասել ենք, իջեք պարոն Վանեցյան, իջեք ու ոտքը դրեք իրական հողին, որտեղ հեքիաթների հակառակ կողմն է, եւ այստեղ երազանքները հենց այնպես չեն դառնում իրականություն։

Անի Սահակյան