4+4+4-ը արդյունք չտվեց

Ինչպես արդեն տեղեկացրել ենք, այսօր ԱԺ-ում սկսվեց 4+4+4 ձեւաչափով քննարկումը: Կառավարության աշխատակազմի ղեկավար-նախարար ներկայացրեց իշխանության առաջարկությունները, սակայն այդ առաջարկությունները անընդունելի չէին մյուս կողմերի համար: Լեւոն Զուրաբյանը հայտարարեց, որ իրենք արել են ամեն ինչ, որ Հայաստանի պատմության մեջ առաջին անգամ կազմավորվեր մի Ընտրական օրենսգիրք, որի շուրջ ձեւավորված է լուրջ վստահություն. «Այսօր մենք պայմանավորվել էինք, որ պետք է փաթեթային կոնսենսուսային լուծումների գանք, եւ մենք առաջարկեցինք մեր տարբերակը: Ընդ որում, երբ դուք հարցրեցիք արդյոք դա բանակցային տարբերակ է, մենք պատասխանեցինք՝ այո՛, բանակցային տարբերակ է, որովհետեւ մենք շատ կառուցողական ենք տրամադրված, եւ հանուն այդ վստահելի ընտրությունների պատրաստ ենք բանակցել ինչքան որ պահանջվի, միայն թե այդ բաղձալի նպատակին հասնենք: Երբ որ դուք ձեր առաջարկները ներկայացրեցիք, դուք ասացիք, որ դրանք բանակցային չեն: Եթե այն, ինչ-որ դուք պատրաստ եք զիջել հանրությանը բանակցելի չէ, ուրեմն՝ ես հենց հիմա կարող եմ բոլորի անունից հայտարարել, որ այս ձեւաչափով բանակցությունները չտվեցին այն արդյունքը, որոնց ուղղված էր: Այսինքն՝ կոնսենսուս չկայացավ»: Սոնա Չիբուխչյան