Կերմլի 5-րդ շարասյան հակահարվածը, թավշիստների խոսուն լռությունը

Մինչ Հայաստանում քաղաքական էլիտան խառն է Սահմանադրական դատարանի դատավոր Վահե Գրիգորյանին մեխանիկորեն ՍԴ նախագահ դարձնելու սուրբ գործով, ռուսական 5-րդ շարասյունը սկսում է լայնածավալ հարձակում՝ մեր թավշյա իշխանության ուղղությամբ:
«Առաջին լրատվական»-ի հետ զրույցում «Ռեգնում» լրատվական գործակալության գլխավոր խմբագիր, քաղաքական վերլուծաբան Մոդեստ Կոլերովը հայտարարել է, որ ՀՀ ԱԳՆ-ում իրենց աղբյուրը վստահեցնում է՝ ՌԴ դեսպանին ԱԳՆ-ում որևէ գանգատ չի ներկայացվել. «Եղել է սովորական հանդիպում և զրույց»։ Նա այս դիտարկումն արել է մեկնաբանելով ՌԴ դեսպանի ՀՀ ԱԳՆ կատարած վերջին այցը, որի ընթացքում, ըստ ՀՀ ԱԺ խորհրդարանի ղեկավարի և ԱԺ արտաքին հարաբերությունների հանձնաժողովի նախագահի, հայկական կողմը դիտողություն է արել դեսպանին՝ ՀՀ ներքին գործերին չմիջամտելու հորդորով: Խնդիրը, ինչպես հայտնի է, ՌԴ դեսպանի ու ՀՀ երկրորդ նախագահի մինչ այդ տեղի ունեցած հանդիպման փաստով էր պայմանավորված. ՀՀ իշխանությանը դուր չէր եկել, որ դեսպան Սերգեյ Կոպիրկինը հանդիպել է կալանքից օրերս ազատված Ռոբերտ Քոչարյանի հետ:
«Այն, ինչ հիմա արվում է Քոչարյանի հանդեպ՝ մեր հարաբերությունների վրա բացասաբար կանդրադառնա։ Այն դժգոհությունները, որ արտաբերեց Հայաստանի ԱԺ խոսնակը մեր դեսպանի հասցեին՝ իրավական դաշտից առհասարակ դուրս է։ Ես հասկանում եմ, որ ձեր ԱԺ խոսնակը իրավաբան չէ, բայց իր պաշտոնը ենթադրում է, որ նա պետք է տարրական կանոնները պահպանի,- այս առնչությամբ ասել է Կոլերովը և հավելել,- Երբ նա մեր դեսպանի հետ կապված դժգոհություններ է ներկայացնում, որ նա Քոչարյանի հետ է հանդիպել և ասում, որ Քոչարյանի դեմ գործ է հարուցված և դրա համար չի կարելի նրան հանդիպել՝ նա շատ կոպիտ, ցուցադրաբար, անամոթաբար, սկանդալային կերպով, ես նույնիսկ կասեի՝ բարբարոսաբար խախտում է օրենքի ամենաֆունդամենտալ սկզբունքը՝ անմեղության կանխավարկածը։ Հետո ի՞նչ, որ Քոչարյանի դեմ գործ է հարուցված, վաղն էլ նրա դեմ կարող է գործ հարուցվել, և ի՞նչ։ Մինչև դատարանը մարդուն մեղավոր չճանաչի՝ նա անմեղ է։ Չգիտե՞ք այդ սկզբունքը՝ կոչվում է անմեղության կանխավարկած։ Ձեր մոտ, ինչպես նաև մյուս բոլոր նորմալ երկրներում, դա ամրագրված է Սահմանադրության մեջ։ Հիմա ստացվում է ի՞նչ՝ ԱԺ խոսնակը խախտում է անմեղության կանխավարկա՞ծը, դա սկանդալ է, բարբարոսություն ու ամոթ»։
Հարցին, թե, այնուամենայնիվ, դեսպանի հանդիպումը Քոչարյանի հետ կարելի՞ է համարել Ռուսաստանի քաղաքական աջակցությունը նրան, Մոդեստ Կոլերովը պատասխանել է. «Առաջին հերթին դեսպանը պետք է հանդիպի բոլոր քաղաքական ուժերի հետ, դա այբուբեն է։ Երկրորդ՝ Քոչարյանին աջակցություն հայտնել է անձամբ Պուտինը, այդ պատճառով մեր դեսպանը ևս Քոչարյանին աջակցություն է հայտնում»։
Սա ոչ թե ստանդարտ քննադատություն է, ինչպիսիք նախկինում ևս շատ է արվել ռուսական 5-րդ շարասյան կողմից, այլ իսկական թուքումուր: Փաստացի քաղաքական վերլուծաբանը ՀՀ ԱԺ խոսնակին մեղադրում է ոչ կոմպետենտ լինելու և քաղաքական արկածախնդրության մեջ: Եվ սա, ըստ էության, սոսկ Ռեգնիումի գլխավոր խմբագրի անձնական կարծիքը չէ, սա ռուսական քաղաքական-փորձագիտական շրջանակների ընդհանրական մոտեցումն է Հայաստանում տեղի ունեցող քաղաքական գործընթացներին և այդ համատեքստում նաև Երևան-Մոսկվա պաշտոնական հարաբերություններին մասնավորապես:
Ընդ որում հայկական կողմից այս ուղղությամբ պատասխան առայժմ չկա՝ խոսուն լռություն է: Հավանաբար թավշյա պայթյունի կանխազգացում կա:
Հայկ Դավթյան