Զինվում են՝ «մինչև ատամները»

Ադրբեջանը պլանավորում է 5 տոկոսով ավելացնել ռազմական ծախսերը։ «Ինտերֆաքս»-ի ադրբեջանական ծառայության փոխանցմամբ՝ Ադրբեջանի կառավարությունը պլանավորում է հավելյալ գումարներ հատկացնել՝ պաշտպանական ծախսերի ընդհանուր թիվը հասցնելով մոտ 1,88 միլիարդ դոլարի:

Փոխարենը կառավարությունը մտադիր է կրճատել սոցիալական պաշտպանության հիմնադրամին փոխանցվող գումարները: Հիշեցնենք՝ նախորդ տարի Ադրբեջանը արդեն մոտ 300 միլիոն դոլարով ավելացրել էր պաշտպանական ոլորտի ծախսերը: Վարչապետ Նովրուզ Մամեդովը անցած մարտին հայտարարել էր, որ երկրի զինված ուժերի ապահովումը արդիական ռազմական տեխնիկայով եղել է ուշադրության կենտրոնում, այդ նպատակով ձեռք են բերվել «Պոլոնեզ», «Լորա» համակարգեր և այլ միջոցներ։

Նախօրեին Ադրբեջանի նախագահ Իլհամ Ալիևի հրամանագրերով մի շարք փոփոխություններ, փոխատեղումներ են կատարվել ուժային կառույցներում:
Ներքին գործերի երկարամյա նախարար Ռամիլ Ուսուբովը ազատվել է զբաղեցրած պաշտոնից ու նշանակվել նախագահին կից անվտանգության խորհրդի քարտուղար: Ներքին գործերի նախարար է նշանակվել Վիլայաթ Էյվազովը, ով մինչ նոր նշանակումը ՆԳ նախարարի առաջին տեղակալն էր:

Պետական անվտանգության ծառայության ղեկավար Մադաթ Գուլիևը նշանակվել է ռազմական արդյունաբերության նախարար: Նրա փոխարեն պետանվտանգության ծառայության պետ է նշանակվել Ալի Նագիևը: Վերջինս գլխավոր դատախազությունում կոռուպցիայի դեմ պայքարի վարչության պետն էր:

Այս տարվա ընթացքում մի քանի զորավարժությունները, այդ թվում՝ Ադրբեջան-Թուրքիա ֆորմատով, գալիս են ապացուցելու, որ Ադրբեջանը լրջորեն պատրաստվում է պատերազմի:

Ռազմական ներուժի ավելացումը, փաստացի շարունակում է Ադրբեջանի թիվ մեկ նպատակը մնալ: Ռազմական հավասարակշռությունը վաղուց էր խախտած: Եթե դիվանագիտական ճակատում էլ Ադրբեջանն առավելություն ձեռքբերի՝ Արցախը հայտնվելու է վտանգավոր կացության մեջ:

Մետաքսյա Շալունց